Mənzil almışam, amma əvvəlki ev sahibinin ailə üzvləri hələ də həmin ünvanda qeydiyyatdadır və çıxmaq istəmirlər. Bu halda nə edə bilərəm?
Mətləb ZAMANOV,
Xırdalan şəhəri
Sualınıza cavab olaraq bildiririk ki, mənzil mülkiyyətinizə keçdikdən sonra prioritet məsələlərdən biri həmin şəxslərin yaşayış sahəsindən istifadə hüququna xitam verilməsi və onların qeydiyyatdan çıxarılmasıdır.
Nəzərə alınmalıdır ki, alqı-satqı müqaviləsi bağlandıqdan və mülkiyyət hüququnuz Daşınmaz Əmlakın Dövlət Reyestrində dövlət qeydiyyatına alındıqdan sonra siz həmin əmlakın tamhüquqlu mülkiyyətçisi hesab olunursunuz.
Təcrübə göstərir ki, adətən tərəflər arasında mənzilin alqı-satqısına dair bağlanmış müqavilədə satıcı (keçmiş mülkiyyətçi), eləcə də mənzildə qeydiyyatda olan şəxslər (keçmiş mülkiyyətçinin ailə üzvləri və s.) mənzilin satışından sonra müəyyən müddət çərçivəsində qeydiyyatdan çıxmaq barədə müvafiq öhdəlik götürürlər. Lakin belə bir öhdəliyin yerinə yetirilməməsi, yaxud alqı-satqı müqaviləsində sözügedən məsələnin öz əksini tapmaması halları da istisna edilmir.
Keçmiş mülkiyyətçinin ailə üzvlərinin qeydiyyatdan çıxmaqdan imtina etməsi hüquqi müstəvidə həll olunan məsələdir. Belə ki, Azərbaycan Respublikasının Konstitusiyasına görə, mülkiyyət toxunulmazdır, dövlət tərəfindən müdafiə olunur, o cümlədən mülkiyyətçinin öz əmlakına sahiblik, ondan istifadə etmək və onun barəsində sərəncam vermək hüququ vardır. Bununla yanaşı, Azərbaycan Respublikasının Mülki Məcəlləsinə görə, mülkiyyət hüququ - subyektin qanunla nəzərdə tutulmuş hədlərdə əmlaka öz mülkiyyəti kimi sahib olmaq, ondan istifadə etmək və onun barəsində sərəncam vermək hüququdur.
Siz mülkiyyətçi olaraq əmlakınızın hər bir pozuntudan müdafiəsini tələb edə bilərsiniz. Əgər mülkiyyət hüququ sahiblikdən məhrum edilmə ilə əlaqədar olmayan başqa üsullarla pozularsa, mülkiyyətçi pozuntunun aradan qaldırılmasını müqəssirdən tələb edə bilər. Sabiq mülkiyyətçinin ailə üzvlərinin evdə qeydiyyatda qalması və ya orada yaşaması sizin mülkiyyət hüququnuzun tam həcmdə həyata keçirilməsinə maneə yaradır.
Vaxtınıza qənaət etmək və əlavə xərclərdən azad olmaq üçün keçmiş mülkiyyətçi ilə aranızda yaranmış mübahisəni ilkin olaraq danışıqlar yolu ilə həll etməyə çalışın. Əgər danışıqlar hər hansı müsbət nəticə verməzsə, o zaman mübahisənin həlli prosesini rəsmi müstəviyə keçirmək lazımdır. Bunun üçün məhkəməyə müraciət etməyiniz tövsiyə olunur. Beləliklə, iddiaçı olaraq cavabdehə (qeydiyyatda olan şəxslərə) qarşı məhkəmədə iddia qaldıra bilərsiniz. Əsas tələblə yanaşı, əgər sizə müəyyən maddi ziyan dəyibsə, onun ödənilməsini, həmçinin psixoloji gərginlik və rahatlığın pozulmasına görə mənəvi ziyanın kompensasiyasını da tələb etmək hüququnuz vardır.
İddia tələbinizin təmin olunması ilə bağlı məhkəmə qətnaməsi sözügedən şəxslərin mülkiyyətinizdə olan mənzildən qeydiyyatdan çıxarılması üçün hüquqi əsasdır.
Sualı cavablandırdı:
Paşa SƏFƏROV,
Azərbaycan Respublikası Vəkillər Kollegiyasının üzvü
