Ölkənin əsas kənd təsərrüfatı rayonlarından olan Şəmkirdə cari ilin məhsulu üçün 13 min 909 hektar sahədə taxıl əkini aparılmışdır. Əkin sahələrinin 7 min 135 hektarı suvarılan, 6 min 774 hektarı isə dəmyə torpaqlarıdır. Suvarılan sahələrdə 3 min 202 hektar buğda, 3 min 933 hektar arpa, əlavə olaraq 85 hektar ərazidə isə vələmir əkilmişdir.
Taxıl biçininin mütəşəkkil təşkili və məhsulun itkisiz yığılması üçün rayon icra hakimiyyətində qərargah yaradılmışdır. Qərargahın üzvləri tez-tez biçin aparılan sahələrdə olur, prosesin gedişini yerində izləyir, fermerlər və təsərrüfat rəhbərləri ilə görüşərək mövcud vəziyyətlə maraqlanırlar. Bu zaman biçin kampaniyasının bütün mərhələlərinin operativ şəkildə əlaqələndirilməsi, kombaynların sahələrə vaxtında cəlb olunması, texnika təminatının düzgün təşkili və məhsul yığımında hər hansı gecikmənin yaranmaması məsələləri diqqətdə saxlanılır. Fermerlərlə keçirilən görüşlərdə onların təklif və müraciətləri dinlənilir, biçin prosesinin daha mütəşəkkil təşkili üçün görüləcək tədbirlər müzakirə olunur. Məhsulun vaxtında və itkisiz yığılmasının əhəmiyyəti diqqətə çatdırılaraq, biçin mövsümündə fermerlərin üzləşə biləcəyi çətinliklərin operativ aradan qaldırılması, kombayn təminatı və texnikanın sahələr üzrə düzgün bölgüsü və fermerlərin müraciətlərinə operativ baxılması barədə aidiyyəti qurumlara müvafiq tapşırıqlar verilir.
Əvvəlki illərdə olduğu kimi, bu il də fermerlər zəmilərdə bol məhsul yetişdirmişlər. Cari mövsümdə də əkin sahələrinə aqrotexniki tələblərə uyğun qulluq göstərilmiş, mineral və üzvi gübrələrdən səmərəli istifadə edilmiş, zərərvericilərə qarşı vaxtında mübarizə tədbirləri görülmüşdür. Görülən aqrotexniki tədbirlər məhsuldarlığın artmasına müsbət təsir göstərmişdir.
Məlumat üçün bildirək ki, bizə verilən son məlumata görə, rayon üzrə 5 min 303 hektar sahədə biçin aparılıb. Bunun 1 442 hektarını buğda, 3 min 861 hektarını arpa zəmiləri təşkil edir. Ümumilikdə sahələrdən 19 min 681 ton məhsul (5 min 782 ton buğda, 13 min 899 ton arpa) biçilib. Rayon üzrə orta məhsuldarlıq hələlik 40 sentnerdir.
Sabir ƏLİYEV,
"Azərbaycan"
