Prezident İlham Əliyevə ictimai etimadın yüksək səviyyədə olmasını şərtləndirən amillər bir neçə istiqamət üzrə qiymətləndirilməlidir. İlk növbədə qeyd etmək lazımdır ki, son illərdə Azərbaycanın milli təhlükəsizliyi və dövlətçiliyi baxımından əldə etdiyi mühüm nəticələr cəmiyyətdə dövlət rəhbərliyinə olan münasibətə ciddi təsir göstərib.
Bu fikirləri AZƏRTAC-a açıqlamasında siyasi şərhçi Elnur Ənvəroğlu bildirib.
Onun sözlərinə görə, xüsusilə 44 günlük Vətən müharibəsində qazanılan tarixi Zəfər, Azərbaycanın ərazi bütövlüyünün və dövlət suverenliyinin tam bərpa olunması müasir Azərbaycan tarixinin ən mühüm hadisələri sırasında yer alır və bu nailiyyətlər Prezident İlham Əliyevin siyasi liderliyi ilə sıx bağlıdır.
“2020-ci ilə qədər Azərbaycan cəmiyyətində Qarabağın işğaldan azad olunması əsas milli ideyalardan biri idi. Qarabağ problemi, erməni işğalı və bunun doğurduğu nəticələr cəmiyyətin milli düşüncəsində xüsusi yer tuturdu. Lakin cəmi 44 gün ərzində öz liderinə inanan xalq və ön cəbhədə qəhrəmanlıq göstərən Azərbaycan Ordusu bu uzun illər davam edən status-kvonu tamamilə dəyişdi. Prezident, Müzəffər Ali Baş Komandan İlham Əliyevin rəhbərliyi ilə qazanılan tarixi Zəfər milli birliyi daha da möhkəmləndirdi, xalqın öz dövlətinə və gələcəyinə inamını gücləndirdi, milli ruhun yüksəlişinə mühüm töhfə verdi. Azərbaycanın beynəlxalq mövqeyinin əhəmiyyətli dərəcədə möhkəmlənməsi də ictimai etimadı gücləndirən əsas amillərdəndir. Son illərdə Azərbaycanın enerji təhlükəsizliyi sahəsində artan rolu, nəqliyyat-logistika layihələrinin uğurla həyata keçirilməsi, Orta Dəhlizin inkişafı, yaşıl enerji istiqamətində irəli sürülən təşəbbüslər və beynəlxalq platformalarda fəal iştirakı ölkəmizin həm regional, həm də qlobal əhəmiyyətini daha da artırıb. Prezident İlham Əliyevin həyata keçirdiyi balanslaşdırılmış və praqmatik xarici siyasət nəticəsində Azərbaycan müxtəlif qlobal güc mərkəzləri ilə qarşılıqlı hörmət və milli maraqlara əsaslanan əməkdaşlıq münasibətləri formalaşdırıb. Cəmiyyət də bunu dövlətin milli maraqlarının qətiyyətlə müdafiəsinin göstəricisi kimi qiymətləndirir”, – deyə siyasi şərhçi qeyd edib.
O deyib ki, iqtisadi sahədə həyata keçirilən ardıcıl islahatlar da dövlətə olan ictimai etimadın formalaşmasında mühüm rol oynayır. Qeyri-neft sektorunun inkişafı, genişmiqyaslı infrastruktur layihələrinin həyata keçirilməsi, rəqəmsal transformasiya prosesinin sürətləndirilməsi, eləcə də işğaldan azad edilmiş ərazilərdə aparılan bərpa və yenidənqurma işləri dövlət siyasətinin konkret nəticələrini nümayiş etdirir. Xüsusilə Böyük Qayıdış proqramının uğurla icrası Azərbaycanın uzunmüddətli inkişaf strategiyasının mühüm istiqamətlərindən biri kimi çıxış edir və dövlətin planlı inkişaf modelini əks etdirir. Mürəkkəb geosiyasi şəraitdə ölkədə sabitliyin və təhlükəsizliyin qorunması da vətəndaşların dövlət institutlarına inamını artıran əsas amillərdən biridir. Qlobal və regional risklərin artdığı, müxtəlif bölgələrdə münaqişələrin davam etdiyi bir dövrdə Azərbaycanın daxili sabitliyi qoruyub saxlaması, təhlükəsizlik siyasətini uğurla həyata keçirməsi və iqtisadi dayanıqlığını təmin etməsi cəmiyyət tərəfindən mühüm üstünlük kimi qiymətləndirilir. Bu amillər insanların gələcəyə inamını möhkəmləndirir və dövlətə olan etimadı daha da artırır.
“Bütün bu amillər dövlət-cəmiyyət münasibətlərinin daha da möhkəmlənməsinə xidmət edir. Vətəndaşlar dövlətin qarşıya qoyduğu strateji məqsədlərin ardıcıl şəkildə həyata keçirildiyini gördükcə, dövlət institutlarına və siyasi rəhbərliyə olan inam daha da güclənir. Bu baxımdan Prezident İlham Əliyevə yüksək ictimai etimad təkcə siyasi amillərlə deyil, eyni zamanda, təhlükəsizlik, iqtisadi inkişaf, sosial sabitlik və Azərbaycanın beynəlxalq nüfuzunun artması kimi bir-biri ilə sıx bağlı olan amillərin məcmusunun nəticəsi kimi qiymətləndirilməlidir”, – deyən Elnur Ənvəroğlu fikirlərini yekunlaşdırıb.
