Ermənistan və Rusiya arasında münasibətlər son bir il ərzində xeyli pisləşib. Bütün bunların kökündə dayanan başlıca amil isə baş nazir Nikol Paşinyanın komandasında Moskva əleyhinə olan şəxslərin çoxluq təşkil etməsidir. Daha çox narahatlıq doğuran məsələlərdən biri də anti-Rusiya əhvali-ruhiyyəli kadrlara yüksək vəzifələrin verilməsi və paralel olaraq Ermənistanda Rusiyanın dayaqlarının laxladılmasıdır.
Hər iki məqamla bağlı Rusiya tərəfi bir neçə dəfə mövqeyini bildirib və N.Paşinyan hakimiyyətinə xəbərdarlığını edib. Buna baxmayaraq, N.Paşinyan Kremlə tərs gələn siyasətini davam etdirməkdədir. Ancaq Paşinyanın Rusiyanı bölgədən sıxışdırmaq cəhdi Ermənistan üçün uğurlu heç nə vəd etmir.
"4rd.am" nəşri yazıb ki, Paşinyan və onun komandası siyasi cəhətdən Qərb kosmopolitizmi ilə rusofobiya ideologiyası əsasında formalaşıb və öz elektoratına da bunu aşılaya bilib: "Sələflərinə qarşı nifrət və Rusiyanı lənətləməklə siyasi intihara doğru getdiklərini belə anlamırlar. Siyasət sevgi və nifrətlə deyil, soyuq başla idarə olunur. Ən azı, böyük geosiyasi alova odun olmamaq üçün Gürcüstan və Ukrayna nümunələri bizə dərs olmalıdır. Qərb və ya başqası bizdən ötrü döyüşmək üçün öz qoşunlarını gətirəcəkmi? Gürcüstan və Ukraynanın nümunələri göstərdi ki, Qərb öz oyununu ustalıqla oynayır və nəticə acınacaqlı olur".
Bildirilib ki, erməni xalqı elə vəziyyətlə üzləşib ki, heç bir milli hökumət heç vaxt Ermənistanı xilas edə bilməyəcək. Görünən odur ki, Paşinyan erməni xalqının özünü müdafiə etmək gücündə olduğuna inanmır, üstəlik, milli ruhda yeni yüksəlişin qarşısını almağa çalışır. Bu mənada onun erməni xalqına ilk və ən böyük xəyanəti hərbi və dövlət idarəçiliyi təcrübəsi olmadan faktiki olaraq müharibə vəziyyətindən çıxmamış bir ölkənin rəhbəri olmaq istəyi idi. Məğlubiyyətlə üz-üzə qalan Paşinyan indi Ermənistanı total tarixi, siyasi və diplomatik məğlubiyyətə aparır.
Ermənistan Respublikaçılar Partiyasının icra orqanının üzvü Artak Zakaryan bildirib ki, yanvarın 9-da Nikol Paşinyan hökuməti müvafiq qanun layihəsini təsdiq etməklə, Avropa İttifaqına üzvlük prosesinə rəsmən başlayıb, Ermənistan parlamentinin xarici əlaqələr komissiyası həmin qanun layihəsinə müsbət rəy verib.
Onun sözlərinə görə, Moskva ilə münasibətləri pozmaq və Qərblə müttəfiqliyə ümid etmək yolunda olan Nikol Ermənistan üçün növbəti məğlubiyyəti təmin edir: "O, hakimiyyəti saxlamaq üçün bədnam cəhdlərində Ermənistanın bütün kartlarını bir-bir qurban verib və verməkdə davam edir ki, bu da nəticədə ölkəni heç nəsiz qoyacaq. Ermənistanın Qarabağda məğlub olmasından və onun Azərbaycan tərəfindən nəzarətə götürülməsindən sonra Ermənistan, Gürcüstan və Azərbaycanın regiondakı strateji istiqamətləri əhəmiyyətli dərəcədə dəyişdi. İrəvan Rusiyaya arxa çevirərək, Qərbə üz tutur".
Zakaryan bildirib ki, Paşinyan hökuməti Ermənistanın xarici siyasətdə oynaya biləcəyi bütün "kozırları" tükəndirir, demək olar, bütün "qırmızı xətlər" keçilib və keçilir.
Digər tərəfdən Ermənistan ikili oyun oynayır, Rusiya ilə münasibətdə gərginliyin artması fonunda gündəm formalaşdırır. Çünki Ermənistanın Rusiya ilə iqtisadi-ticari əlaqələri indiyə qədər görünməyən həddə - 12 milyard dollara çatıb.
Beləliklə, Ermənistanda hazırda baş verənlər bu ölkəni daha sürətlə hərtərəfli iflasa doğru aparır. Çünki İrəvan xarici himayədarları olmadan yaşaya biləcək iqtidarında olan ölkə deyil.
Elçin CƏFƏROV,
"Azərbaycan"
