Prezident İlham Əliyevə ictimai etimadın yüksək səviyyədə olması ilə bağlı açıqlanan son sorğu nəticələri göstərir ki, cəmiyyətdə dövlətimizin başçısının fəaliyyəti geniş dəstək qazanır. Sorğuda Prezident İlham Əliyevə etimad səviyyəsinin 87,7 faiz, fəaliyyətinin müsbət qiymətləndirilməsinin 93,6 faiz, onun alternativsiz siyasi lider kimi qəbul edilməsinin isə 81,9 faiz olması bir sıra amillərlə əlaqələndirilir.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, ilk növbədə, Prezident İlham Əliyevin həyata keçirdiyi siyasətin əsas prioritetini Azərbaycanın milli maraqlarının qorunması təşkil edir. Dövlətimizin başçısının prinsipial mövqeyi, ölkənin milli mənafelərini beynəlxalq müstəvidə ardıcıl müdafiə etməsi, strateji qərarlar qəbul edərkən Azərbaycanın uzunmüddətli inkişafını əsas götürməsi onun fəaliyyətinə verilən yüksək qiymətin başlıca səbəblərindən biri kimi göstərilir.
İctimai etimadın formalaşmasında Prezident İlham Əliyevin xalqla birbaşa ünsiyyətə, vətəndaşların sosial rifahının yüksəldilməsinə və dövlət-vətəndaş münasibətlərinin möhkəmləndirilməsinə yönəlmiş siyasət də mühüm rol oynayır.
"Cəmiyyətdə geniş yayılmış fikrə görə, dövlətimizin başçısı fəaliyyətində xalqın maraqlarını əsas götürür və həyata keçirilən islahatlar ölkənin inkişafına xidmət edir.
Prezident İlham Əliyevin liderlik keyfiyyətləri də ictimai rəydə xüsusi yer tutur. Qətiyyətli idarəçilik, mürəkkəb geosiyasi şəraitdə çevik qərarlar qəbul etmək bacarığı, beynəlxalq platformalarda Azərbaycanın mövqeyini ardıcıl müdafiə etməsi onun həm ölkə daxilində, həm də beynəlxalq aləmdə tanınan siyasi lider kimi qəbul edilməsinə təsir göstərən amillər sırasında qeyd olunur", - deyə N.Həsənov vurğulayıb.
Deputatın sözlərinə görə, son illərdə Azərbaycanın iqtisadi inkişafı, infrastrukturun yenilənməsi, qeyri-neft sektorunun genişləndirilməsi, enerji, nəqliyyat və logistika layihələrinin reallaşdırılması, sosial proqramların həyata keçirilməsi də ölkənin inkişaf dinamikasını müəyyən edən istiqamətlərdəndir. Güclü iqtisadiyyatın və müdafiə potensialının formalaşdırılması isə dövlətin dayanıqlığını artıran mühüm faktorlardır.
Azərbaycanın beynəlxalq münasibətlər sistemində mövqeyinin güclənməsi, müstəqil və balanslaşdırılmış xarici siyasət yürütməsi, regional və qlobal layihələrdə fəal iştirakı da ictimai dəstəyin əsas səbəbləri sırasında göstərilir. Bu siyasətin nəticəsində Azərbaycan Cənubi Qafqazın aparıcı dövlətlərindən biri kimi mövqeyini möhkəmləndirib və beynəlxalq nüfuzunu yüksəldib.
Yüksək etimad göstəricilərinin mühüm səbəblərindən biri kimi 2020-ci ildə baş vermiş 44 günlük Vətən müharibəsində əldə olunan hərbi qələbə və sonrakı dövrdə Azərbaycanın ərazi bütövlüyü və suverenliyinin tam bərpa olunmasıdır. Bu hadisələr ölkənin müasir tarixində dönüş nöqtəsi kimi qiymətləndirilir və dövlət rəhbərliyinin fəaliyyəti ilə əlaqələndirilir.
"Dünyada və regionda müxtəlif münaqişələrin və geosiyasi gərginliklərin artdığı bir dövrdə Azərbaycanda sabitliyin, ictimai təhlükəsizliyin və daxili asayişin qorunması da vətəndaşların mühüm qiymətləndirmə meyarlarından biridir. Sabitlik və təhlükəsizlik iqtisadi inkişafın, sosial rifahın və dövlətin davamlı tərəqqisinin əsas şərtlərindən hesab edilir.
Ona görə də sorğu nəticələri cəmiyyətdə Prezident İlham Əliyevin həyata keçirdiyi siyasətə yüksək ictimai dəstəyin mövcud olduğunu göstərir. Respondentlərin qiymətləndirmələri siyasi sabitliyin qorunması, iqtisadi inkişafın təmin edilməsi, milli maraqların müdafiəsi və dövlətin beynəlxalq mövqeyinin gücləndirilməsi kimi amillərin ictimai rəydə mühüm əhəmiyyət kəsb etdiyini ortaya qoyur", - deyə o əlavə edib.
