Yanvarın 21-də Ankarada Azərbaycan Respublikasının elm və təhsil naziri Emin Əmrullayev ilə Türkiyənin milli təhsil naziri Yusuf Tekin arasında görüş keçirilib.
AZƏRTAC-la söhbətində Azərbaycanın elm və təhsil naziri bildirib ki, görüşdə qardaş ölkələr arasında təhsil sahəsində, o cümlədən orta və peşə ixtisası təhsili səviyyəsində əməkdaşlığın dərinləşdirilməsi yolları müzakirə olunub.
Nazir xatırladıb ki, Prezident İlham Əliyevin Sərəncamına uyğun olaraq Azərbaycanda yeni peşə təhsili müəssisələri yaradılacaq. “Türkiyənin milli təhsil naziri ilə görüş zamanı pedaqoji kadrların hazırlanması, həmçinin peşə təhsili sistemində tədris proqramlarının mübadiləsi və Azərbaycanın tələblərinə uyğunlaşdırılması məsələlərini müzakirə etdik”, – deyə E.Əmrullayev qeyd edib.
Onun sözlərinə görə, müzakirələrin ayrıca bəndlərindən biri də “Böyük Qayıdış” proqramına uyğun olaraq Qarabağ regionunda inşa edilmiş məktəblərin qardaş Türkiyənin təhsil müəssisələri ilə əməkdaşlığının qurulması olub.
Bundan əlavə, səfərin gündəliyinə Azərbaycanın təhsil sisteminə uyğun fəaliyyət göstərəcək məktəbin İstanbulda açılması məsələsi də daxil edilib. “Bu məktəbin açılışı cari ilin sentyabr ayında gözlənilir”, – deyə nazir bildirib və məktəb üçün torpaq sahəsinin Türkiyə hakimiyyəti tərəfindən ayrıldığını xatırladıb.
E.Əmrullayev Qarabağ Universiteti ilə İstanbul Texniki Universiteti arasında əməkdaşlıq haqqında Memorandumun əhəmiyyətini vurğulayıb. Memoranduma uyğun olaraq artıq növbəti tədris ilindən etibarən Xankəndidə mühəndis ixtisasları üzrə tədris prosesinin başlanması planlaşdırılır. “Memoranduma əsasən müəllim və tələbə mübadiləsi həyata keçiriləcək. Bu razılaşma həm Qarabağ Universiteti, həm də bütövlükdə Azərbaycanın təhsil sistemi üçün müsbət addım olacaq”, – deyə o, əlavə edib.
Nazir həmçinin Ankarada aparılan danışıqların gündəliyində Ankara Universiteti və Hacəttəpə Universiteti kimi aparıcı ali təhsil müəssisələri ilə əməkdaşlığın dərinləşdirilməsi məsələsinin də yer aldığını bildirib.
jpg_1768206707.jpg)
