Rəvan Qaçayevin ən böyük arzusu Məcnun obrazını canlandırmaqdır
"Heydər Əliyev Fondunun dəstəyi ilə 2005-ci ildən keçirilən Muğam Televiziya Müsabiqəsi zamanı istedadlı gənc xanəndələr kəşf olunur. Bu müsabiqəyə qatılan ifaçılar ustadların qarşısında çıxış edir, özlərini inkişaf etdirmək və tanıtdırmaq şansı qazanırlar. Sonra da həmin gənclər fəaliyyətlərini muğam sahəsində davam etdirirlər. Bu müsabiqə bizlərə yeni imkanlar yaratdı, həm ölkədə tanındıq, həm də gələcək uğurlarımıza bir vəsilə oldu. Fondun kollektivinə, şəxsən mədəniyyətin, sənətin hamisi, Birinci vitse-prezidentimiz Mehriban xanım Əliyevaya, müsabiqənin təşkilində zəhmət çəkənlərə sonsuz təşəkkürümüzü bildiririk!"
VII Muğam Televiziya Müsabiqəsinin qaliblərindən biri, "Səs Azərbaycan. Doğma nəğmələr" müsabiqəsinin finalçısı, istedadlı xanəndə Rəvan Qaçayev bizimlə söhbətinə yaradıcı gəncləri daim diqqətdə saxlayan dövlətimizin rəhbərliyinə minnətdarlıqla başlayır. İstedadlı sənətçi musiqinin müxtəlif janrlarında - muğam, aşıq mahnıları və estradada sevilən ifalar təqdim edib. Hansına daha çox üstünlük verdiyi və gələcəkdə həmin istiqamətdə püxtələşəcəyi sualına isə cavab verməkdə çətinlik çəkir: "Sözün düzü, bu sualın cavabını hələ tam dəqiqləşdirə bilməmişəm. Hər üç janrda özümü sınamışam və düşünürəm ki, uğurlu alınıb. Seçimdə həmişə tərəddüd etsəm də, muğam bizlərə daha doğmadır. Muğam bəşərin bütün emosiyalarını ifadə edir. Muğamda bütün duyğular əks olunub. Sakitlik, həyəcan, sevinc və digər hissləri özündə birləşdirən muğamın gözəlliklərini saymaqla bitməz. Mənə görə muğam başdan-başa insanın yaşantılarını əks etdirir".
Rəvan əslən qarabağlıdır, Şamaxıda musiqiçi ailəsində dünyaya göz açıb. Bu sənətə marağı da elə ailədə yaranıb. Atası qarmon ifaçısı olub. Qohumları və yaxınları arasında tanınmış musiqiçilər, aşıqlar var. Onlardan Aşıq Mahmud Ələsgəroğlu, Aşıq Əvəz Hacıyev, Abgül Mirzəliyev, Camal Dadaşov, Aşıq Vüqar Mahmudoğlu və başqalarının adını çəkir. İlk müəllimi də atasıdır: "Bir gün evdə zümzümə edən zaman atam dinlədi və həmin gündən bəri daim mənimlə məşğul oldu. Özümün də musiqiyə həvəsim çox idi. Əvvəlcə kiçikhəcmli muğamları, dərslik üçün başlanğıc sayılan "Bayatı-kürd" muğamını öyrənməyə başladım. Sonra V sinifdə təhsil alanda çox gözəl xanəndə, dəyərli pedaqoq Sabir Abdullayevlə birlikdə hazırlaşdıq. Onun sayəsində artıq üç muğamı tam formada öyrənmişdim. Yaşım bir az artdıqdan sonra Bülbül adına Orta İxtisas Musiqi Məktəbində Əməkdar müəllim Qəzənfər Abbasovun dərslərinə qatıldım. Musiqi həyatım da elə məhz buradan başladı".
R.Qaçayev kiçik yaşlarından bir çox ölkədaxili və beynəlxalq müsabiqələrdə iştirak edib. Müsabiqələrin birində isə çox maraqlı bir hadisə ilə qarşılaşıb: "2010-cu ildə xarici ölkələrdən birinə gedəndə elə oldu ki, tədbirimiz kilsədə keçirildi. "Buta" adlı layihə çərçivəsində tədbirdə mənə yaxınlaşıb azanı bilib-bilmədiyimi soruşdular. Bizdə ailədə hər kəs dinə bağlı olduğu üçün mən də azanı mənimsəmişdim. Xahiş etdilər ki, azan oxuyum. Son dərəcə həvəslə oxudum və hər kəs tərəfindən böyük maraqla qarşılandı. Tədbirdə vurğulandı ki, belə bir hadisə tarixdə ilk dəfə yaşanır. Həmin tədbirdə Xalq artisti Elşən Mansurov, Əməkdar artistlər Ehtiram Hüseynov, Arzu Əliyeva və Növrəsli qardaşları da iştirak edirdilər".
Muğam müsabiqələri zamanı da maraqlı hadisələr çox olub: "Mənim üçün ən yaddaqalan isə müsabiqənin finala keçid həftəsində yaşadığım an idi. Həmin gün çox həyəcanlı idim və səhnəyə çıxıb "Dəşti" muğamını oxudum. Bu, uğurlu ifa oldu. "Dəşti"ni Azərbaycanda dəsgah şəklinə salan ustad Əlibaba Məmmədov bunu yüksək qiymətləndirdi. Tamaşaçıların alqışları, münsiflər heyətinin xoş sözləri hələ də qulaqlarımdadır. Deyə bilərəm ki, həmin gün mənim sənət həyatımda unudulmayacaq tarixi an yaşandı".
Rəvan lap kiçik yaşlarından evdə atasının məsləhəti ilə Cabbar Qaryağdıoğlu, Seyid Şuşinski, Ağabala Abdullayev, Rübabə Muradova, Hacıbaba Hüseynov, Qədir Rüstəmov, Alim Qasımov, Şövkət Ələkbərova kimi sənətkarların lent yazılarını dinləyib. Bu ölməz sənətkarlarımızın məlahətli səsləri uşaq qəlbində yeni ovqat yaradıb, bir növ ruhunun qidasına çevrilib. Ən böyük arzusu isə Opera və Balet Teatrında hansısa bir rolu oynamaqdır: "Fikrimcə, rolun böyüyü, kiçiyi olmur. Bir obrazı səhnədə peşəkar formada nümayiş etdirmək daha önəmlidir. Təbii ki, arzum səhnədə Məcnun rolunu canlandırmaqdır. Düşünürəm ki, özümü düzgün istiqamətdə formalaşdırmaq üçün daim çalışmalıyam". Gənc və istedadlı xanəndəyə sənətdə daha böyük zirvələrin fəthini arzulayırıq!
Qurban MƏMMƏDOV,
"Azərbaycan"
