Bu gün Azərbaycan Prezidenti İlham Əliyevin adı, fəaliyyəti və siyasəti inkişaf və sabitlik anlayışları ilə assosiasiya olunur. Dövlət başçısının siyasi portretini tamamlayan cizgilər sırasında onun həm müdrik dövlət xadimi, həm də uğurlu siyasətçi imici xüsusi yer tutur.
Milli Məclisin deputatı Sevinc Fətəliyeva qəzetimizə açıqlamasında deyib ki, Azərbaycan Prezidenti ölkənin geosiyasi mövqeyindən, ərazi xüsusiyyətlərindən, əhali sayından və digər faktorlardan asılı olmayaraq, öz strateji iradəsi əsasında müstəqil siyasət yeridə biləcəyini əyani şəkildə - əməli fəaliyyəti ilə sübuta yetirib. Bu səbəbdən də dövlət başçısının beynəlxalq müstəvidə nüfuzu davamlı olaraq yüksəlir. "Buna Davos İqtisadi Forumu çərçivəsində keçirilən görüşlərdə və tədbirlərdə bir daha şahid olduq. Xüsusilə "Avrasiyanın iqtisadi özünəməxsusluğunun müəyyənləşdirilməsi" mövzusunda keçirilən panel iclasında səsləndirilən fikirlər bunları təsdiqləyir. Panel iclasında Prezident İlham Əliyevlə yanaşı, Serbiya Prezidenti Aleksandar Vuçiç, Türkiyədən "Limak Holdinq"in İdarə Heyətinin sədri Ebru Özdəmir və Ermənistan prezidenti Vaaqn Xaçaturyan da iştirak edirdilər. İclasda Cənubi Qafqazda sülh prosesi də diqqət mərkəzində olub. Ölkəmizin rəhbəri sülh prosesi ilə bağlı bildirib ki, əldə olunan nəticə, həqiqətən, Ermənistanın, Azərbaycanın və Cənubi Qafqazın xeyrinədir. Maraqlı məqam odur ki, Ermənistan prezidenti fikirlərini bildirərkən dəfələrlə cənab İlham Əliyevə istinad edib və onunla razı olduğunu söyləyib. O, Azərbaycan Prezidenti İlham Əliyevin "gələcək bizdən asılıdır" fikri ilə tam razı olduğunu deyərək qeyd edib ki, ölkələrimizin liderləri öz siyasi iradələrini qətiyyətlə nümayiş etdirirlər: "Prezident İlham Əliyevin söylədiyi kimi, biz siyasi qətiyyəti sülh üçün nümayiş etdirdik ki, artıq bundan sonra əməli tədbirlər sülhü sübut etsin, təsdiq etsin". Vaaqn Xaçaturyan Prezident İlham Əliyevə təşəkkür də edib", - deyə Sevinc Fətəliyeva bildirib.
Deputat qeyd edib ki, torpaqlarımızı 30 il işğal altında saxlamış bir ölkənin prezidentinin belə fikirlər söyləməsi təsadüfi deyil. Bunun səbəbi Prezident İlham Əliyevin qətiyyəti və gücüdür. Prezident İlham Əliyevin liderliyi ilə Azərbaycanın ərazi bütövlüyünün və suverenliyinin tam bərpa olunması dövlətimizin gücünü Ermənistanla yanaşı, bütün dünyaya nümayiş etdirdi.
S.Fətəliyevanın sözlərinə görə, Prezident İlham Əliyevin hərbi, siyasi, diplomatiya sahəsində və informasiya-təbliğat müstəvisində strategiyasının uğurlu nəticələri təkcə Azərbaycanın tarixi zəfərində öz əksini tapmayıb: "Cənab İlham Əliyevin yüksək liderlik keyfiyyətləri və qətiyyətli mövqeyi fonunda həyata keçirilən strateji kursun nəticəsində həm də çox mühüm geostrateji reallıqlar yaranıb. Bu reallıqlar, ilk növbədə, Azərbaycan dövlətinin gücünün göstəricisi olmaqla yanaşı, ölkəmizə tərəqqi, regiona rifah və inkişaf vəd edir. Azərbaycan Prezidentinin strateji təşəbbüsləri özündə həm tarixi ənənələri, həm mənəvi dəyərləri, həm siyasi reallıqları, həm də milli maraqları ehtiva edir. Bu amillər dünya ölkələrini də İlham Əliyev faktoru ilə hesablaşmağa təşviq edir".
Deputat bildirib ki, Prezident İlham Əliyevin güclü siyasi xadim olduğunu bir çox ölkənin liderləri də etiraf edirlər. Buna nümunə olaraq, Davosda Serbiyanın Prezidenti Aleksandar Vuçiçin fikirlərini göstərmək olar. O deyib: "Prezident İlham Əliyevin söylədiyi fikirlərlə bağlı bir mövqe var: o, həqiqətən də, müasir dünyada böyük, dahi liderlərdən biridir və indiki dövrdə belə bir lideri çox nadir halda görmək olur. Bunun çox böyük təsir effekti var və bu danılmamalıdır. Bəli, biz müasir Azərbaycanı görürük".
S.Fətəliyeva sonda vurğulayıb ki, Prezident İlham Əliyevin böyük şəxsiyyət və güclü lider olduğu beynəlxalq müstəvidə də tam qəbul edilir. Azərbaycan xalqı olaraq öz liderimizlə qürur duyuruq.
Əsmər QARDAŞXANOVA,
"Azərbaycan"
