Atalar yaxşı deyib ki, bir dərdin min dərmanı var. Amma əsas odur ki, min dərmanın içindən xəstəliyinə çarə olanı tapa biləsən. Xeyli müddət idi ki, oynaqlarımda ağrılar hiss edirdim. Müalicə olunsam da, ağrılarım tam keçmirdi. Növbəti dəfə həkimin qəbuluna gedəndə Naftalan şəhərindəki sanatoriyalarda müalicə olunmağımı məsləhət gördü. 
Deyirdilər ki, Naftalan şəhərindəki yaxşı müalicə mərkəzlərindən biri də  "Nur Naftalan"  sanatoriyasıdır. Ünvanını öyrənib həmin şəfa ocağına üz tutduq. Burada bizi çox mehribancasına və gülərüzlə qarşıladılar. Qiymətlər də münasib idi. Yataq otaqlarında rahatçılıq üçün hərtərəfli şərait yaradılmışdı. Sanatoriyanın baş həkimi Elçin Rüstəmov bizi qəbul etdi, ağrı-acılarımızla maraqlandı. Qəbuldan sonra xəstəliyimizə uyğun müalicə kursları təyin olundu. 
Sanatoriyada çalışan tibb heyətinin mehribançılığını, xəstələrə qarşı göstərdikləri diqqət və qayğını xüsusi olaraq qeyd etmək istərdik. Onlar xəstələri gülərüzlə qarşılayır,  müalicə olunmaları üçün bütün lazımi köməyi göstərirdilər. Belə xoş münasibət də sanki xəstəliyin müalicəsinə müsbət təsir edirdi. Tibb işçilərinin xoş sözləri müalicəmizə ən yaxşı dərman idi. Buradakı ziyarətçilərin hamısı söhbət zamanı sanatoriyada yaradılmış şəraitdən razılıq edirdilər.
Sanatoriyanın rəhbərliyi xəstələrin qidalanmasını da daim diqqət mərkəzində saxlayırdı. Hər gün yeməkxanada növbənöv xörəklər bişirilir, müxtəlif adda salatlar hazırlanır, mövsümə uyğun olan meyvələr və şirələr verilirdi. Yeməkxanada olan təmizlik, səliqə-sahman isə sözün həqiqi mənasında, göz oxşayırdı.
Müalicə kursu başa çatandan sonra ağrı-acılarımızın azaldığını hiss etdik. Deməli, müalicə düzgün təyin olunmuş və burada çalışan tibb işçiləri tərəfindən uğurla aparılmışdı. 

Mehriban MƏHƏRRƏMOVA,
Bakı şəhər sakini