- Dövlət qurumunda sürücü işləyirəm. Müdir ezamiyyətə gedəndə məni də ezamiyyətə göndərirlər. Amma xidməti avtomobilə əlavə yanacaq ayrılmır, əsas gətirilir ki, aylıq yanacaq limiti artıq ayrılıb. Bu qanunidirmi?
Lətif ƏLİZADƏ,
Sumqayıt şəhəri
- Sualınıza cavab olaraq bildiririk ki, qarşılaşdığınız vəziyyət əmək münasibətləri zamanı rast gəlinən mövcud mübahisələrdən biridir. Sözügedən vəziyyətin yaranmasını daha çox maliyyə-təsərrüfat münasibətlərinin düzgün qurulmaması ilə əlaqələndirmək olar.
Başlıcası, bu istiqamətdə mövcud və qüvvədə olan normativ-hüquqi aktlara istinad etsək görərik ki, idarənizin bu hərəkəti və gətirdiyi bəhanə əsaslı deyildir. Sizin ezamiyyət zamanı xidməti avtomobillə qət etdiyiniz yola sərf olunan yanacaq aylıq limitə aid edilməməli və əlavə olaraq ödənilməlidir. Belə ki, dövlət büdcəsindən maliyyələşən təşkilatlarda xidməti avtomobillərin aylıq yanacaq limitləri və ezamiyyə xərcləri fərqli müddəalarla tənzimlənir.
İdarənizin istinad etdiyi "aylıq limit" gündəlik xidməti fəaliyyət üçün nəzərdə tutulan bir istifadə qaydasıdır. Sizin ezamiyyətiniz isə xüsusi tapşırıqdır və onun xərcləri tamamilə fərqli bir mənbədən - ezamiyyə xərclərindən ödənilməlidir.
Əmək Məcəlləsinin 3-cü maddəsinin 9-1-ci hissəsinə görə, ezamiyyət - işəgötürənin əmri (sərəncamı, qərarı) ilə işçinin müəyyən olunmuş müddətə iş yerindən başqa yerə işəgötürənin qanunauyğun tapşırığını yerinə yetirmək üçün getməsidir.
Həmçinin əmək müqaviləsi üzrə işçinin müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilmiş ezamiyyə xərcləri normalarından az olmayan məbləğdə ezamiyyə xərclərini almaq kimi əsas hüququ vardır (Əmək Məcəlləsinin 9-cu maddəsinin "ö" bəndi).
Eyni zamanda Əmək Məcəlləsinin 181-ci maddəsinin tələbinə görə, ixtiraçı və səmərələşdirmə təkliflərinin müəllifləri olan, qan və qan komponentləri verən, ezamiyyətə göndərilən işçilərin iş yeri və orta əməkhaqqı saxlanılmaqla onlıara digər müvafiq təminatların verilməsi qüvvədə olan normativ-hüquqi aktlarla tənzim edilir.
Sualınızla bağlı konkret olaraq bu məsələni tənzimləyən əsas normativ-hüquqi akt kimi Azərbaycan Respublikası Maliyyə Nazirliyinin 18 yanvar 2012-ci il tarixli Q-01 nömrəli qərarı ilə təsdiq edilmiş "İşçilərin ezamiyyə Qaydaları"nı qeyd etməliyik.
Qaydaların 1-ci hissəsinin 5-ci bəndinə əsasən, ezam olunan işçiyə ezamiyyətə getməzdən əvvəl ezamiyyətin müddətinə uyğun olaraq pul avansı verilir. Pul avansı ezamiyyə xərclərinin 1 günlük normasına uyğun ezamiyyət günləri üçün tələb olunan xərclərdən və nəqliyyat xərclərindən ibarətdir. Ezamiyyə xərclərinin 1 günlük normasına mehmanxana xərcləri və gündəlik xərclər (yemək, şəhərdaxili nəqliyyat, rabitə və digər xidmətlər ilə bağlı xərclər) daxildir.
Nəqliyyat xərclərinə - ezam olunma yerinə getmək və qayıtmaq, ölkədaxili nəqliyyat xərcləri (taksidən istifadə istisna olmaqla yaşayış məntəqələrindən kənarda yerləşən vağzala, limana (bərəyə), təyyarə meydanına və ölkə ərazisində digər məntəqələrə getmək) daxildir və bu xərclər təqdim edilən sənədlər əsasında ödənilir.
Qaydaların 2-ci hissəsinin 5-ci bəndinə əsasən, büdcədən maliyyələşdirilən dövlət orqanlarında işin xüsusiyyətləri ilə əlaqədar olaraq respublika ərazisi daxilində xidməti minik avtomobilləri ilə xidməti ezamiyyətə gedilməsi zəruri olan hallarda nəqliyyat vasitələri üçün müəyyən edilmiş aylıq yürüş həddindən artıq yol qət edildiyi təqdirdə sərf edilən yanacağın dəyəri təsdiqedici sənədlər əsasında ezamiyyə xərcləri üçün nəzərdə tutulmuş vəsaitlər hesabına nəqliyyat xərci kimi ödənilir.
Sualı cavablandırdı:
Paşa SƏFƏROV,
Azərbaycan Respublikası Vəkillər Kollegiyasının üzvü
