Azərbaycan dövləti İkinci Qarabağ müharibəsində və antiterror əməliyyatlarında qazandığı zəfərlərlə beynəlxalq hüquqla təsbit olunmuş hüquqlarını həyata keçirdi. Vasitəçilərin, beynəlxalq təşkilatların onilliklər ərzində həllinə nail olmaq istəmədikləri problemləri respublikamız güc yolu ilə aradan qaldırdı, Qərbin bəlli siyasi mərkəzlərinin erməni təəssübkeşliyinə xidmət göstərən niyyətlərini puç etdi.

Azərbaycana qarşı qərəzli və riyakar münasibətin göstəricisi

Azərbaycan ərazilərinin işğaldan azad edilməsi, Ermənistanın işğalçılıq siyasətinə, erməni separatizminə son qoyulması beynəlxalq hüququn normalarının təmin olunması ilə yanaşı, həm də yeni reallıqların yaranması deməkdir. Amma görünən odur ki, bu reallıqları hələ də dərk etməyənlər, yaxud proseslərə erməni təəssübkeşliyi ilə yanaşanlar var. Bu xüsusda Avropa İttifaqının (Aİ) Cənubi Qafqaz üzrə xüsusi nümayəndəsi Toivo Klaarın bir neçə gün öncə mətbuata verdiyi müsahibəsində səsləndirdiyi fikirlər Qərbin bəlli siyasi dairələrində Azərbaycanın maraqlarına, Azərbaycan xalqının hüquqlarına qarşı olan qəbuledilməz münasibətin və erməni sevgisinin  növbəti göstəricisidir.

Aİ-nın Cənubi Qafqaz üzrə xüsusi nümayəndəsi Qarabağı könüllü şəkildə tərk etmiş ermənilərin və Ermənistandan qovulmuş azərbaycanlıların qayıdışı ilə bağlı məsələlərdən danışarkən bu hüququ yalnız Qarabağı tərk etmiş ermənilərə şamil etmişdir. T.Klaar tərəfindən Azərbaycanın Qarabağ bölgəsindən könüllü və öz arzuları ilə Ermənistana köç etmiş ermənilərin qayıtması məsələsinin xüsusi hal kimi vurğulanması, Ermənistan ərazisindən zorla qovulmuş azərbaycanlıların qayıdış hüququnun isə fərqləndirilməsi və bu hüququn inkar edilməsi bir daha Azərbaycana qarşı olan qərəzli və riyakar münasibətdən xəbər verir. Bu, hələ Vətən müharibəsinə qədər vasitəçilərin və beynəlxalq təşkilatların Qarabağ problemi ilə bağlı ortaya qoyduqları məkrli mövqenin Aİ rəsmisi tərəfindən başqa bir rakursda davam etdirilməsi deməkdir. Hansı ki, bu problem artıq həllini tapıb.

Aİ xüsusi nümayəndəsinin nə deməsinin əhəmiyyəti yoxdur

Azərbaycan Xarici İşlər Nazirliyindən bununla bağlı verilən açıqlamada bildirilir ki, T.Klaarın Azərbaycanın Qarabağ bölgəsindən könüllü əsasda Ermənistana və əvvəllər yaşadıqları digər ölkələrə miqrasiya etmiş ermənilərin qayıtması məsələsini xüsusi hal kimi nəzərdən keçirməsi, indiki Ermənistan ərazisindən zorla qovulmuş azərbaycanlıların qayıdış hüququnu şərtləndirməsi qəbuledilməzdir. Açıqlamada qeyd edilir ki, Ermənistandan qovulmuş azərbaycanlıların təhlükəsiz və ləyaqətli şəkildə öz doğma torpaqlarına geri dönməsi üçün müvafiq şərait yaradılması Ermənistanın öhdəliyidir və beynəlxalq ictimaiyyət bu öhdəliyin yerinə yetirilməsini tələb etməlidir.

O cümlədən Qərbi Azərbaycan İcması bəyanat yayaraq Aİ rəsmisinin fikirlərini sərt şəkildə qınayıb. Bəyanatda deyilir: "Cənab Klaarın Ermənistandan zorla qovulmuş azərbaycanlılara münasibətdə sərgilədiyi bu münasibət onun özünün və təmsil etdiyi qurumun etnik və dini əsasda ayrı-seçkiliyinin sübutudur. Aİ rəsmisinin Qarabağ ermənilərinin məsələsini xüsusi vurğulaması isə bu qurumun münaqişənin həll edilməsini və Azərbaycanın öz ərazi bütövlüyünü bərpa etməsini həzm edə bilməməsinin göstəricisidir. Bütün bunlar, eləcə də Aİ-nin Ermənistana hərbi yardım ayırması, bu ölkənin sanksiya qaçaqmalçılığı yolu ilə külli miqdarda vəsait əldə edib silahlanmaya sərf etməsinə göz yumması və Fransa kimi Aİ-yə üzv ölkələrin Ermənistana böyük miqdarda silah satması regionda gərginlik yaratmağa xidmət edir".

Onu da qeyd edək ki, indiki Ermənistan ərazilərinin yerli sakinləri olan azərbaycanlılar öz dədə-baba torpaqlarından zorla qovulublar. Həmin vaxt ermənilər tərəfindən soydaşlarımıza qarşı çoxsaylı cinayətlər, o cümlədən soyqırımı cinayətləri törədilib. Qarabağdakı  ermənilər isə ölkəmizi öz istəkləri ilə tərk ediblər. Azərbaycan tərəfinin çağırışlarına baxmayaraq, onlar geri qayıtmaqdan vaz keçiblər. Bütün bunları T.Klaar da yaxşı bilir. Bu baxımdan onun bu cür fikirlər söyləməsi sadəcə erməni təəssübkeşliyindən və Azərbaycanın haqqını görməzlikdən irəli gəlir.

  Əslində, T.Klaar və onun kimilərinin bundan sonra nə deməsinin əhəmiyyəti də yoxdur. Çünki onun kimi düşünənlərin Azərbaycanın yaratdığı reallıqlarla hesablaşmaqdan başqa yolları yoxdur.

Rəşad CƏFƏRLİ,

"Azərbaycan"