layiqli cəzasını alacaq 

Ermənistan vətəndaşı olan, Azərbaycan Cinayət Məcəlləsinin sülh və insanlıq əleyhinə cinayətlər, müharibə cinayətləri ilə, habelə terrorçuluq, terrorçuluğu maliyyələşdirmə ilə bağlı maddələri və digər ağır cinayətlərdə təqsirləndirilən Ruben Vardanyanın barəsində cinayət işi üzrə məhkəmə prosesinin baxış iclasları davam etdirilir. 

Sözügedən məhkəmə iclaslarında R.Vardanyanın itiham olunduğu cinayət əməlləri üzrə suallara cavab verməməsi, susması xüsusi diqqət çəkir.

Elə başa düşülə bilər ki, bəlkə də Vardanyan Vətən müharibəsindən sonra Qarabağda törətdiyi cinayət əməllərinə görə utandığından danışmağa söz tapmır, dili lal olur. Amma bu, qətiyyən belə deyil. Baxışlarından kin-küdurət yağan tülkü xislətli Vardanyan əslində düşünür ki, iclaslarda ağzına su almaqla guya xalqımıza qarşı həyata keçirdiyi bədnam əməllərin üzərini örtəcək, beləcə Azərbaycan qanunları ilə mühakimə olunmaqdan da qurtulacaq. Lakin hazırda Bakıda məhkəmələri davam etdirilən və xalqımıza, ölkəmizə qarşı  silsilə cinayətlərdə təqsirləndirilən Ermənistan vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, Davit Babayan, Lyova Mnatsakanyan, Davit Manukyan kimi, Ruben Vardanyanın da təqsiri sübuta yetirilərsə, layiqli cəzası veriləcək. Yəni Vardanyan məhkəmədə hər nə qədər erməni hiyləsinə əl atsa da bu ona qətiyyən kömək etməyəcək. 

Maraqlı qüvvələrin maşası

44 günlük müharibədən sonra tələsik Rusiya vətəndaşlığından çıxaraq özünü Qarabağa yetirən R.Vardanyan burada Azərbaycan qanunlarına zidd fəaliyyətlə məşğul olmağa başladı. Bəzi maraqlı dairələrin bölgədəki çirkin planlarını yerinə yetirmək üçün maşa rolunu oynayan Vardanyan separatçı rejimin "dövlət naziri" seçildi. Ara qarışdırmaqla məşğul olan bu erməni dəllal separatizmi gücləndirməyə, vəziyyətin gərginləşməsinə çalışdı. Missiyasına uyğun olaraq dialoq prosesinə mane olmağa, təhlükəsizliyə təhdidlər yaratmağa başladı, pul vəsaitlərini Qarabağdakı qanunsuz silahlı birləşmələrin terrorçuluq fəaliyyətinin təşkilinə yönəltdi. Azərbaycanın suveren ərazilərində sərvətlərimizin talançılığı ilə məşğul olan Vardanyan onu xüsusi dağıdıcı missiya ilə Qarabağa yerləşdirən qüvvələrə güvənərək ard-arda sərsəm açıqlama və bəyanatlar verdi. Eyni zamanda tarixi təhrif edən tamamilə yalan və böhtan xarakterli məlumatlarla dünya ictimaiyyətində çaşqınlıq yaratmaq istəyirdi. Təbii ki, bu siyahını uzatmaq da olar, amma elə bu nümunələr də R.Vardanyanın cinayət əməllərini aydın təsəvvür etməyə yetir.  

Ümumiyyətlə, R.Vardanyanın Vətən müharibəsindən sonra bu bölgəyə yerləşib özbaşınalıqlar etməsi, bir növ Azərbaycanın səbri ilə oynamaq demək idi və bunun çox sürməyəcəyi əvvəlcədən gün kimi bəlli idi. 

Azərbaycan 2023-cü il sentyabrın 19-20-də keçirdiyi antiterror tədbirləri sayəsində Qarabağda separatizmə birdəfəlik son qoydu, suverenliyini təmin etdi və Konstitusiyası respublikamızın bütün ərazilərində qüvvəyə mindi. Beləliklə, növbə vaxtilə xalqımıza, ölkəmizə qarşı saysız cinayət əməlləri törətmiş canilərin layiqli cəzalarını almasına gəldi. Qondarma qurumun quldur rəhbərləri Bakıya gətirilərək ədalət mühakiməsinə çıxarıldı.   

Törətdiyi qeyri-qanuni əməllərə görə R.Vardanyan 2023-cü il sentyabrın  27-də saxlanılaraq, ittiham elan edilməklə təqsirləndirilən şəxs qismində cinayət məsuliyyətinə cəlb olundu. Barəsində məhkəmənin qərarı ilə həbs qətimkan tədbiri seçilən R.Vardanyan Azərbaycan Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri və digər ağır cinayətlərdə təqsirləndirilir və onun barəsində cinayət işi üzrə məhkəmə prosesinin baxış iclasları davam etdirilir.

Oyunbazlığın növbəti pərdəsi 

Vurğuladığımız kimi, R.Vardanyan keçirilən məhkəmə iclaslarında ona ünvanlanan sualları cavablandırmaqdan imtina edir. Fevralın 25-də keçirilən iclasda da analoji hal təkrar olunub. 

Ona qondarma rejimin dövlət naziri vəzifəsinə təyin edilməsi qaydası, həmin vəzifəyə təyin olunmasına zəmanətin kim tərəfindən verilməsi, bununla bağlı məsləhətləşmələr apardığı insanların şəxsiyyəti, Azərbaycanın əvvəllər işğal altında olmuş hansı ərazilərinə səyahət etməsi, "Biz və Bizim dağlar Ərazi İnkişaf Agentliyi" və "Artsaxın Təhlükəsizliyi və İnkişaf Cəbhəsi Hərəkatı"nın fəaliyyət istiqamətləri barədə suallar verilib.

Dövlət ittihamçıları ona Ermənistan ərazisindən keçərək qanunsuz olaraq Azərbaycanın suveren ərazisi olan Qarabağa gəlməsi, keçmiş qondarma rejimin ərazidə dövriyyədə olan pul vahidi, həmin ərazidə Ermənistan pasportundan istifadə olunma səbəbi, Ermənistan silahlı qüvvələrinin orada yerləşməsinin məqsəd və əsasları, R.Vardanyan tərəfindən Azərbaycan və Erməni xalqlarının birgə yaşamasının qeyri-mümkünlüyünü ifadə edən, habelə xalqlar arasında nifrət və ədavəti oyadan xarakterə malik çıxışların edilmə səbəbi və məqsədi, qondarma rejimin maliyyələşdirilməsi forması və Ermənistan dövlətinin bu prosesdə iştirakı, "dövlət naziri" vəzifəsində qısa müddət olmasının səbəbi barədə suallar veriblər. R.Vardanyan isə bu sualları cavablandırmaqdan imtina edib. 

Ancaq suç bəlli, günahkar bəlli. Vətən müharibəsindən sonra Qarabağda "desant" kimi peyda olaraq bölgədə vəziyyəti təhdid edərək dağıdıcı fəaliyyətlə məşğul olan R.Vardanyan məhkəmə iclaslarında sussa da, susmasa da, nəticə dəyişməyəcək. 

Bu fitnəkarın cinayət əməlləri sübuta yetiriləcək və layiqli cəzasını alacaq. 

Yasəmən MUSAYEVA,

"Azərbaycan"