27 sentyabr Azərbaycan xalqının yaddaşında həm ağır sınaqların, həm də böyük Zəfərə aparan yolun başlanğıcı kimi yaşayır. 2020-ci ilin həmin günü başlayan Vətən müharibəsi 44 gün sonra Azərbaycanın parlaq qələbəsi ilə başa çatdı. Bu savaş təkcə işğal altındakı torpaqlarımızın azad olunması ilə nəticələnərək, Prezident, Müzəffər Ali Baş Komandan İlham Əliyevin qətiyyətli siyasətini, xalqımızın milli iradəsini və Vətən uğrunda mübarizə ruhunu bütün dünyaya nümayiş etdirdi.
Məlum olduğu kimi, 2020-ci ilin yayında Ermənistan tərəfindən Tovuz rayonu istiqamətində təxribatın törədilməsi, avqust ayında ərazimizə diversiya qrupunun göndərilməsi, Qarabağda qanunsuz məskunlaşdırmanın aparılması, qondarma rejim üçün seçkilərin keçirilməsi, təmas xəttinə qoşunların cəmləşdirilməsi, İrəvanda Azərbaycan torpaqlarının işğalı ilə bağlı sərsəm fikirlərin səsləndirilməsi danışıqları tamamilə iflic vəziyyətinə salmışdı. Baş verənlər Ermənistanın yeni müharibəyə hazırlaşmasından xəbər verirdi.
2020-ci il sentyabrın 25-də Prezident İlham Əliyev Avropa İttifaqının Cənubi Qafqaz üzrə xüsusi nümayəndəsi ilə görüşündə Ermənistanın hərbi hazırlıqları barədə ciddi xəbərdarlıq edərək demişdi: “Kəşfiyyat mənbələrimizdə məlumat var ki, çox ciddi hərbi hazırlıqlar gedir, onların hərbi qüvvələri təmas xəttində, dövlət sərhədində cəmləşir. Biz vəziyyəti izləyirik və özümüzü müdafiə edəcəyik, Tovuzda etdiyimiz kimi, başqa bir çox hallarda etdiyimiz kimi. Əgər onlar bizə hücum etsələr, peşman olacaqlar”.
Bundan iki gün sonra başlanan İkinci Qarabağ savaşı Prezident İlham Əliyevin bu sözlərinin təntənəsinə çevrildi. 2020-ci il sentyabrın 27-də Ermənistanın yeni hərbi təxribatlarının qarşısını layiqincə alan Azərbaycan Silahlı Qüvvələri özünün tarixi missiyasına, torpaqlarımızın azad edilməsi uğrunda hərbi əməliyyatlara başladı. “Dəmir yumruq” adını alan bu əməliyyat ilk saatlardan ordumuzun yüksək döyüş qabiliyyətinin və peşəkarlığının təntənəsi oldu. Vətən müharibəsinin ilk günündə Füzuli və Cəbrayıl rayonlarının bir neçə kəndinin, strateji yüksəkliklərin azad edilməsi göstərirdi ki, tezliklə düşmən döyüş meydanında məhv ediləcək və torpaqlarımız işğaldan azad olunacaq.
Vətən müharibəsinin ilk günlərindən Azərbaycan Ordusunun əldə etdiyi uğurlar həm də Ermənistanın illər ərzində yaratdığı “məğlubedilməz ordu” mifini alt-üst etdi. Cəbrayıl və Füzuli istiqamətində əldə olunan nailiyyətlər, Suqovuşanın, Hadrutun, Zəngilanın, Qubadlının azad edilməsi ordumuzun döyüş qabiliyyətini bütün dünyaya göstərdi. Müharibə günlərində Prezident İlham Əliyevin xalqa müraciətlərində çatdırdığı qələbə müjdələri respublikamızda coşqu ilə qarşılanaraq, xalqımızın birliyini, cəmiyyətimizin yalnız qələbə ovqatına kökləndiyini nümayiş etdirdi.
Şuşanın azad edilməsi Vətən müharibəsinin ən möhtəşəm səhifələrindən birinə çevrildi. Azərbaycan əsgərinin sıldırım qayaları aşaraq, ağır şəraitdə şəhərə daxil olması hərb tarixində misilsiz qəhrəmanlıq nümunəsi kimi yadda qaldı.
2020-ci il noyabrın 8-də Şuşanın azad olunması ilə müharibənin taleyi faktiki olaraq həll edildi. Bundan iki gün sonra Ermənistan kapitulyasiya aktı kimi tarixə düşən Üçtərəfli Bəyanatı imzalamağa məcbur oldu. Bu sənədə uyğun olaraq Ağdam, Kəlbəcər və Laçın rayonlarının döyüşsüz şəkildə Azərbaycana qaytarılması təmin edildi.
Beləliklə, Azərbaycanın tarixi zəfəri ilə başa çatan Vətən müharibəsində 30 ilə yaxın işğal altında qalan torpaqlarımız azad olundu.
44 gün ərzində Azərbaycan həm də diplomatik müstəvidə və informasiya savaşında böyük üstünlük qazandı. Prezident İlham Əliyev bu cəbhələrdə də ölkəmizə qarşı olan təzyiqləri qətiyyətlə dəf etdi.
Beləliklə, Vətən müharibəsində əldə edilən Qələbənin arxasında, ilk növbədə, Prezident, Müzəffər Ali Baş Komandan İlham Əliyevin siyasi qətiyyəti və əzmi dayandı. Bu fəaliyyət beynəlxalq platformalarda aparılan uğurlu fəaliyyətlə tamamlanaraq torpaqlarımızın azadlığını uğurla təmin etdi.
İkinci amil Azərbaycan Silahlı Qüvvələrinin döyüş qabiliyyətidir. Müasir silahlarla təchiz olunmuş, peşəkar hərbçilərdən formalaşdırılmış ordumuz tarixi vəzifəsini şərəflə yerinə yetirdi.
Üçüncü amil milli birlik idi. Müharibə günlərində xalqımız yumruq kimi bir oldu, Prezident İlham Əliyevin ətrafında daha da sıx birləşdi.
Dördüncü amil gənclərimizin vətənpərvərliyi idi. Birinci Qarabağ savaşını və Qarabağı görməyən gənclərimiz torpaqlarımızın azadlığı uğrunda səfərbər oldular.
Biz torpaqlarımızı döyüş yolu ilə aldıq. Müharibə isə itkisiz ötüşmür. Torpaqlarımızın azad olunması ilə başa çatan 44 günlük savaşda oğullarımız qəhrəmanlıq salnamələri yaratdılar, canlarından keçərək şəhidlik məqamına ucaldılar. Onlar Vətənin azadlığını öz həyatlarından üstün tutdular. Şəhidlərimizin hər biri Azərbaycan tarixinin qəhrəmanlıq səhifəsinə öz adını yazdı.
Azərbaycanın ərazi bütövlüyünün bərpa olunması və bu gün üçrəngli bayrağının bütün Qarabağda dalğalanması şəhidlərimizin ən böyük arzusunun gerçəkləşməsidir.
Şəhidlərin əziz xatirəsi hər zaman uca tutulur. Prezident İlham Əliyevin 2 dekabr 2020-ci il tarixli Sərəncamı ilə sentyabrın 27-nin Azərbaycan Respublikasında Anım Günü kimi qeyd edilməsi şəhidlərimizin xatirəsinə göstərilən dərin ehtiramın ifadəsidir.
Anım Gününün 6-cı ildönümündə torpaqlarımızın azadlığı, Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsini minnətdarlıqla yad edir, qazilərimizə cansağlığı arzulayırıq.
Şəhidlərimizin adı Azərbaycanın tarixində əbədi yaşayacaq. Onların göstərdiyi qəhrəmanlıqlar yeni nəsillər üçün hərbi şücaət və Vətənə bağlılığın mənəvi örnəyidir.
Müşfiq MƏMMƏDLİ,
Milli Məclisin deputatı
677jpg_1790033437.jpg)
