"Bu, bizim hamımızın Qələbəsidir. Azərbaycan xalqı bu Qələbəni əldə etməklə öz tarixi böyüklüyünü bütün dünyaya nümayiş etdirdi".
İlham ƏLİYEV
"Biz müzəffər xalqıq, qalib xalqıq. Öz torpağımızda yaşayırıq. Bir daha sübut etdik ki, bu torpaqların sahibi bizik, çünki biz dağıdan yox, qurub-yaradanıq və bundan sonra da bu torpaqlarda əbədi yaşayacağıq".
İlham ƏLİYEV
"Bizə qarşı soyqırımı törədilmişdir, bizə qarşı urbisid törədilmişdir, ekosid törədilmişdir. Erməni faşizmi bu bölgəni daim işğal altında saxlamaq istəyirdi və əfsuslar olsun ki, onların arxasında duran bəzi xarici dövlətlər onlarla həmrəy idi.
Açıq olmasa da, gizli kanallarla onlara verilən mesajlar ondan ibarət idi ki, Azərbaycan cürət edib heç vaxt azadlıq müharibəsinə başlamayacaq, biz sizin arxanızdayıq, biz sizə dəstək olacağıq, sizə silah veririk, mənəvi dəstək veririk, sizin üçün mənəvi dayağıq".
İlham ƏLİYEV
"Biz açıq-aydın başa düşürdük və görürdük ki, hansı qüvvələr Ermənistana dəstək verir, hansı qüvvələr onların arxasındadır, hansı qüvvələrlə biz üz-üzə gələ bilərik və gəlmişik də. Amma bu, bizi çəkindirmədi. Artıq biz "öldü var, döndü yoxdur" şüarı ilə yaşayırdıq və 44 günlük Vətən müharibəsi həm peşəkarlıq, həm qəhrəmanlıq, həm milli ruh salnaməsidir. Bu, bütün dünyaya Azərbaycan xalqının nə qədər böyük xalq olduğunu göstərdi. Onu göstərdi ki, Azərbaycan xalqı mütləq və tam qələbə qazanmaq üçün öz canından keçməyə hazırdır".
İlham ƏLİYEV
TOY-BAYRAMLA DÖNÜŞ
Vətəndən ayrı düşmək dözülməz dərddir...
Torpaq itkisi müsibətdir.
Təəssüf ki, hər iki dərdi və kədəri yaşadıq.
Yurdsuz-yuvasız qalaraq olmazın ehtiyac və çətinliklərə sinə gərməyə məcbur olduq.
Bəzən inamımızı itirsək də, ümidimizi üzmədik.
Əmanət qəbirlərə gömülərək sonradan doğma yurda nəşimizin qaytarılmasını vəsiyyət etdik.
Çünki biz belə xalqıq, belə millətik!
Vətənsiz yaşaya bilmərik!
Aləm cənnətə dönsə də, Qarabağı unutmarıq!
Həm də ona görə unutmarıq ki, Qarabağı itirəndə iyirmi min övladımızı da şəhid vermişdik.
Yəni döyüşərək, özümüzdən qat-qat güclü, arxalı düşmənə uduzaraq Vətən torpağını tərk etmişdik.
Amma heç vaxt məğlubiyyəti qəbul etmədik!
Heç zaman vətənsizliklə barışmadıq!
Bildik ki, nə vaxtsa doğma torpaqlara qayıdacağıq!
İnandıq ki, haçansa bizə bu zülmü yaşadan düşmənə qalib gələrək qisasımızı alacağıq!
Həm də bilirdik ki, Ulu Öndərimiz heç zaman bizi köməksiz qoymayacaq!
Əmin idik ki, o, geriyə dönərək bizi yenidən toparlayacaq, torpaqlarımızı bizə, bizi isə yenidən Vətənə qaytaracaqdır!
Belə də oldu.
Xalqın arzu və tələbi ilə Ulu Öndər Heydər Əliyev yenidən ölkə rəhbərliyinə qayıtdı.
Böyük uzaqgörənliklə həm cari və təxirəsalınmaz məsələlərlə, həm də gələcəyə ünvanlanan işlərlə məşğul oldu!
Bir dövlət kimi məhvolma həddinə çatdırılan Azərbaycanı qüdrətli inkişafın astanasına çatdıraraq əbədiyyətə qovuşdu!
Bu məqamda da dövlətin sonrakı taleyini düşündü.
Yarımçıq qalmış işlərini ən layiqli siyasi varisinə vəsiyyət edərək ona özü qədər inandığını və məhz onun həmin işləri uğurla başa çatdıracağına əminliyini bildirdi.
Cənab İlham Əliyev bu etimadı şərəflə doğrultdu, ata vəsiyyətini də sonadək yerinə yetirdi.
Müzəffər Ali Baş Komandan İlham Əliyev möhkəm təməl üzərində xarüqələr yaratdı!
Düşmən ordusunu "dəmir yumruğ"u ilə məhv etdi!
Qisasımızı döyüş meydanında aldı!
Bu gün isə yeni möcüzələr yaradaraq bizi tikib qurduğu, cənnətə çevirdiyi Qarabağa qaytarır.
Həm də elə-belə yox...
Toy-bayramla, fəxarətlə, qürurla!
Əsl qaliblərə məxsus sevinc və şadyanalıqla!
Artıq Ağdama da köç başlayıb.
Sarıcalı, Kəngərli kəndlərinin əsl sahibləri deyə-gülə geriyə qayıdırlar.
Bəli, Ağdam həm də Qarabağın toy otağıdır!
Qədim el sənəti muğamlarımızı yaşadan neçə-neçə görkəmli sənətkarımızın doğulduğu yerdir.
Bütün bu məqamları nəzərə alan Prezident İlham Əliyev Ağdamda ikinci Muğam Mərkəzinin də açılışını etdi.
Birinci Muğam Mərkəzi Quzanlıda hələ 2018-ci ildə istifadəyə verilmişdi.
Prezidentimiz belə qərar qəbul etdi ki, Ağdama qayıdanların ilk sıralarında muğamlarımız da olmalıdır.
Arxitektura və akustika cəhətdən unikal olan yeni Muğam Mərkəzinin açılışı qeyri-adi hadisəyə çevrildi.
Bu həm də muğamlarımızın yaşadıcısı olan Heydər Əliyev Fondunun prezidenti Mehriban xanım Əliyevanın təşəbbüsü və himayəsi ilə keçirilən yeni müsabiqənin açılışı ərəfəsində idi.
Bir-birindən gözəl ifalar göstərdi ki, muğam sənəti yaşayır və əbədi yaşayacaqdır!
Çünki onun İlham Əliyev kimi qədirbiləni və Mehriban xanım Əliyeva kimi hamisi var!
***
XALQIN TÜKƏNMƏZ İSTƏK VƏ MƏHƏBBƏTİ
Bu gün dünyada çox mürəkkəb və qarışıq proseslər gedir.
* Rusiya ilə Ukrayna bütün təklif və təşəbbüslərə baxmayaraq, atəşkəsə əməl etmir, danışıqlara gəlmir, sülh müqaviləsini imzalamaqdan hələ çox uzaqda olduqlarını nümayiş etdirirlər.
* Fransanın koloniyaları ayağa qalxaraq müstəqillik tələb edir, neokolonializm siyasəti yürüdən bu qədim və "demokratik" dövləti küncə sıxışdırırlar!
* İsrail-Qəzza müharibəsi humanitar fəlakətə gətirib çıxarıb.
* Heç kəsin gözləmədiyi halda Hindistan Pakistana hücum etdi, Pakistan isə hücumu dəf edərək ona elə zərbə endirdi ki, Hindistan dərhal müharibəni dayandıraraq səsini içinə saldı!
* Korrupsiya girdabında çabalayan Avropa İttifaqı ABŞ-dən inciyərək yeni böhranlara tuş gəlib.
* ABŞ isə "yeni ştatlar yaratmaq" və "rüsum siyasəti" ilə aləmi bir-birinə vurub.
Əslində, yeni dünya düzəni formalaşır.
Adətən belə "dəyişmələr" asan və rahat keçmir.
Təkcə Azərbaycan 44 gündə 30 illik işğala son qoyaraq bu vurhavurda ikiəsrlik tarixi olan ən böyük problemini həll edə bilib!
Həm də təkcə torpaqlarını erməni işğalından azad etməyib!
Güclü siyasi iradə nümayiş etdirərək:
* Ərazi bütövlüyünü bərpa edib;
* Dövlət suverenliyinə və Konstitusiya əsaslarının təmininə nail olub;
* Separatizmə birdəfəlik və əbədi son qoyub!
Bütün bunlar Müzəffər Ali Baş Komandan İlham Əliyevin siyasi dühası, müdrikliyi və uzaqgörənliyi, sarsılmaz qətiyyəti və möhkəm iradəsi sayəsində mümkün olub!
"Dəmir yumruğ"unu əvvəlki vəziyyətinə gətirərək ölkənin etibarlı müdafiəçisinə nail olan cənab İlham Əliyev sülh müqaviləsinin dəyişməz şərtlərini açıq şəkildə bəyan edərək Ermənistanın ağıla gəlməsini gözləməklə bahəm, Azərbaycanın yeni dünya düzənində yüksək, əlverişli və faydalı yer tutmasına çalışır, ölkəmizin dostlarının, strateji tərəfdaşlarının sayını getdikcə artırır.
Azərbaycanın digər vacib işi isə erməni barbarları tərəfindən dağıdılan əraziləri bərpa edərək keçmiş məcburi köçkünlərin geriyə qayıdışını mümkün qədər tezləşdirməkdir!
***
Dövlətin başını dik tutmasının əsas səbəblərindən biri iqtisadi gücü və imkanlarıdır.
İqtisadi cəhətdən müstəqil yaşaya bilməyən, kimdənsə müxtəlif formada maliyyə asılılığı olan dövlət heç zaman müstəqil siyasət də yürüdə bilməz!
Azərbaycan Prezidenti İlham Əliyev qarşıya qoyduğu hədəflərə yetmək üçün ilk növbədə tarixinin ən qüdrətli Azərbaycanını yaratdı.
Bu, dövlət başçısına məqsədlərinə çatmaqda ən mühüm dayaq nöqtəsi oldu!
Dediklərimizi azad Ağdamın timsalında nəzərdən keçirək.
Prezidentliyə başladığı ilk günlərdən cənab İlham Əliyev işğalla bağlı prinsipial və qətiyyətli mövqeyini bəyan etmiş və daim dediyinin üstündə durmuşdur:
* Azərbaycan xalqı heç zaman torpaqlarının işğalda qalması ilə barışmayacaqdır!
* Biz bir qarış torpağımızı belə düşmənə güzəştə getməyəcəyik!
* Azərbaycan öz ərazisində ikinci erməni dövlətinin yaradılmasına əsla yol verməyəcəkdir!
* Lazım gəlsə, Azərbaycan öz torpaqlarını hərbi yolla azad edəcəkdir!
Əlbəttə, torpaqlar müharibə yolu ilə azad edildi.
Çünki ATƏT-in Minsk qrupu riyakarlıq göstərərək sülh danışıqları imitasiyası yaradır, əslində, vaxtı uzatmaqla işğalı əbədiləşdirmək niyyətini güdürdü.
Arxalı düşmənə qalib gəlmək üçün isə güclü və döyüşkən ordun olmalıdır.
Güclü ordu isə yetərincə vəsaitlə yaradılır.
Belə vəsaiti qazanmaq, dövlətin zəruri ehtiyaclarını ödəməklə yanaşı, ordu quruculuğuna sərf etmək də xüsusi bacarıq və uzaqgörənlik tələb edir.
Müzəffər Ali Baş Komandan İlham Əliyev elə bir qüdrətli ordu qurdu ki, otuz il ərzində yaxın dostlarının köməyi ilə Ağdamda altıqat müdafiə xətləri yaradan, lovğalıqla ad qoyduqları "keçilməz Ohanyan xətti"ni çəkən, dağların altında beton bunkerlər tikən Ermənistan bir güllə belə atılmadan Ağdamı, üstəlik, Laçın və Kəlbəcəri də geri qaytardı.
"Dəmir yumruğ"un qorxusundan, reallıqları gördüyündən buna məcbur oldu.
***
Qürur və fərəh doğuran bir neçə nadir faktı da diqqətə çəkmək istəyirik:
* Dünyanın heç bir yerində heç bir dövlət rəhbəri bir müharibədə üç müstəvidə qələbə qazana bilməyib!
Bunu İlham Əliyev etdi!
* Müzəffər Ali Baş Komandan İlham Əliyev 44 günlük Zəfər müharibəsində "dəmir yumruğ"u ilə Ermənistan ordusunu əzərək məhv etdi!
* İradə və qətiyyətlə apardığı diplomatiya müharibəsində də qalib gələrək qoyduğu şərtə nail oldu - yalnız Ermənistan ordusunun ərazilərimizdən çıxarılma qrafiki təqdim edildikdən sonra hərbi əməliyyatları dayandırdı!
* İnformasiya savaşının yeganə baş qəhrəmanına çevrildi, 30-dan çox dünya KİV-inə, o cümlədən informasiya agentliklərinə, məşhur televiziya kanallarına müsahibə verərək həmin tribunalardan məharətlə istifadə sayəsində düşmənin feyk xəbərlərini ifşa edərək özlərinə qarşı çevirdi!
Bütün bunlar dünyanın və hamımızın gözləri qarşısında baş verdi!
* Dünyanın heç bir yerində heç bir dövlət başçısı çoxsaylı müdafiəçisi və dəstəkçisi olan, gizli və aşkar şəkildə müxtəlif mənbəli maliyyə vəsaiti və silah-sursatla yardım göstərilən dövləti belə biabırçı məğlubiyyətə uğradaraq rəzil günə sala bilməyib!
Bunu İlham Əliyev bacardı!
* Dünyanın heç bir yerində heç bir dövlət başçısı BMT-nin, ATƏT-in, Avropa İttifaqının, Avropa Şurasının, beynəlxalq hüququn birlikdə 30 il ərzində edə bilmədiyini təkbaşına bacarmayıb!
İlham Əliyev bunu da etdi!
* Dünyanın heç bir yerində heç bir dövlət rəhbəri ölkəsindəki separatizmin kökünü tam və qəti şəkildə kəsə bilməmişdir!
İlham Əliyev bunun da öhdəsindən gəldi!
Azərbaycan Konstitusiyasını qəbul etməyən, Azərbaycan qanunları əsasında yaşamaq istəməyən haylar dinməz-söyləməz, könüllü şəkildə, bir nəfərin burnu belə qanamadan ölkə ərazisini tərk etdilər!
Bu gün Azərbaycanda vur-tut 15 nəfər keçmiş separatçı, terrorçu və müharibə canisi vardır.
Onlar da Bakıda məlum ünvanda "çay içirlər".
Azərbaycan XXI əsrin "Nürnberq məhkəməsi"ni quraraq insanlığa qarşı ağır cinayətlər - müharibə cinayətləri, terror əməlləri, soyqırımları törədənləri açıq şəkildə, şahidlərin və zərərçəkmişlərin iştirakı ilə və bütün beynəlxalq hüquqi prosedurları gözləməklə mühakimə edir!
Sonda obyektiv və ədalətli hökmünü də çıxaracaqdır!
***
Bu gün Müzəffər Ali Baş Komandan İlham Əliyev Vətən müharibəsində yaratdığı möcüzələri bərpa və quruculuq meydanında yeni möcüzələrlə davam etdirir!
Doğrudur, ərazilərin minalardan təmizlənməsi müəyyən qədər vaxt aparan maneədir.
* O minalar ki ermənilər onları son günlərinədək Ermənistandan daşıyaraq ölkəmizə gətirmiş, rusiyalı sülhməramlıların gözləri görə-görə ölüm tələləri kimi torpaqlarımızda basdırmışlar.
* O minalar ki Ermənistan onların yerləşdirilməsilə bağlı həqiqi xəritələri indiyədək bizə verməmişdir.
Təəssüf ki, heç bir beynəlxalq qurum və təşkilat indiyədək həqiqi xəritələrin verilməsilə bağlı onlara təsir və təzyiq göstərməmiş, bunu təmin etməmişdir.
Azərbaycan isə heç kimdən kömək istəmədən, kimsədən yardım gözləmədən öz gücü ilə ərazisini minalardan təmizləyir.
Həm də bu işi uğurla görür.
Nəticə isə fərəh doğurur!
***
Keçmiş məcburi köçkünlər artıq doğma yurda dönərək yenidən xoşbəxt günlərini yaşayırlar.
İndiyədək 14 mindən çox keçmiş məcburi köçkün əzəli torpağına qovuşub. Onlardan 175 ailə (871 nəfər) Zəngilan rayonunun Ağalı kəndində, 20 ailə (90 nəfər) Tərtər rayonunun Talış kəndində, 571 ailə (2091 nəfər) Laçın şəhərində, 823 ailə (3136 nəfər) Füzuli şəhərində, 217 ailə (823 nəfər) Laçın rayonunun Zabux kəndində, 59 ailə (215 nəfər) Laçın rayonunun Sus kəndində, 376 ailə (1409 nəfər) Şuşa şəhərində, 86 ailə (346 nəfər) Xocalı şəhərində, 512 ailə (2293 nəfər) Cəbrayıl şəhərində, 180 ailə (840 nəfər) Xocalı rayonunun Ballıca kəndində, 90 ailə (306 nəfər) Ağdərə rayonunun Həsənriz kəndində, 180 ailə (592 nəfər) Ağdərə rayonunun Suqovuşan kəndində, 184 ailə (767 nəfər) Ağdam rayonunun Sarıcalı kəndində məskunlaşıb. Bundan başqa, Laçının Bəylik kəndinə də köç prosesinə başlanılıb. Bəylik kəndində ümumilikdə 360 nəfərin (90 ailə) məskunlaşdırılması planlaşdırılır.
Kəngərli kəndi bərpa edilən sayca 15-ci, Ağdam rayonunun isə ikinci yaşayış məntəqəsidir. Ağdamın Kəngərli kəndinə köçən keçmiş məcburi köçkünlərin sayı isə 487 nəfərdir (109 ailə).
Beləliklə, bu günədək 15 yaşayış məntəqəsində, yəni 5 şəhər və 10 kənddə daimi məskunlaşma reallaşdırılıb.
Bütövlükdə, Dövlət Statistika Komitəsinin 1 may 2025-ci il tarixli rəsmi məlumatına görə, azad edilən ərazilərdə 43 min 144 nəfər məskunlaşmışdır.
Bir məqamı xüsusi vurğulamaq istərdik.
Artıq məskunlaşma prosesi elə bir intensiv hal alıb ki, doğma el-obaya dönənlərin sayını dəqiq söyləmək çətinlik törədir.
Çünki bu rəqəmlər hər gün, hər həftə dəyişir.
Köç prosesinin bütün ağırlığını dövlət öz üzərinə götürdüyündən və mütəşəkkil qaydada aparıldığından belə rəqəm dəyişmələri yalnız sevinc və fərəh doğurur.
***
Dövlət başçısı İlham Əliyevin göstərişi və rəhbərliyi ilə hazırlanaraq sürətlə icra olunan "Böyük qayıdış" Dövlət Proqramı ilə bərabər, bir sıra yerli və beynəlxalq əhəmiyyətli layihələr də reallaşdırılır.
Bunlardan biri yeni yol infrastrukturunun yaradılmasıdır.
Evlər, binalar, məktəblər, uşaq bağçaları və digər sosial obyektlərlə yanaşı, yeni dəmir yolları və şose yolları da inşa olunur, körpülər, viaduklar salınır, dağların altından tunellər qazılır, vağzallar tikilir, bölgəyə müxtəlif nəqliyyat vasitələri ilə rahat gediş-gəliş təmin olunur.
İnşası "Ginnesin Rekordlar Kitabı"na düşəcək sürətlə - cəmi səkkiz aya başa çatan Füzuli hava limanından sonra Zəngilan və Laçın aeroportları istifadəyə verilib.
Bütövlükdə Azərbaycanda 9 hava limanı fəaliyyət göstərir ki, bunlar da ölkəmizi dünyanın hər tərəfi ilə bağlayan hava yolları sayılır.
İki mühüm beynəlxalq əhəmiyyətli layihəni xüsusi qeyd etmək istərdik.
Dünyada heç kəsin ağlına belə gəlməzdi ki, nə vaxtsa Rusiya ilə Ukrayna müharibə aparacaq, bu səbəbdən Avropa İttifaqı rus qazından sanksiyalar səbəbindən imtina edəcəkdir.
Sanki cənab İlham Əliyev bütün bunları irəlicədən görürmüş və bilirmiş!
Belə ki, mövcud Cənubi Qafqaz Boru Kəməri genişləndirildi. TANAP və TAP kəmərləri çəkildi. Bu üç xətt birləşdirilərək
"Cənub qaz dəhlizi"ni yaratdı.
Prezident İlham Əliyevin təşəbbüsü və yaratdığı beynəlxalq tərəfdaşlıq platforması sayəsində gerçəkləşən bu dəhliz vasitəsilə Azərbaycan qazı Avropa bazarına çıxarıldı.
Bu gün Rusiya qazından imtina edən Avropa bizim təbii qazımıza böyük ehtiyac duyur.
Azərbaycan isə 8-i Avropa İttifaqının üzvü olan 10 Avropa dövlətinə, bütövlükdə 12 ölkəyə mavi qaz satır.
İldən-ilə satılan qazın həcmi də artır.
"Böyük qayıdış" prosesində ən mühüm məsələlərdən biri doğma yurda dönənlərin işlə təminatıdır.
Bu sahədə də sistemli iş aparılır.
Ağdam və Cəbrayılda yaradılan sənaye parklarında çoxsaylı iş yeri açılmaqdadır.
Mütəmadi olaraq əmək yarmarkaları keçirilir, keçmiş məcburi köçkünlər doğma yurdda ixtisas və peşələrinə uyğun işlə təmin olunurlar.
Bərpa və quruculuq prosesində həyata keçirilən iki beynəlxalq layihəni xüsusi qeyd etmək istərdik.
Onlardan biri "yaşıl enerji" ixracı ilə bağlıdır.
Ölkəmizin böyük uğurla və mütəşəkkilliklə keçirdiyi COP29-da da qeyd olunduğu kimi, dünya tədricən "qazıntı yanacağı"ndan imtina etməkdədir.
Təbii, bu, uzun müddət çəkən və müəyyən hazırlıqlar tələb edən prosesdir.
Lakin Azərbaycan Prezidenti cənab İlham Əliyev artıq xeyli vaxtdır ki, bu dəyişikliyə də hazırlaşır.
Artıq ölkəmizdə bərpaolunan enerji istehsalı ilə bağlı çoxsaylı layihə uğurla icra olunmuşdur.
Azərbaycan dost dövlətlərlə birlikdə Qara dənizin dibi ilə Avropaya uzanacaq yeni kabel xəttinin çəkilişinə başlayıb.
Qarabağda və Şərqi Zəngəzurda isə bir-birinin ardınca su anbarları, sututarlar yaradılır, yeni su-elektrik stansiyaları tikilir, "yaşıl enerji" istehsalı artır.
Qarabağın və Şərqi Zəngəzurun beynəlxalq turizm məkanına çevrilməsi də mühüm layihələrdən sayılır.
Buraların əsrarəngiz təbiəti, görməli yerləri turistlər üçün olduqca cəlbedicidir.
Eyni zamanda turizmin inkişafı iqtisadi yüksəlişə, yerli əhalinin sosial rifahının yüksəlməsinə də ciddi təsir göstərəcəkdir.
Lakin sahənin əsas tələblərinə ciddi əməl olunmalı, turistlərin təhlükəsizliyi, rahatlığı, vaxtlarını xoş keçirmələri, əyləncə maraqları da təmin edilməlidir.
Uzun müddətdir ki, bu istiqamətlərdə səriştəli işlər görülür.
Turizmin inkişafı iqtisadi səmərə ilə yanaşı, Azərbaycanın dünyaya inteqrasiyasına da müsbət təsirini göstərəcəkdir.
***
Bu günlərdə Ağdam rayonunda keçirdiyi görüşdə cənab İlham Əliyev mühüm bir tarixi məqama da toxundu: "Köçkünlər ən çətin şəraitdə yaşayıblar. Siz bilirsiniz ki, işğal dövründə köçkünlərlə mənim çoxsaylı görüşlərim olub, həm çadır şəhərciklərində, - onlara söz vermişdim ki, birinci prezidentlik dövrümdə bir dənə də çadır şəhərciyi qalmayacaq və artıq 2007-ci ildə bir dənə də qalmamışdı, - həm də yeni salınmış qəsəbələrdə, qəsəbələrin açılışında. Biz 300 minə yaxın ovaxtkı köçkünü gözəl evlərlə təmin etmişdik. O görüşlər zamanı deyirdim ki, bu, müvəqqəti yaşayış yerinizdir, torpaqlar azad olunandan sonra sizin üçün Qarabağda daha gözəl şərait yaradacağıq.
Bugünkü mərasim o sözlərin, necə deyərlər, möhürüdür".
***
Dünya Azərbaycan Prezidenti cənab İlham Əliyevi dediyini edən, sözünün sahibi olan lider kimi tanıyır.
Azərbaycan xalqı isə yaxşı bilir ki, əgər cənab İlham Əliyev bir işə başlayıbsa, onu hökmən qələbə ilə başa çatdıracaqdır!
* Bu gün Azərbaycan qalib dövlətdir!
* Bu gün Azərbaycan Cənubi Qafqazda söz sahibidir!
* Bu gün Azərbaycan COP29-u böyük uğurla keçirərək Avropanın "yaşıl enerji" ilə təminatına mühüm töhfələr verməyə hazırlaşan ölkədir!
Bütün bunlar İlham Əliyev müdrikliyinin və uzaqgörənliyinin, xalqa sədaqətlə xidmətinin real nümunələrinin konkret əməllərdə təzahürüdür!
Bəxtiyar SADIQOV
Dövlət başçısı cənab İlham Əliyevlə Ağdam görüşündən qayıtdıqdan sonra ilk təəssüratlarımı ağsaqqal dostum və mogikan şairimiz Nəriman Həsənzadə ilə bölüşdüm.
Xalq şairi ürək sözlərini poetik qələmi ilə şeirə çevirərək gözəl bir nümunə yaratdı.
Həmin şeiri də hörmətli oxucularımızın diqqətinə təqdim edirik.
ƏSRİN NƏĞMƏSİ
Müzəffər Komandan inad elədi,
Bütün Qarabağı azad elədi.
Mehriban xanımdan gələn nümunə,
Muğamı qaytardı öz sahibinə.
Hələ Qarabağı görməyən gənclər,
Gedib Qarabağda cihad etdilər.
Şeirimiz, sözümüz, musiqimiz də
səsləndi,
dolaşdıq dünyanı biz də.
Elə ki Şuşanı azad elədi,
Qəmli könülləri o şad elədi.
"Əzizdir Atamın hər vəsiyyəti,
Yerinə yetirdim -
O pak niyyəti"!
Şanlı tarixidir bir şah əsərin,
Əziz xatirəsi Ulu Öndərin.
İndi sevdasıdır Şuşa hər kəsin,
Cənab Prezident bir nitq söyləsin.
Dünya qulaq assın ona yenidən,
Sənindir bu şöhrət, bu şərəf, Vətən!
Vətən, qoy sevinsin qızın və oğlun,
Məhv etdi düşməni "dəmir yumruğ"un!
İndi hər könüldə yerin var, inan,
Xalqın sevimlisi, qalib Komandan!
Ətrim bu torpaqdı,
Ürəkdi, candı.
Havam - o havadı,
Səsim o səsdi,
Qarabağ Azərbaycandır!
Nəriman HƏSƏNZADƏ,
Azərbaycanın Xalq şairi
jpg_1749076194.jpg)
