İspaniya Ali Məhkəməsi 9 il əvvəl Kataloniyanın müstəqilliyini elan edən və o vaxtdan bəri Belçikada mühacirətdə yaşayan keçmiş "Kataloniya prezidenti" Karles Puçdemonun həbs qorxusu olmadan vətəninə qayıda biləcəyinə qərar verib.
Xatırladaq ki, 2024-cü ildə İspaniyada parlament və hökumət dəyişikliyindən sonra separatçı hərəkata və 2017-ci il referendumuna qatılan onlarla kataloniyalı siyasətçi və fəal əfv olunmuşdur. Lakin o vaxt Ali Məhkəmə əfvin Puçdemont və onun bir neçə tərəfdaşına qarşı irəli sürülən mənimsəmə ittihamlarına şamil edilmədiyi barədə qərar çıxarmışdır. Separatçılarla Rusiya arasında şübhəli gizli sövdələşməni araşdıran başqa bir hakim də əfvin Puçdemon daxil olmaqla, həmin işdə təqsirləndirilən şəxslərə şamil edilmədiyinə qərar vermişdir.
Bu günlər isə İspaniyanın Konstitusiya Məhkəməsi Puçdemon və onun tərəfdaşlarına əfvin tətbiq edilməməsi qərarını ləğv edib. Bu qərardan Kataloniyanın müstəqilliyinə və hətta muxtariyyətinə qarşı çıxan ifrat sağçı Vox partiyası apellyasiya şikayəti versə də, Ali Məhkəmə onu rədd edib. Nəticədə Karles Puçdemon və onun 'hökumət”indəki iki “nazir” - Lyuis Puş və Toni Komin artıq İspaniyaya qayıda bilərlər.
Qeyd edək ki, Puçdemon və onun tərəfdaşları müstəqillik elan etdikdən sonra Madrid Kataloniyada birbaşa idarəetmə tətbiq etmiş, yerli parlamenti buraxmış və erkən seçkilər təyin etmişdir. Puçdemon isə Belçikaya qaçmışdır. Amma 2024-cü ildə o, gözlənilmədən vətənində peyda olmuş və Barselonada keçirilən mitinqdə çıxış etmişdir. Polisin onu tapmaq və həbs etmək səyləri isə nəticəsiz qalmışdır. O, gizli yolla İspaniyadan qaça bilmişdir.
Məhkəmənin son qərarından sonra onun İspaniyaya qayıdıb-qayıtmayacağı hələ məlum deyil. BBC telekanalının qeyd etdiyi kimi, ötən müddətdə İspaniyada Kataloniyanın müstəqilliyi məsələsi arxa plana keçib. İndi ispanları, o cümlədən katalonları daha çox miqrasiya və mənzil qiymətləri rahatsız edir. Hətta Kataloniyanın özündə Puçdemonun JxCat partiyası bir çox tərəfdarını itirib, baxmayaraq ki, sorğularda ikinci və ya üçüncü yerdə qalır.
Rizvan CƏFƏROV
