Forum Azərbaycanın etibarlı tərəfdaş, sülh naminə təşəbbüslərə evsahibliyi edən ölkə kimi dünyada rolunu gücləndirəcək

Azərbaycanın evsahibliyi etdiyi növbəti beynəlxalq tədbir bu gün başa çatır. Bakı bu dəfə də dünyanı narahat edən qlobal mövzuların müzakirə edildiyi məkana çevrildi. 

Bakı Dövlət Universitetinin kafedra müdiri Kamilə Əliyeva qəzetimizə açıqlamasında bildriib ki, Nizami Gəncəvi Beynəlxalq Mərkəzinin təşkilatçılığı ilə Bakıda martın 13-15-də keçirilən XII Qlobal Bakı Forumu beynəlxalq ictimaiyyət tərəfindən olduqca nüfuzlu bir tədbir kimi qəbul edilir. Budəfəki tədbirdə dünyanın bir sıra ölkələrinin prezidentləri, baş nazirləri, parlamentariləri, eləcə də sabiq dövlət və hökumət başçıları, beynəlxalq təşkilatların nümayəndələri iştirak edirlər. "Forumun mövzusu son dövrlər dünyada aktual olan bir  məsələyə - "Dünya düzəninin yenidən düşünülməsi: Çağırışların fürsətə çevrilməsi"nə həsr olunub. Nizami Gəncəvi Beynəlxalq Mərkəzi dünyada qlobal problemlərin həlli yollarının araşdırılması və bu barədə beynəlxalq ictimaiyyəti məlumatlandıran çox vacib təsisata çevrilib. Məhz bu səbəbdən mərkəzin təşkil etdiyi Qlobal Bakı Forumuna maraq hər il artmaqdadır. Ölkəmizin bu cür nüfuzlu tədbirlərə evsahibliyi etməsi və iştirakçılarının saylarının ildən-ilə artması Azərbaycana olan böyük etimadın, Prezident İlham Əliyevin siyasətinə verilən yüksək qiymət və dəstəyin nümunəsidir. Budəfəki forumda da dünyanın müxtəlif regionlarından 400-ə qədər nüfuzlu siyasi xadim, 50-dən çox fəaliyyətdə olan və sabiq prezident, baş nazir, eləcə də BMT-nin struktur rəhbərləri, nüfuzlu alimlər və ekspertlər iştirak edirlər", - deyə o əlavə edib.

Ekspert qeyd edib ki, XII Qlobal Bakı Forumunda dünyanı narahat edən problemlər, çoxqütblü dünya nizamı, BMT-nin gələcək paktı, eləcə də postmünaqişə dövründə bərpa-quruculuq işləri kimi vacib mövzular müzakirə olundu. Eyni zamanda "Sülhə gedən yol", "Yeni dünya nizamında orta güclər" mövzularında panellərlə yanaşı, Yaxın Şərq, Ukrayna-Aİ məsələlərinə həsr olunmuş sessiyalar da keçirilir. Ümumilikdə forumda bir çox sahələri əhatə edən qlobal əhəmiyyətli məsələlər də müzakirə edilir.

K.Əliyeva bildirib ki, Prezident İlham Əliyevin uzaqgörən, müdrik siyasəti nəticəsində Azərbaycan bu gün dünyada ən stabil və təhlükəsiz bir dövlətə çevrilib: "Bu gün ölkəmizdəki ictimai-siyasi stabillik, dinamik iqtisadi artım, uğurlu və balanslaşdırılmış xarici siyasət, sosial rifah səviyyəsinin yüksəlməsi beynəlxalq ictimaiyyətin diqqət mərkəzindədir. Azərbaycanın dünyada nüfuzu getdikcə artmaqla yanaşı, ölkəmiz sivilizasiyalararası dialoq və qlobal əməkdaşlığın platformasına çevrilib.

Onun sözlərinə görə, dünyanın bir sıra regionlarından iştirakçıların bu foruma qatılması tədbirin genişmiqyaslı təsirini və beynəlxalq arenada əhəmiyyətini, Azərbaycanın beynəlxalq dialoqa verdiyi töhfələri və multilaterializmə sadiqliyini bir daha nümayiş etdirir. Forum Azərbaycanın qlobal miqyasda etibarlı tərəfdaş, sülh və stabillik naminə təşəbbüslərə evsahibliyi edən bir ölkə kimi rolunu gücləndirəcək. Bu gün Azərbaycan həm də multikultural ölkə kimi tanınır. Bu baxımdan Azərbaycanda olan mövcud vəziyyət dünya dövlətlərinə örnəkdir. Prezident İlham Əliyevin də qeyd etdiyi kimi, "Multikulturalizm Azərbaycanın dövlət siyasətidir". Forumda multikultural dəyərlərin təbliği də öz əksini tapdı. Bakı bir daha strateji dialoq mərkəzi kimi çıxış etdi, dünyanın diqqəti qlobal problemlərin həll edilməsinə yönəldi.

Əsmər QARDAŞXANOVA,

"Azərbaycan"