Hazırda Türk Dövlətləri Təşkilatı çərçivəsində əməkdaşlıq 60-dan çox istiqamət üzrə inkişaf edir və onların əhəmiyyətli hissəsi iqtisadiyyatla bağlıdır.
Bunu Türk Dövlətləri Təşkilatının (TDT) Baş katibi Kubanıçbek Ömüralıyev AZƏRTAC-ın müxbirinə müsahibəsində deyib.
Onun sözlərinə görə, iqtisadi əlaqələrin möhkəmləndirilməsində TDT-nin tabeliyində fəaliyyət göstərən strukturlar, xüsusilə Türk Dövlətləri Ticarət və Sənaye Palatası da mühüm rol oynayır. Digər vacib mexanizmlərdən biri bu il fəaliyyətə başlayan Türk İnvestisiya Fondudur. Fondun kapitalı 600 milyon dollar təşkil edir.
“Bütün bu qurumlar ölkələrimiz arasında iqtisadi əməkdaşlığın daha sistemli və səmərəli şəkildə inkişaf etdirilməsi üçün əlavə imkanlar yaradır. Ölkələrimizin ümumi xarici ticarət dövriyyəsi təxminən 1,2 trilyon dollar təşkil edir. Cəmi üç-dörd il əvvəl TDT dövlətləri arasında qarşılıqlı ticarətin payı təxminən 3 faiz idisə, bu gün həmin göstərici 7 faizə çatıb. Yaxın gələcəkdə bu göstəricinin 10 faizə yüksələcəyini gözləyirik. Bu, ölkələrimiz arasında iqtisadi əlaqələrin möhkəmləndiyini əyani şəkildə göstərir”, – deyə o qeyd edib.
Onun sözlərinə görə, iqtisadi-ticari əlaqələrin daha da genişləndirilməsinə xidmət edən normativ-hüquqi bazanın təkmilləşdirilməsi istiqamətində də paralel olaraq iş aparılır: “Xüsusilə də elektron ticarət sahəsində saziş ratifikasiya edilib. Bunun praktiki həyata keçirilməsinin qarşılıqlı ticarətin həcminin daha da artmasına imkan verəcəyi gözlənilir”.
Rəqəmsal transformasiya şəraitində əməkdaşlığın perspektivlərinə toxunan K.Ömüralıyev Təşkilat çərçivəsində rəqəmsal texnologiyaların inkişafına xüsusi diqqət yetirildiyini vurğulayıb.
“Türküstanda keçirilmiş sammitin əsas mövzularından biri rəqəmsallaşma və süni intellekt olub. Bu, dövlətlərimizin və bütövlükdə Təşkilatın rəqəmsal transformasiyanı əməkdaşlığın prioritet istiqamətlərindən biri hesab etdiyini göstərir. Artıq bir sıra birgə təşəbbüslər həyata keçirilir. Perspektivli istiqamətlərdən biri kosmik sahədə əməkdaşlıq, o cümlədən birgə peyk layihəsi üzərində işdir”, – deyə o əlavə edib.
Baş katib rəqəmsal infrastrukturun inkişaf etdirilməsinin və TDT dövlətləri arasında əlaqələrin möhkəmləndirilməsinin vacibliyinə də diqqət çəkib. Bu kontekstdə o, Azərbaycanla Qazaxıstan arasında Xəzər dənizinin dibi ilə rabitə xəttinin çəkilməsi ilə bağlı layihəni qeyd edib. Onun fikrincə, layihənin həyata keçirilməsi regionda rəqəmsal qarşılıqlı əlaqə imkanlarının genişlənməsinə şərait yaradacaq.
Orta Dəhlizin potensialından maksimum səmərəli istifadə etmək məqsədilə uzunmüddətli əməkdaşlığın perspektivlərinə toxunan K.Ömüralıyev bildirib ki, son illərdə bu nəqliyyat marşrutunun rolu əhəmiyyətli dərəcədə artıb. Zəngəzur dəhlizi və Çin-Qırğızıstan-Özbəkistan dəmir yolu da daxil olmaqla, yeni nəqliyyat əlaqələrinin inkişafı sayəsində Orta Dəhlizin imkanları genişlənəcək. Bu isə marşrutun ötürücülük qabiliyyətinin və daşınan yüklərin həcminin artırılmasına imkan verəcək: “Əslində, söhbət tarixi İpək Yolunun müasir dövrdə yenidən canlanmasından gedir. Ölkələrimiz və bütövlükdə region əsrlər boyu Asiya ilə Avropa arasında əlaqələrin təmin olunmasında mühüm rol oynayıb. Bu gün həmin potensial yenidən strateji əhəmiyyət kəsb edir. Məhz buna görə biz nəqliyyat əməkdaşlığının və Orta Dəhlizin gələcək inkişafında böyük perspektivlər görürük”.
