İkinci Qarabağ müharibəsi şəhidi Vüqar İlham oğlu Babayev 4 iyul 2001-ci ildə Bakının Köhnə Günəşli massivində - Xətai rayonunda adi bir ailədə dünyaya göz açıb. Atalarını erkən itirən İlqar və ondan 7 yaş kiçik Vüqarı anaları Sevil xanım boya-başa çatdırıb.
Dayısı da hərbçi olan Vüqar hələ kiçik yaşlarından yetkin düşüncəsi, ağlı ilə nümunəvi uşaq olub. 5 yaşı olanda deyib ki, dayım kimi hərbçi olacağam, şəhid olub ailəmizin başını uca edəcəyəm. Sidq-ürəkdən ibadət edər, oruc tutarmış. Kasıbçılıqla böyüsə də, Kərbəla ziyarətinə getmişdi. Qardaşı İlqar onu kiçik qardaşı deyil, böyük qardaş hesab edir, ona güvənirdi. 18 yaşında əsgərliyə gedəndə deyib ki, Mübariz İbrahimov kimi igidlik göstərməyi arzulayır. 2020-ci ilin 27 sentyabrında antiterror əməliyyatı başlayanda xidmət etdiyi hərbi hissədə komandirlərinin böyük etimadını qazanmış bir çavuş kimi döyüşə başlamışdı. Komandirini qoruma mövqeyində düşmənin snayper gülləsinə tuş gələn Vüqar oktyabrın 2-də Füzuli istiqamətində gedən ölüm-dirim savaşında şəhidlik zirvəsinə ucaldı. Ölümündən sonra Ali Baş Komandan, Prezident İlham Əliyevin müvafiq sərəncamları ilə "Vətən uğrunda", "Cəsur döyüşçü", "Füzulinin azad olunmasına görə" medalları ilə təltif edilib. Məzarı Bakıda, İkinci Fəxri xiyabandadır. Hər il ad günündə və anım günündə ailə üzvləri, qonşular, məhəllə sakinləri, dostları qəbrini gül-çiçəyə qərq edirlər.
Ölkəmizdə şəhidlərin xatirəsi uca tutulur. Ailə üzvləri dövlət qayğısı ilə əhatə olunur. Lənkəran şəhərində şəhid ailələri üçün tikilmiş binada Vüqarın anasına da ev verilib və Sevil xanım Lənkəranda müvafiq işlə təmin edilib. Axı Vüqargilin ailəsi əslən Lənkərandandır. Sentyabrın 10-da Lənkəran Şəhər İcra Hakimiyyətinin başçısı Taleh Qaraşov Vətən uğrunda canından keçmiş şəhid Babayev Vüqar İlham oğlunun anası Babayeva Sevil Qulam qızı ilə görüşüb. İcra başçısı şəhid anasını Lənkəran şəhərindəki yeni mənzilində ziyarət edib.
Ziyarət zamanı şəhid ailəsinin qayğı və problemləri ilə yaxından maraqlanan Taleh Qaraşov dövlətin hər zaman şəhid ailələrinin yanında olduğunu, onlara göstərilən diqqət və qayğının prioritet təşkil etdiyini vurğulayıb.
Şəhid anası Sevil Babayeva da öz növbəsində onlara göstərilən davamlı dəstəyə görə, ölkə rəhbərliyinə minnətdarlığını bildirib. O, Prezident İlham Əliyev və Birinci vitse-prezident Mehriban xanım Əliyevanın xüsusi diqqətini hər zaman hiss etdiklərini qeyd edərək Ali Baş Komandana və dövlətimizə dərin təşəkkürünü ifadə edib.
Seyran QUBADOĞLU,
"Azərbaycan"
