Azərbaycanın bu gün sərgilədiyi inkişaf modeli sübut edir ki, milli maraqlara söykənən daxili sabitlik, həm iqtisadi inkişafın, həm də qlobal etimadın ən etibarlı təminatıdır. Hazırkı dünya nizamında dövlətlərin gücü təkcə onların iqtisadi potensialı, hərbi qüdrəti ilə deyil, həm də daxili sabitliyi qorumaq və sülh yaratmaq bacarığı ilə ölçülür. Bu gün geosiyasi kataklizmlərin, müharibələrin və daxili iğtişaşların girdabında boğulan bir çox coğrafiyanın fonunda Azərbaycan sürətlə inkişaf edən, təhlükəsiz və etibarlı dövlət olaraq diqqət çəkir.
Prezident İlham Əliyevin VII çağırış Milli Məclisin ilk iclasındakı tarixi çıxışı zamanı bəyan etdiyi fikirlər də ölkəmizin bu strateji kursunu dolğunluğu ilə əks etdirir: "Azərbaycanda təhlükəsizlik, əmin-amanlıq uzun illərdir təmin edilir, sabitlik bütün dünya üçün nümunə ola bilər. Hər kəs bilir ki, əgər sabitlik olmasa, heç bir ölkə inkişaf edə bilməz. Bu gün sabitliyi pozulan ölkələrin vəziyyətini və aqibətini hər kəs yaxşı görür. Bu, təhlükəsizliyin, inkişafın, xarici sərmayənin cəlb edilməsi üçün başlıca şərtdir. Bizim təhlükəsizliklə bağlı bütün digər tədbirlər lazımi səviyyədə təmin edilir. Azərbaycan güclü dövlətdir və ildən-ilə bizim gücümüz artmaqdadır".
Etibarlı tərəfdaşlıq
Prezidentin bu bəyanatı Azərbaycanın milli gücünü, dünya nizamında tutduğu nümunəvi yerini və rolunu bir daha gözlər önünə sərir. Bu gün Cənubi Qafqazda hökm sürən de-fakto sülh şəraiti məhz Qarabağda qazanılan möhtəşəm Zəfərin məntiqi nəticəsidir. Azərbaycan öz ərazi bütövlüyünü və suverenliyini təmin etməklə həm də regionda yeni əməkdaşlıq və inkişaf erasının təməlini qoydu. Üç onillik ərzində münaqişədən, müharibədən əziyyət çəkən bölgə indi yenidən dirçəlir və gələcək rifaha doğru əmin addımlar atır. Azərbaycanın yürütdüyü balanslı və milli maraqlara söykənən xarici siyasət onu beynəlxalq arenada güvənilən tərəfdaş statusuna yüksəldib. Təsadüfi deyil ki, ölkəmiz bu gün Şərqlə Qərbin, Şimalla Cənubun kəsişməsində yerləşən ən etibarlı logistik mərkəz adını daşıyır. Trans-Xəzər Beynəlxalq Nəqliyyat Marşrutunun (Orta dəhliz) mərkəzi hissəsi olan Azərbaycanın bu qlobal tədarük zəncirinin bərpasındakı rolu diqqət mərkəzindədir. Vaşinqton Sammitində Zəngəzur dəhlizinin (TRIPP -The Trump route for international peace and prosperity) açılması ilə bağlı əldə olunan razılaşma regionun iqtisadi gələcəyinə mühüm töhfədir və kommunikasiyaların bərpası ümumi rifaha xidmət edir.
Enerji təhlükəsizliyi məsələsində isə Azərbaycan artıq Avropanın enerji xəritəsini yenidən formalaşdıran aktor kimi çıxış edir. Hazırda Avropa İttifaqının 10 üzv dövlətinin ölkəmizdən qaz alması rəsmi Bakının qlobal enerji arxitekturasındakı rolunu göstərir. Lakin Azərbaycanı cəlbedici edən təkcə onun təbii və bərpaolunan sərvətləri, mühüm geostrateji mövqeyi deyil, həm də malik olduğu sarsılmaz sabitlik mühitidir. İnvestorlar üçün "təhlükəsiz ada" funksiyasını yerinə yetirən ölkəmiz, ABŞ-dən Çinə qədər dünya nəhəngləri ilə strateji əməkdaşlıq qurmağa nail olub. Ötən il Prezident İlham Əliyevin Çinə dövlət səfəri zamanı Hərtərəfli strateji tərəfdaşlıq haqqında Birgə Bəyannamə imzalanması böyük uğurdur. Eləcə də bu il fevralın 10-da Bakıda "Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası"nın imzalanması çoxşaxəli və balanslı diplomatiyanın mühüm nəticəsidir.
Amerika Birləşmiş Ştatlarının Prezidenti Donald Trampın təşəbbüsü ilə təşkil edilmiş Sülh Şurasında təsisçi üzv kimi ölkəmizin iştirakı isə Azərbaycanın artıq sadəcə regional deyil, qlobal sülh platformalarında söz sahibi olduğunun təzahürüdür.
Sülhü yalnız sözdə deyil, konkret addımları, diplomatik təşəbbüsləri və tərəfdaşlıq layihələri ilə əyani şəkildə dəstəkləyən Bakı daim dialoq və əməkdaşlığı prioritet hesab edir, siyasi iradə və məsuliyyətli siyasətlə barışın mümkün olduğunu ortaya qoyur.
Quru sərhədlərin strateji mühafizəsi
Dünyada və xüsusilə yaxın regionda baş verən gərgin geosiyasi proseslər, silahlı münaqişələr və müharibələr dövlətləri öz təhlükəsizlik mexanizmlərinə yenidən baxmağa vadar edir. Bu kontekstdə Azərbaycanın quru sərhədlərini bağlı saxlaması qərarının, sadəcə texniki deyil, tamamilə uzaqgörən dövlət strategiyası olduğu bir daha öz təsdiqini tapır.
Prezident İlham Əliyev VII çağırış Milli Məclisdəki çıxışında bu məsələnin həyati əhəmiyyətini belə ifadə edib: "Bizim quru sərhədlərimiz hələ də bağlıdır, yəni vətəndaşların gəliş-gedişləri üçün. Başa düşürük ki, bu, müəyyən çətinliklər yaradır. Ancaq bugünkü geosiyasi vəziyyət də hamının gözü qarşısındadır, daxili təhlükəsizliyi təmin etmək üçün bu, yeganə düzgün addımdır".
Dövlətimizin başçısı onu da vurğulayıb ki, daxili təhlükəsizlik ilə bağlı bütün lazımi tədbirlər görülür: "Mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər olur və bu hərəkətlərin qarşısı alınır. Ona görə sərhədlərimizin qorunması bizi xarici risklərdən qoruyacaq, daxili risklər Azərbaycanda yoxdur".
Bu yanaşma göstərir ki, dövlət üçün ən ali dəyər vətəndaşın can təhlükəsizliyi və ölkənin daxili asayişidir. Regional qeyri-müəyyənliklərin artdığı bir dövrdə sərhədlərin bu formatda qorunması kənar təhdidlərin ölkə daxilinə sızmasının qarşısında ən güclü səddir.
Azərbaycanın bu gün əldə etdiyi uğurların fundamental sütunu daxili sabitlik və milli birlikdir. Sabitlik olmayan yerdə nə nəhəng infrastruktur layihələri, nə də geniş iqtisadi islahatlar uğur qazana bilər. Ölkəmiz sübut etdi ki, hətta ən mürəkkəb geosiyasi şəraitdə belə milli maraqları hər şeydən üstün tutaraq, müstəqil siyasət yürütmək və xalqın təhlükəsizliyini qlobal risklərdən qorumaq mümkündür.
Bu gün Azərbaycan təkcə öz hüdudları daxilində deyil, həm də geniş coğrafiyada sabitlik adası kimi tanınır. Təkcə Bakıda deyil, respublikamızın əksər bölgələrində keçirilən mötəbər beynəlxalq tədbirlər, qlobal böhranların həlli üçün təklif olunan dialoq platformaları dövlətimizin artan gücünü və yüksək nüfuzunu göstərir. Güclü Azərbaycanın həm də regional təhlükəsizlikdə vacib rol oynaması təkzibolunmaz reallıqdır.
Prezident İlham Əliyevin rəhbərliyi ilə yürüdülən bu uzaqgörən kurs, ölkəmizi gələcək onilliklərin mümkün böhranlarından qorumaqla yanaşı, onu müasir dünya nizamının ən stabil və qüdrətli dövlətlərindən biri kimi möhkəmləndirir.
Yasəmən MUSAYEVA,
"Azərbaycan"
19 (1)jpg_1771885865.jpg)
