Madridin "Mandala Ediciones" nəşriyyatı müasir Azərbaycan dövlətinin qurucusu, dünyaşöhrətli siyasi xadim Heydər Əliyevin 100 illiyi münasibətilə Dövlət Tərcümə Mərkəzinin ispan dilində ərsəyə gətirdiyi "Görkəmli insanların həyatı - Heydər Əliyev" kitabını nəşr edib.
Hüseynbala Mirələmov və Viktor Andriyanovun müəllifi olduqları kitab ilk dəfə 2005-ci ildə rus dilində Moskvada "Molodaya qvardiya" nəşriyyatında işıq üzü görüb.
"Mən Naxçıvanda doğulmuşam…", "Bura da bir cəbhədir", "Heydər və Zərifə", "Bu peşəni yeniyetmə vaxtlarından seçmişəm", "Respublikanın rəhbəri", "Sən bütün ittifaqa lazımsan", "Mən insanam, daşdan, dəmirdən deyiləm", "Xalqıyla birlikdə olmaq haqqı", "Doxsan üçüncü", "Dünya siyasətində Azərbaycan nefti", "Günəş dənizdən doğur", "Prezident ili", "Dünyanın gözündə" adlı on üç fəsildən ibarət kitabın ispan dilinə tərcümə müəllifləri salvadorlu dilçi-alim, professor Sesar Edqardo Martines Flores və Dövlət Tərcümə Mərkəzinin ispan dili mütəxəssisi Nərmin Hüseynlidir.
Sözügedən kitab İspaniyanın Milli Kitabxanası ilə yanaşı, Valensiya Mədəniyyət Evinin, Madrid Komplutense Universitetinin, Barselona Universitetinin, Alkala Universitetinin, Kral Tarix Akademiyasının kitabxanalarına, Mario Varqas Lyosa adına, Qabriel Qarsiya Markes adına, San Blas, Aluçe, Migel Delibes adına, Pablo Neruda adına, Euxenio Trias adına, Kaniyexas, San Fermin, Damaso Alonso adına, Fransisko İbanez adına, Xerardo Diego adına, Qloriya Fuertes adına, Pio Baroxa adına, Ana Maria Matute adına, Benito Perez Galdos adına, David Gistau adına, İvan de Vargas adına, Xose İerro adına dövlət kitabxanalarına da yerləşdirilib.  

"Azərbaycan"