Türkiyə vasitəçilik sahəsində dünya liderlərdən biridir. Ankara Qırmızı dənizdən tutmuş Balkanlar və Cənubi Asiyaya qədər geniş bir məkanda mübahisələrin həllinə fəal şəkildə töhfə verir.
AZƏRTAC xəbər verir ki, bu barədə Türkiyənin xarici işlər naziri Hakan Fidan Ankarada “Sülh, sabitlik və inkişafa yönəlmiş xarici siyasət” mövzusunda keçirilən 16-cı Səfirlər Konfransının iştirakçılarına müraciət edərək bildirib.
H.Fidan vurğulayıb ki, Ankara Ukraynada qan tökülməsinin ilk günündən bəri “ədalətli sülhdən uduzanın olmayacağ”ını bildirir.
O bildirib ki, İstanbul Kiyev ilə Moskva arasında fəal danışıqlar üçün yeganə platforma olub və olaraq qalır. “Türkiyədə dialoqun təşkili faktının özü Türkiyə diplomatiyasına etimadın nümayişidir”, - deyə nazir bildirib.
Türk dövlətləri ilə qarşılıqlı əlaqə mövzusuna gəldikdə H.Fidan qeyd edib ki, Türk Dövlətləri Təşkilatına üzv ölkələr “yeni həmrəylik dövrü” qurmaq üçün addımlar atırlar.
Xarici işlər naziri xatırladıb ki, gələn il Türkiyə Türk Dövlətləri Təşkilatının növbəti Zirvə Toplantısına ev sahibliyi edəcək, onun çərçivəsində təşkilata sədrlik Azərbaycandan Türkiyəyə keçəcək.
Nazir qeyd edib ki, tarix və təcrübə xalqın və dövlətin qarşısında duran çətinliklərin və təhdidlərin heç vaxt bitmədiyini sübut edir. “Bu baxımdan, ölkənin qarşısında duran problemləri həll etməyə imkan verən Türkiyə diplomatiyasının gücü və zəngin təcrübəsi xüsusilə vacibdir”, - deyə nazir vurğulayıb.
H.Fidan vurğulayıb ki, Türkiyə Xarici İşlər Nazirliyinin məqsədi dövlətin maraqlarının qorunması və gücləndirilməsi olub və bu, belə də qalır. “Beynəlxalq münasibətlər sistemində böhran və problemlərin həlli mexanizmlərinin “iflic” olduğu bir dövrdə sülh və sabitlik naminə diplomatik vasitələrdən fəal şəkildə istifadə etməyə borcluyuq”, - deyə türkiyəli nazir davam edib.
Türkiyə xarici işlər naziri etibarlı informasiya mənbələrinə əsaslanan reallıqların strateji təhlilinin vacibliyini vurğulayıb.
jpg_1767211798.jpg)
