Dövlət müstəqilliyinin bərpasının 33-cü ildönümü ilə əlaqədar Mingəçevir şəhər İcra Hakimiyyəti və YAP şəhər təşkilatının birgə elmi-nəzəri konfransı keçirilib. 

Konfransı şəhər icra hakimiyyətinin başçısı İlham İsmayılov açaraq bildirdi ki,  Azərbaycanın dövlət müstəqilliyini bərpa etdiyi tarixdən 33 il keçir. Əlamətdar bayram münasibətilə mingəçevirliləri təbrik edən şəhər rəhbəri əsrlər boyu müstəqillik arzusu ilə yaşayan xalqımızın ayrı-ayrı dövrlərdə müxtəlif imperiyaların və böyük dövlətlərin tərkibində olmasına baxmayaraq, milli-mənəvi dəyərlərini, dilini, mədəniyyətini qoruyub saxladığını və dünya mədəniyyəti xəzinəsinə töhfələr verdiyini qeyd etdi: “XX əsrin əvvəllərində Şərqdə ilk demokratik respublika kimi qurulan Azərbaycan Xalq Cümhuriyyəti cəmi 23 ay mövcud oldu və 70 il Sovetlər rejiminin tərkibində yaşadı. 1991-ci il oktyabrın 18-də müstəqilliyimizin bərpası bizə dünyəvi dövlət qurmaq və dünya birliyində mühüm yer tutmaq imkanı yaratdı”.

İ.İsmayılov əlavə etdi ki, ötən illər ərzində aparılan uğurlu daxili və xarici siyasət sayəsində dövlətçilik ənənələrimiz möhkəmlənib, iqtisadiyyatımız inkişaf edib, mədəniyyətimiz zənginləşib: “Müstəqilliyimizin ilk illərində ölkəmiz siyasi, iqtisadı və sosial böhranla yanaşı, Ermənistanın hərbi təcavüzü, azərbaycanlılara qarşı yürütdüyü etnik təmizləmə siyasəti və keçmiş Dağlıq Qarabağ problemi ilə üz-üzə qalmışdı. Ümummilli Lider Heydər Əliyevin 1993-cü ildə hakimiyyətə qayıdışı, müdrik siyasəti nəticəsində ölkə vətəndaş müharibəsindən, müstəqilliyinin itirilməsi təhlükəsindən qurtuldu. Dövlətlə xalq birliyi təmin edildi, ictimai-siyasi sabitlik bərpa olundu. Bu gün isə Azərbaycan Prezident İlham Əliyevin rəhbərliyi altında ölkəmiz inkişaf edir, möhkəmlənir, beynəlxalq sahədə nüfuzu artır. Enerji sektorunun inkişafı, sənaye zonalarının yaradılması, aqrar sahədə, ordu quruculuğu sahəsində aparılan islahatlar ölkəmizin sürətli inkişafına şərait yaratmış, ərzaq təhlükəsizliyi təmin edilmiş, regionların inkişafında irəliləyişlər olmuşdur. Azərbaycan dünya ölkələri arasında layiqli yerini tutmuş, regionun lider dövlətinə çevirilmişdir. Bu inkişaf göstərir ki, Azərbaycan Prezidentin rəhbərliyi altında daha da inkişaf yeni edərək uğurlar qazanacaqdır”. 

Natiq daha sonra dedi: “30 ilə yaxın müddətdə işğal altında olan torpaqlarımız 44 gün ərzində şanlı ordumuzun şücaəti ilə azad olundu, sərhədlərimiz bərpa edildi. 2020-ci il Azərbaycan tarixinə zəfər ili kimi daxil oldu. 2022-ci il sentyabrın 12-dən 13-nə keçən gecə mənfur qonşularımız Laçın, Kəlbəcər, Daşkəsən istiqamətində törətdiyi təxribatın qarşısını Qəhrəman Azərbaycan Ordusu müvəffəqiyyətlə aldı. 2023-cü ilin 19 sentyabrında Ali Baş Komandan İlham Əliyevin tapşırığı ilə Qarabağ iqtisadi rayonunun sülhməramlıların  nəzarəti altında olan ərazilərində antiterror əməliyyatları, 23 saat 43 dəqiqə ərzində 90-a yaxın strateji əhəmiyyətli ərazilər nəzarətə götürüldü. Antiterror əməliyyatlarından sonra bütün Qarabağ torpağı azad olundu, suverenliyimiz tam bərpa edildi. Artıq bütün ərazilərimizdə Azərbaycan bayrağı dalğalanır”. 

Tədbirdə YAP şəhər təşkilatının sədri Bəxtiyar Mustafayev “Azərbaycan Respublikasının Dövlət müstəqilliyi haqqında” Konstitusiya Aktının qəbul edilməsi mühüm tarixi hadisədir”, MDU-nun baş müəllimi Aygün Qədirova “Ulu Öndər Heydər Əliyev Azərbaycanın dövlət müstəqilliyini əbədi edən tarixi şəxsiyyətdir”, Turizm kollecinin tarix müəllimi Eldar Dərişov “Ulu öndər Heydər Əliyevin dövlət quruculuğu sahəsində gördüyü işlər müstəqilliyimizin möhkəmlənməsinə xidmət etmişdir”, Mingəçevir Tibb Kollecinin ictimai elmlər üzrə müəllmi Afaq Cəfərova “Azərbaycanın müasir zəfərləri Ulu öndər Heydər Əliyevin əsasını qoyduğu dövlətçilik ənənələrinin nəticələridir” məruzələri ilə çıxış etmişlər. 

Lazım QULİYEV,

“Azərbaycan”