Azərbaycanda qeyri-neft sektorunun inkişafı, sənayeləşmənin dərinləşdirilməsi və yüksək əlavə dəyər yaradan istehsalın genişləndirilməsi dövlətin iqtisadi siyasətinin əsas prioritetləri sırasında yer alır.
AZƏRTAC-ın bölgə müxbiri xəbər verir ki, bu fikirləri iqtisadiyyat nazirinin müavini Səməd Bəşirli Sabirabad rayonunda “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nda pambıqçılıq sahəsində nəzərdə tutulan hədəflərə çatmaq üçün qarşıda duran vəzifələrin müzakirəsi ilə bağlı regional müşavirədə deyib.
Nazir müavini bildirib ki, Azərbaycan Respublikasının Prezidenti İlham Əliyevin rəhbərliyi ilə həyata keçirilən iqtisadi siyasət çərçivəsində regionların iqtisadi potensialının gücləndirilməsi və ixracyönümlü istehsalın genişləndirilməsi istiqamətində ardıcıl tədbirlər təşkil olunur. Bu baxımdan pambıqçılığın inkişafı yalnız aqrar sektorun deyil, həm də emal sənayesinin, ixracyönümlü istehsalın və regional sənaye klasterlərinin inkişafı baxımından strateji əhəmiyyət daşıyır. Səməd Bəşirli qeyd edib ki, son illər yerli xammala əsaslanan emal sənayesinin inkişafı məqsədilə kompleks dəstək mexanizmləri formalaşdırılıb, investisiya mühitinin yaxşılaşdırılması və özəl sektorun təşəbbüslərinin təşviqi istiqamətində mühüm addımlar atılıb. Vergi və gömrük güzəştləri, güzəştli maliyyələşmə alətləri, sənaye zonalarının imkanları və təşviq mexanizmləri pambıq emalı və tekstil sənayesində özəl investisiyaların artmasına əlverişli şərait yaradıb.
Bildirilib ki, dövlət dəstəyi nəticəsində pambıqçılıq və pambıq emalı sahəsində çoxsaylı investisiya layihələri həyata keçirilib, yeni istehsal gücləri yaradılıb, müasir texnologiyaların tətbiqi genişlənib və özəl sektorun investisiya fəallığı əhəmiyyətli dərəcədə artıb.
Nazir müavini vurğulayıb ki, pambıq emalı və tekstil sənayesinin inkişafı üçün müasir sənaye infrastrukturunun yaradılması istiqamətində də mühüm işlər görülüb. Bu məqsədlə yaradılmış Mingəçevir Sənaye Parkı artıq ölkədə tekstil sənayesinin və pambıqəsaslı sənaye klasterinin əsas inkişaf mərkəzlərindən birinə çevrilməkdədir. Səməd Bəşirli əlavə edib ki, həyata keçirilən dövlət siyasəti nəticəsində Azərbaycanda pambıq əsasında mahlıc, iplik, parça və hazır tekstil məhsullarını əhatə edən vahid sənaye dəyər zəncirinin formalaşdırılması istiqamətində mühüm institusional və istehsal bazası yaradılıb.
jpeg_1782301011.jpeg)
