Qusar rayonunda “Aqrar sahədə dövlətin dəstək mexanizmləri” mövzusunda panel müzakirəsi təşkil olunub.
Bu barədə AZƏRTAC-a Kənd Təsərrüfatı Nazirliyindən məlumat verilib.
Bildirilib ki, nazirliyin Aqrar İnnovasiya Mərkəzi tərəfindən təşkil olunan panel müzakirəsi “Aqrar Biznes Festivalı” və “I İntensiv Meyvə Bağları Festivalı” çərçivəsində keçirilib.
Panel müzakirəsinin əsas məqsədi fermer və sahibkarların aqrar sahədə tətbiq olunan dövlət dəstəyi mexanizmləri, maliyyələşmə imkanları, kredit və subsidiya alətləri, aqrar sığorta və digər xidmətlər barədə məlumatlandırılması, onların qarşılaşdıqları məsələlərin müzakirəsi və iştirakçıların maraq doğuran məsələlər ətrafında fikir mübadiləsinin aparılması olub.
Rəsmi açılışda Qusar Rayon İcra Hakimiyyətinin başçısı Sahir Məmmdəxanov, kənd təsərrüfatı nazirinin müavini Seymur Səfərli, Aqrar İnnovasiya Mərkəzinin direktoru Anar Cəfərov və Azərbaycan Biznesinin İnkişafı Fondunun sədr müşaviri Namiq Zeynalov çıxış ediblər.
Müzakirələr zamanı “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”nın əsas hədəfləri diqqətə çatdırılıb. Aqrar sahənin dayanıqlı və rəqabətqabiliyyətli inkişafının təmin edilməsi, məhsuldarlığın artırılması, müasir və innovativ texnologiyaların tətbiqinin genişləndirilməsi, maliyyə resurslarına çıxış imkanlarının yaxşılaşdırılması və aqrobiznesin inkişafının dəstəklənməsi istiqamətində müəyyən edilmiş prioritetlər barədə fikir mübadiləsi aparılıb.
Panel müzakirəsində kənd təsərrüfatı nazirinin müavini Seymur Səfərli, nazirliyin Bitkiçiliyin təşkili və monitorinqi şöbəsinin müdiri Pərviz Yusifov, Azərbaycan Biznesinin İnkişafı Fondunun sədrinin müşaviri Namiq Zeynalov, Aqrar Sığorta Fondunun şöbə müdiri Əli Əhmədov və “Unibank” MMC-nin Quba filialının müdiri Qadir Seyfullayev spiker qismində iştirak ediblər.
Müzakirə zamanı meyvəçilik və intensiv bağçılıq sahəsinin inkişafı ilə bağlı məsələlər diqqət mərkəzində olub. Fermer və sahibkarların müasir texnologiyaların tətbiqi, təsərrüfatların inkişafı, maliyyələşmə və sığorta imkanlarından istifadə ilə bağlı sualları cavablandırılıb.
Panel çərçivəsində kənd təsərrüfatı istehsalçılarının aqrar sığorta mexanizmindən yararlanma imkanları, kredit və subsidiya mexanizmləri, Azərbaycan Biznesinin İnkişafı Fondunun maliyyə dəstəyi istiqamətləri, həmçinin bank sektorunun aqrar sahədə təqdim etdiyi maliyyələşmə imkanları barədə məlumatlar iştirakçıların diqqətinə çatdırılıb.
Tədbirdə dövlət dəstəyi mexanizmlərindən daha səmərəli istifadə, maliyyə resurslarına və aqrar xidmətlərə çıxışın genişləndirilməsi, təsərrüfatların risklərdən qorunması və meyvəçilik sahəsində istehsal imkanlarının artırılması ilə bağlı məsələlər önə çəkilib.
Qusar rayonunda keçirilən “Aqrar Biznes Festivalı”, “I İntensiv Meyvə Bağları Festivalı” və panel müzakirə çərçivəsində ölkənin müxtəlif bölgələrindən 70-dən artıq meyvəçilik təsərrüfatı subyekti, fermer və sahibkar iştirak edib. Təmsil olunan təsərrüfatların meyvə bağlarının ümumi sahəsi 10 min hektara yaxın olub.
