Türk Dövlətləri Təşkilatına üzv ölkələrin qeyri-hökumət təşkilatlarının II Əməkdaşlıq Forumu çərçivəsində panel iclaslar keçirilib.
AZƏRTAC xəbər verir ki, forum çərçivəsində Azərbaycan–Qırğızıstan QHT Forumu təşkil olunub.
“Azərbaycan–Qırğızıstan QHT Dialoqu: Urbanizasiya və Dayanıqlı Şəhər İnkişafı” mövzusuna həsr olunan panel “Ortaq Dəyərlər” İctimai Birliyinin sədri Aqil Camalın moderatorluğu ilə keçirilib.
Paneldə “İnsap Elim” İctimai Fondunun direktoru Tolobek Beishenbekov, Manas şəhəri İcra Hakimiyyəti yanında Gənclərlə İş üzrə Şuranın sədri Bekmamat Arstanbekov, “Sosial Sahibkarlar Assosiasiyası” İctimai Birliyinin İdarə Heyətinin sədri Bakytbek Sagınalı və “Gənclərin Sosial-İqtisadi İnkişafına Dəstək” İctimai Birliyinin sədri Əfsəladdin Ağalarov çıxış ediblər.
Əfsəladdin Ağalarov bildirib ki, Azərbaycan və Qırğızıstan Orta Dəhliz layihəsinin formalaşmasında mühüm rol oynayan iki dost və qardaş ölkədir.
“Bu gün Orta Dəhliz dünyanın ən təhlükəsiz logistik marşrutlarından biri hesab olunur. Prezident İlham Əliyev dəfələrlə vurğulayıb ki, bu dəhliz yalnız Türk dünyası üçün deyil, Çinlə Avropa arasında uzanan böyük iqtisadi və nəqliyyat xəttidir. Çindən çıxan məhsullar qısa müddət ərzində Orta Dəhliz vasitəsilə Avropaya çatdırılır və bu marşrut logistika təhlükəsizliyinin əsas təminatçılarından biridir”, – deyə o qeyd edib.
Digər iştirakçılar da dünyada urbanizasiya prosesləri, dayanıqlı şəhərsalma və müasir çağırışların həlli yolları barədə fikir mübadiləsi aparıblar.
Forum çərçivəsində Şimali Kipr–Azərbaycan və Türkmənistan–Azərbaycan forumları da təşkil olunub.
Şimali Kipr–Azərbaycan Forumunda moderator qismində “Azərbaycanlıların və digər Türkdilli Xalqların Əməkdaşlıq Mərkəzi” İctimai Birliyinin sədri İlham İsmayılov çıxış edib.
Paneldə “Zəfər: Şəhid Ailələrinə Dəstək” İctimai Birliyinin sədri Sevinc Əlizadə, Şimali Kiprin Təbliği Platformasının prezidenti Okyay Sadıkoğlu, Türk Kiprli Qadın Sahibkarlar Təşkilatının üzvü Gülnur Sadıkoğlu və Şəhidlər və Qazilər Təşkilatının sədri Buba Barış çıxış ediblər.
Çıxışlarda XXI əsrin Türk əsri olduğu, Türk dünyasında həmrəyliyin və əməkdaşlığın daha da gücləndiyi vurğulanıb.
Türkmənistan–Azərbaycan Forumunda isə moderator qismində “Bakı Politoloqlar Klubu” İctimai Birliyinin sədri Zaur Məmmədov iştirak edib.
Paneldə Türkmənistanda CAREC Layihə Ofisinin direktoru Mergen Kepbanov, “Tebigy Kuwwat” İctimai Birliyinin sədri Bərkəli Atayev və “Taze Zaman” İctimai Birliyinin sədri Mübarək Qurbanova çıxış ediblər.
Forum iştirakçıları Türk Dövlətləri Təşkilatına üzv ölkələr arasında gələcək əməkdaşlıq perspektivləri barədə fikir mübadiləsi aparıblar.
jpg_1782295634.jpg)
