Tərəvəz, meyvə və liflə zəngin qidaların qəbulu diş ətrafı toxumaların iltihabi xəstəliyi olan parodontit riskini azalda bilər. Bu qənaətə Meksikanın Qvadalaxara Universitetinin alimləri gəliblər və onların icmalının nəticələri “Nutrients” jurnalında dərc olunub.
Tədqiqatçılar qidalanmanın yetkin şəxslərdə diş ətinin sağlamlığı ilə əlaqəsini öyrənən 36 elmi işi təhlil ediblər. Onlar ayrı-ayrı vitaminlərin, qida maddələrinin və müxtəlif qidalanma modellərinin parodontitin yaranmasına təsirini araşdırıblar.
Məlum olub ki, kifayət qədər zülal qəbulu diş əti qanaxmasının azalması, rasionda lifin yüksək miqdarı isə diş ətrafı sümük toxumasının daha az itirilməsi və dişlərin tökülmə riskinin aşağı düşməsi ilə əlaqədardır.
Bundan əlavə, C və D vitaminlərinin daha çox qəbulu parodontit riskinin azalması ilə müşayiət olunub. A, E və K vitaminləri, flavonoidlər, tərəvəz və meyvələr üçün də müsbət nəticələr aşkar edilib. Bu məhsulları mütəmadi olaraq istehlak edən insanlarda dişləri saxlayan toxumaların zədələnmə əlamətlərinə daha az rast gəlinib. Ümumi qidalanma rejiminin xüsusi əhəmiyyəti var. İltihab əleyhinə xüsusiyyətlərə malik rasion xəstəlik riskinin azalması, iltihab yaradan qidalanma isə bu riskin artması ilə əlaqələndirilib.
Müəlliflər hesab edirlər ki, qidalanma tövsiyələri parodontitin müalicəsi və profilaktikası üçün faydalı əlavə ola bilər. Bununla belə, nəzərdən keçirilən tədqiqatların əksəriyyəti müşahidə xarakterli olduğundan, aşkar edilən əlaqələr rasionun dəyişdirilməsinin təkbaşına xəstəliyin qarşısını aldığını tam sübut etmir.
Yasəmən MUSAYEVA,
“Azərbaycan”
