Sui-qəsdçilərdən birinin narahat anası polisə vaxtında zəng edib
ABŞ-nin 8 sakini Prezident Donald Trampın doğum günündə Ağ Evin Cənub çəmənliyində keçirilən UFC Freedom 250 tədbiri zamanı qətl və terror aktları törətmək üçün sui-qəsddə ittiham olunub. AP News agentliyinin məlumatına görə, kişilər iki ayrı sui-qəsddə ittiham olunurlar: biri terrorçulara maddi dəstək vermək, digəri isə federal hökumət rəsmisinin qətlini törətmək.
9 iyul ittihamnaməsi işi sadələşdirmək yönündə qaydaya salmaq və təqsirləndirilən şəxsləri vahid sui-qəsd ittihamında birləşdirmək məqsədi güdür. Rəsmilər qrup üzvlərinin marginal sui-qəsd nəzəriyyələrini dəstəklədiklərini və hücumun hökumətin işini qeyri-sabitləşdirəcəyinə ümid etdiklərini deyiblər.
Hücuma hazırlıqlara may ayında - qrup pul, odlu silah, sursat, zirehli geyim, partlayıcı maddələr, dronlar, tibbi avadanlıqlar, rabitə vasitələri və digər əşyalar yığmağa başladığı zaman start verilib.
Təqsirləndirilən şəxslərdən biri müstəntiqlərə idman yarışları məkanında partlayıcı maddələrlə təchiz olunmuş dronları işə salmağı və sonra panikaya düşmüş tamaşaçıları qaçarkən güllələməyi planlaşdırdıqlarını bildirib.
Federal prokurorlar iddia edirlər ki, cinayətkar qrup tədbirdə Donald Trampı, vitse-prezident Cey Di Vensi, digər federal hökumət rəsmilərini, İsrailin Baş naziri Benyamin Netanyahunu, milyarder İlon Maskı və digər yüksək vəzifəli məmurları öldürməyi planlaşdırıb.
Qrupun yeddi üzvü 11-21 iyun tarixləri arasında həbs edilib.
Ağ Evə planlaşdırılan və baş tutmayan hücumun təşkilatçısı meksikalı mühacir Abraham Hermosilyo Alvares hesab olunur. O, Nebraskada saxlanılıb. Qalan şübhəlilər Ohayo, Missuri, Kaliforniya və Vaşinqtonda həbs ediliblər. Bu həftə ittiham olunan şəxslərin sırasına 21 yaşlı Qərbi Virciniyanın 21 yaşlı sakini qoşulub.
FTB planlaşdırılan hücum barədə turnirdən dörd gün əvvəl sui-qəsdçilərdən birinin narahat anasının polisə zəng etməsindən sonra məlumat əldə edib.
Rizvan CƏFƏROV,
"Azərbaycan"
