Növbədənkənar parlament seçkilərinə hazırlıq Mərkəzi Seçki Komissiyasının təsdiqlədiyi təqvim planı üzrə davam edir. Artıq avqustun 2-də namizədin qeydə alınması üçün zəruri olan seçki sənədlərinin dairə seçki komissiyasına təqdim edilməsi ilə bağlı müəyyən edilmiş müddət başa çatıb. Bununla da seçki kampaniyasının ilkin mərhələsi uğurla yekunlaşıb.
Seçkilərdə iştirak üçün 1508 nəfər müraciət edib
Xatırladaq ki, namizədin qeydə alınması üçün seçki sənədlərinin dairə seçki komissiyasına təqdim edilməsi iyulun 13-dən başlamışdı. Bununla bağlı müəyyən edilmiş müddət avqustun 2-si saat 18:00-dək davam etmişdi.
Bu müddətdə Milli Məclisə növbədənkənar seçkilərdə iştirak üçün 1508 nəfər müraciət edib. Bunu MSK-nın dünən keçirilən iclasında MSK sədri Məzahir Pənahov bildirib. MSK sədri deyib ki, müraciət edənlərdən 1462 nəfərin namizədliyinin irəli sürülməsi təsdiqlənib. 1191 nəfər imza vərəqələrini qaytarıb, 881 nəfərin deputatlığa namizədliyi qeydə alınıb.
İndiyədək 14506 nəfər yerli, 99 nəfər beynəlxalq müşahidəçi qeydiyyatdan keçib
Seçkilərin demokratik keçirilməsini şərtləndirən amillərlən biri də müşahidənin aparılmasıdır. Respublikamızın seçki qanunvericiliyi həm aktiv seçki hüququna malik Azərbaycan vətəndaşlarına, həm də beynəlxalq müşahidəçilərə bununla bağlı geniş imkanlar yaradır.
MSK-nın dünən keçirilən iclasında bildirilib ki, Milli Məclisə sentyabrın 1-də keçiriləcək seçkilərlə əlaqədar indiyə qədər 14 min 506 nəfər yerli müşahidəçi akkreditasiyadan keçib.
MSK sədri Məzahir Pənahov qeyd edib ki, bu müşahidəçilərdən 5477 nəfəri Mərkəzi Seçki Komissiyasında, 9029-u isə dairə seçki komissiyalarında qeydiyyatdan keçib.
Eyni zamanda seçkiləri müşahidə etmək üçün 8 beynəlxalq qurumdan və 26 ölkədən 99 nəfər akkreditə olunub.
Seçkiqabağı təşviqat avqustun 9-dan başlayacaq
Seçki kampaniyalarının əsas mərhələlərindən biri isə namizədlərin seçkiqabağı təşviqatının həyata keçirilməsidir. Seçki kampaniyasının bu mərhələsində qeydə alınmış namizədlər seçicilərin dəstəyini qazanmaq üçün təşviqat və təbliğatla məşğul olurlar. Bu isə seçkidə qalib gəlmək üçün olduqca vacib məsələdir.
Respublikamızda seçkiqabağı təşviqatın aparılması səsvermə gününə 23 gün qalmış başlanır və səsvermənin başlanmasına 24 saat qalmış dayandırılır. Beləliklə, sentyabrın 1-nə təyin edilmiş parlament seçkilərində seçkiqabağı təşviqatın aparılması avqustun 9-da başlayacaq, avqustun 31-i saat 08:00-da dayandırılacaq. Seçkiqabağı təşviqat qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri tərəfindən aparılır.
Qarşıdan gələn növbədənkənar parlament seçkilərində seçkiqabağı təşviqat aparmaq məqsədilə ölkə üzrə birmandatlı seçki dairələrinin 60-dan çoxunda namizədləri qeydə alınmış siyasi partiyalara, siyasi partiyaların bloklarına ödənişsiz efir vaxtı və dərc üçün yer ayıracaq media subyektlərinin adı məlumdur. Eyni zamanda Milli Məclisə növbədənkənar seçkilərdə seçkiqabağı təşviqatın media subyektlərində ödənişli əsaslarla da aparılması mümkündür.
Milli Məclisə sentyabrın 1-nə təyin edilmiş növbədənkənar seçkilər respublikamızda müstəqillik dövründə keçirilən sayca 7-ci parlament seçkiləri olacaq. Eləcə də bu, müstəqillik illərində işğaldan azad edilmiş ərazilərimizdə təşkil edilən ilk parlament seçkiləri kimi tarixə düşəcək. Bütün bunlarla yanaşı, növbədənkənar parlament seçkiləri Azərbaycanın demokratik inkişafının növbəti təcəssümünə çevriləcək.
Rəşad CƏFƏRLİ,
"Azərbaycan"
jpg_1746828813.jpg)
