Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalını ADA Universiteti və Mərkəzi Bank birlikdə həyata keçirir. Olimpiadada 70 ölkədən 140 komanda iştirak edir. Bunlar informasiya texnologiyaları, o cümlədən kompüter elmləri sahəsinin ən aparıcı tələbələridir. Onlar gələcəkdə informasiya texnologiyaları sənayesində, böyük şirkətlərdə çalışan mütəxəssislər, mühəndislər, proqramçılar olacaqlar. Bu yarışın ölkəmizdə keçirilməsi Azərbaycanın imicinin daha da yüksəlməsinə səbəb olacaq, eyni zamanda, informasiya texnologiyaları sənayesinin inkişafına kömək edəcək.
AZƏRTAC xəbər verir ki, bunu jurnalistlərə açıqlamasında ADA Universitetinin prorektoru, Milli Məclisin deputatı Fariz İsmayılzadə deyib.
O bildirib ki, yarış Azərbaycanda gənc nəsil proqramçıların yetişdirilməsinə və inkişafına təsir göstərəcək. “Yarışı “Google”, “Microsoft”, “OpenAI” və digər şirkətlər izləyir, onlar buradakı iştirakçıları işə götürürlər. Beləliklə, bu şirkətlərin Azərbaycanla əlaqələri güclənir. Ölkəmizdə gələcəkdə həmin şirkətlərin mərkəzləri, tədqiqat, elmi bazaları yaradıla bilər. Bu da nəticədə Azərbaycanda informasiya texnologiyaları sahəsinin inkişafına dəstək olacaq. Ümumiyyətlə, bizim iqtisadi inkişafımıza dəstək verəcək bu olimpiada 5 gün keçirilir. 5 gündən sonra qaliblərin adlarını biləcəyik. Komandamız regional yarışmalarda qalib olmuşdu, amma bu, dünya yarışmasıdır. Gözləntilərimiz çoxdur, ancaq onu da nəzərə alaq ki, keçənilki qaliblər arasında Sinqapur, Pekin, Honkonq universitetləri var. Yəni, burada rəqabət çox böyükdür. Ümid edək ki, tələbələrimiz yaxşı nəticə göstərəcəklər”, - deyə F.İsmayılzadə əlavə edib.
jpg_1790976482.jpg)
