Bizi Zəfərə aparan yol

 Azərbaycançılıq milli ideologiyamızın təməl prinsipidir

Bu gün müstəqil Azərbaycan dövləti məhz möhkəm milli-ideoloji təməl - azərbaycançılıq ideologiyası üzərində öz tarixinin ən qüdrətli, ən parlaq mərhələsini yaşayır.

Ölkəmizin qazandığı möhtəşəm uğurlar, ərazi bütövlüyümüzün və suverenliyimizin tam təmin olunması Ulu Öndər Heydər Əliyev dühasının uzaqgörənliklə formalaşdırdığı ideoloji xəttin Prezident İlham Əliyev tərəfindən qətiyyətlə və ardıcıllıqla davam etdirilməsinin bariz nəticəsidir. 

Bəli, Azərbaycançılıq ideologiyası öz milli məntiqinə uyğun olaraq real tarixi zəfərlər doğurub və bu sarsılmaz məfkurə sayəsində vətənimiz bütövləşib.

Həmrəylik, qarşılıqlı hörmət və anlaşmanın ən yüksək səviyyəsi

Bu günlərdə Bakıda keçirilən “Ortaq gələcək naminə dialoq” mövzusundakı VII Ümumdünya Mədəniyyətlərarası Dialoq Forumu növbəti dəfə göstərdi ki, Azərbaycan dünyada mədəniyyətlər, dinlər və etnik qruplar arasında dialoqun mərkəzidir. 

“Biz Avropa ilə Asiya arasında yerləşirik. Əsrlər boyu Azərbaycan Asiya ilə Avropa arasında mədəniyyət körpüsü olub. Multikulturalizm ənənələri, dini və etnik dözümlülük xalqımızın əsrlər boyu yaşatdığı meyarlar olub və biz onları yüksək dəyərləndiririk”, - deyə, sözügedən forumda Prezident İlham Əliyev xalqımıza məxsus bu zəngin, unikal dəyəri beynəlxalq ictimaiyyət nümayəndələrinin diqqətinə bir daha çatdırdı. Dövlət başçımızın səsləndirdiyi kimi, Azərbaycan üçün multikulturalizm və dözümlülük kənardan gəlmiş anlayışlar deyil, əsrlər boyu formalaşan həyat tərzidir. Bu gün cəmiyyətimizdəki sabitliyin, dinamik inkişafın və uğurların təməlində də məhz həmin tarixi köklər və daxili ahəngdarlıq dayanır.

Azərbaycanda yaşayan bütün etnik və dini qrupların Konstitusiyamıza uyğun olaraq bərabər hüquqlara malik olması və bir ailə kimi yaşaması xalqımızın ən böyük gücüdür. Prezident İlham Əliyev forumdakı çıxışında bu məqamı xüsusi vurğulayaraq bildirdi ki, Azərbaycanın uğurlu və sabit inkişafının təməlində dayanan əsas səbəblərdən biri cəmiyyətimizdəki ahəngdarlıqdır: “Bütün etnik qrupların, dinlərin nümayəndələrinin Konstitusiyamıza uyğun olaraq, nəinki bərabər hüquqları var, onlar, həmçinin bir ailə kimi yaşayırlar. Biz həmrəylik, qarşılıqlı hörmət və anlaşmanın ən yüksək səviyyəsini həqiqətən hiss edirik”. 

Biz hər zaman bir-birimizə hörmət, həmrəylik və qarşılıqlı anlaşma şəraitində vahid milli ideya ətrafında birləşmişik. Bu milli ideyanın adı isə azərbaycançılıqdır.

Azərbaycançılıq ideyası sadəcə nəzəriyyə deyil, müstəqillik tariximizin ən ağır, ən çətin anlarında özünü əməli işdə sübut etmiş həyat tərzidir. Məhz Ulu Öndər Heydər Əliyevin böyük uzaqgörənliklə formalaşdırdığı bu ideoloji xətt sayəsində cəmiyyətimiz möhkəm həmrəylik qazandı, dünya azərbaycanlıları vahid məfkurə - azərbaycançılıq ideyası ətrafında sıx birləşdi. Ulu Öndərin “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı gələcək nəsillərə ünvanlanmış, çağırış, milli özünüdərk mesajı idi. Bu çağırış Azərbaycan xalqının gələcəyinin məhz azərbaycançılıq ideologiyasına bağlı olduğunu aydın şəkildə ortaya qoyurdu. Azərbaycançılıq ideologiyasının kökündə dayanan əsas dəyər dar millətçilik və ya şovinizm yox, tam olaraq vətəndaşlıq dəyəri, birlik və demokratik inkişaf yoludur. 

Tarixi qələbələr yaradan güc mənbəyi

Ulu Öndərin hələ sovet dövründən təməlini qoyduğu, müstəqillik illərində isə dövlət siyasətinin əsasına çevirdiyi bu xətt Prezident İlham Əliyev tərəfindən yeni tarixi şəraitdə daha da zənginləşdirildi. Bu sarsılmaz birliyin nəticəsini biz 44 günlük Vətən müharibəsində bütün dünyaya nümayiş etdirdik. Dünyanın harasında yaşamasından asılı olmayaraq kökləri ilə bu torpağa bağlı olan bütün soydaşlarımız, eyni zamanda Azərbaycanda yaşayan müxtəlif xalqların nümayəndələri bu müqəddəs mübarizədə vahid amal ətrafında birləşdilər. 44 günlük Vətən müharibəsi milli həmrəyliyimizin ən yüksək tarixi zirvəsi oldu. Bütün bunlar müstəqil Azərbaycan dövlətinin əsas ideyasının azərbaycançılıq olduğunu qətiyyətlə müdafiə edən Ümummilli Liderin vaxtilə bu istiqamətdə atdığı uzaqgörən və məntiqli addımların öz nəticəsinə çatdığının bariz nümunəsidir. Dahi lider milli həmrəyliyin yalnız çağırışlarla deyil, düşünülmüş konsepsiya ilə təmin edilməli olduğunu dəqiq bilirdi.

Azərbaycançılıq ideologiyasının Vətən dara düşəndə sarsılmaz mənəvi qalaya çevrildiyini, “Ortaq gələcək naminə dialoq” mövzusundakı VII Ümumdünya Mədəniyyətlərarası Dialoq Forumunda Prezident İlham Əliyev belə ifadə edib: “Hamımız milli ideyalar ətrafında birləşirik. Onlardan biri azərbaycançılıqdır. O, Azərbaycandakı bütün xalqları bir araya gətirir. Bu birlik müstəqillik tariximizin ən ağır vaxtlarında özünü göstərib. Ermənistanın hərbi təcavüzü və işğalı, həmçinin İkinci Qarabağ müharibəsi zamanı bütün etnik və dini qrupların nümayəndələri özünəməxsusluğumuzu qorumaq, ədaləti müdafiə etmək və ərazi bütövlüyümüzü bərpa etmək üçün Qələbəmizin rəmzi olan “Dəmir yumruq” kimi vuruşdular”.

2022-ci ilin aprelində azad Şuşada keçirilən Dünya Azərbaycanlılarının V Qurultayı - Zəfər Qurultayı bir daha göstərdi ki, azərbaycançılıq ideologiyası artıq təkcə milli fikri birləşdirən anlayış deyil, böyük tarixi qələbələr yaradan real güc mənbəyidir. Məhz bu ideoloji təməl sayəsində torpaqlarımız işğaldan azad edildi və suverenliyimiz tam bərpa olundu.

Bu gün Azərbaycan öz milli identifikasiyasını, adət-ənənələrini və köklərini qorumaqla yanaşı, mütərəqqi dünya birliyinə inamla inteqrasiya edir. Biz öz tolerantlığımız və etnik müxtəlifliyimizlə dünyaya nümunə göstəririk. Bizi birləşdirən, güclü edən və gələcəyə doğru inamla aparan əsas ideoloji dayağımız isə azərbaycançılıqdır.

Prezident İlham Əliyevin forumda vurğuladığı kimi: “...Əgər bizdə - Azərbaycanda yaşayan bütün xalqlar arasında qarşılıqlı hörmət, əhatəliliyin real platforması olmasaydı, biz heç zaman uğur qazana bilməzdik. Çox fərəhlənirik ki, həmin dəyərləri əsrlər boyu qoruyub saxlaya bilmişik”.

Yasəmən MUSAYEVA, 

“Azərbaycan”