Bir nəfər hamını aldada bilər.
Hamı hamını aldada bilər.
Hamı bir nəfəri aldada bilər.
Amma kimsə Tanrını aldada bilməz!
Bu, mümkünsüzdür!
Tanrı həm aldadılmazdır, həm də ədalətlidir!
İstədiyi vaxt öz ədalətini bərpa edə bilir...
Bizim istək və arzularımızdan, hətta yalvarışlarımızdan asılı olmayaraq!
Buna ilahi ədalətin bərpası deyilir!
***
Hərdən biz insanlara elə gəlir ki, ilahi ədalətin təmini gecikir.
Bəlkə də bizim zaman ölçümüz özgə cürdür.
Amma həqiqət budur ki, ilahi ədalət gec-tez öz yerini alır!
Bu, birmənalıdır!
Dünyanı lərzəyə salan, milyonlara zülm edərək qanını tökən, həyatdan məhrum edən cahangirlərin sonunu və aqibətini yada salın.
Qurduqları imperiyalar, yığdıqları pullar, qızıllar, sərvətlər, saraylar...
Nə yeyib qurtara bilirlər, nə xərcləyib tükəndirə, nə də özləri ilə o dünyaya aparırlar.
Biz insanlar isə azğınların, işğalçıların, qəddarların, tamahları naminə minlərə, milyonlara zülm edənlərin təkcə o dünyada deyil, bu dünyada da cəzalandırılmasını, etdikləri qəddarlıqların əvəzini almalarını, talan edərək yediklərinin burunlarından gətirilməsini qəlbən istəyir, əllərimizi göyə qaldıraraq uca Tanrıdan diləyirik!
Tanrımız daha bir istəyimizi reallaşdırır.
Erməni faşizminin və separatçılarının əvvəlcə üstün gəldiyi, sonra isə 44 günlük Zəfər müharibəsində məğlub olduqları Azərbaycanın hüquq sistemi vasitəsilə sorğu-suala tutulmasını, bir vaxtlar bizə sığınanların sonradan cəlladımıza çevrilərək otuz il ərzində başımıza olmazın müsibətlər gətirənlərin tezliklə ədalət məhkəməsi tərəfindən mühakimə olunaraq cəzalandırılmasının şahidinə çevriləcəyik!
Tanrı əlləri günahsız insanların qanına batanların cəzalandırılmasının sevincini də bizə yaşadacaqdır!
***
Məhkəmə qarşısında cavab verən hərbi cinayətkarlıqda təqsirləndirilənlərin ən mənfur əməlləri ilk növbədə onlara öz torpaqlarında yer verənlərə, uzun müddət mehribanlıq şəraitində yaşayan azərbaycanlılara qarşı qəddarlıqları və xəyanətləridir.
Törətdikləri cinayət əməllərinin sayı-hesabı isə yoxdur!
Həm də uzun illər cəzasız qaldıqlarından daha da azğınlaşaraq bir-birindən qanlı cinayətlər ediblər:
* Azərbaycan vətəndaşlarının hüquqlarını kütləvi şəkildə pozublar.
* Yaşadıqları evlərindən zorla qovublar.
* Əmlaklarını mənimsəyiblər, dağıdıblar.
* Vətəndaşlarımıza külli miqdarda maddi ziyan vurublar.
* Torpaqlarımızı işğal edərək əkin dövriyyəsinə qatıblar.
* Təbii sərvətlərimizi istismar edərək çapıb talayıblar.
* Meşə və bağları qırmaqla ekoloji cinayətlər törədiblər.
* Çaylarımıza və göllərimizə zəhərli maddələr axıdaraq flora və faunaya böyük zərər vurublar.
* Mülki vətəndaşları işgəncələrə məruz qoyublar.
* Günahsız insanları qanunsuz həbs edib, ağır şəraitdə saxlayıblar.
* İnsanları məhkəmə qurmadan qətlə yetirərək kütləvi şəkildə basdırıb, məzarlıqların yerini gizlədiblər.
* Bir neçə yaşayış məntəqəsində soyqırımları törədiblər.
* Tarixi, mədəni abidələrimizi dağıdıblar.
* Məzarlıqlarımızı yerlə yeksan ediblər.
* Məscidlərimizdə donuz, mal-qara saxlayaraq dinimizi təhqir ediblər.
* Kütləvi terror əməllərinə rəvac veriblər.
* Terrorçuluğu maliyyələşdiriblər.
* Qanunsuz qurumlar yaradıb, separatçılıqla məşğul olublar.
* Bir-birindən ağır hərbi cinayətlər törədiblər.
* Beynəlxalq hüququ sistemli şəkildə, kobudcasına pozublar.
* Dini, milli ayrı-seçkiliyə yol verib, buna görə insanlarımızı təqib ediblər.
44 günlük Zəfər müharibəsində isə cəbhə xəttindən yüz kilometrlərlə uzaqda yerləşən Gəncə, Tərtər, Bərdə və Goranboyu ballistik raketlər və qadağan olunmuş kassetli, fosforlu bombalarla vurulmasını əmr edərək daha ağır cinayətlər törədiblər.
Azərbaycan vətəndaşlarına qarşı vəhşilikləri məhz azərbaycanlı olduqlarına görə ediblər.
Azərbaycan vətəndaşlarına qarşı vəhşilikləri məqsədli, planlı və düşünülmüş şəkildə törədiblər.
Bütün bu əməllər Azərbaycan Respublikası Cinayət Məcəlləsinin müvafiq maddələrində tövsif olunan cinayətlərdir!
***
Azərbaycan Respublikası Cinayət Məcəlləsinin müxtəlif maddələri ilə ittiham olunanlar bunlardır:
1. Arkadi Arşaviri (Arşaviroviç);
2. Harutyunyan Arayik Vladimiri (Vladimiroviç);
3. Sahakyan Bako Sahaki;
4. İşxanyan Davit Rubeni;
5. Babayan Davit Klimi (Klimoviç);
6. Mnatsakanyan Lyova Henrixi;
7. Manukyan Davit Azati;
8. Martirosyan Qarik Qriqori;
9. Paşayan Melikset Vladimiri;
10. Allahverdiyan Davit Nelsoni;
11. Stepanyan Qurqen Homerosi;
12. Balayan Levon Romiki;
13. Babayan Madat Arakeli (Arakeloviç);
14. Beqlaryan Vasili İvani;
15. Qazaryan Erik Robertiyə.
Uzun müddət davam edən istintaq prosesi ilə bağlı Azərbaycan Respublikası Baş Prokurorluğunun açıqlamasında bildirilir:
"2024-cü il mayın 2-də baş prokurorun qərarı ilə 1987-ci ilin oktyabr ayından 2024-cü il aprelin 22-dək törədilmiş cinayətlərin bir qismi ilə bağlı Baş Prokurorluq və respublikanın ayrı-ayrı istintaq qurumlarında istintaq edilən 1389 cinayət işi bir icraatda birləşdirilib və Azərbaycan Respublikasının Baş Prokurorluğunun rəhbərlik etdiyi, Dövlət Təhlükəsizliyi Xidməti, Daxili İşlər Nazirliyi, Dövlət Gömrük Komitəsi və Hərbi Prokurorluğun müstəntiqlərindən ibarət tərkibdə istintaq olunub".
"Cinayət işi üzrə ittiham aktı Azərbaycan Respublikasının Baş Prokuroru tərəfindən 2024-cü il dekabrın 16-da təsdiq edilərək baxılması üçün aidiyyəti üzrə Bakı Hərbi Məhkəməsinə göndərilib".
Onu da qeyd edək ki, Azərbaycan Respublikasının Baş Prokurorluğu həmin istintaq işi ilə əlaqədar qeyd olunan epizodlar üzrə şübhəli bilinən, eləcə də şahid qismində bir çox şəxslərin Ermənistan Respublikasının ərazisində olmasına ciddi əsasları rəhbər tutaraq, Ermənistan Respublikasının aidiyyəti orqanlarını əməkdaşlığa dəvət edib.
Təqsirləndirilən şəxslər vəkillə təmin olunub, habelə istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmə qərarları ilə barələrində həbs qətimkan tədbiri seçilib.
Hüququn aliliyini daim rəhbər tutan Azərbaycan həm canilərin həbsi, həm saxlanılması, həm də istintaq dövründə heç bir pozuntuya yol verməyib.
Beynəlxalq Qırmızı Xaç Komitəsi mütəmadi olaraq məhbuslarla görüşüb, onların saxlanma şəraitini izləyib, ailələri ilə birbaşa əlaqə yaradılmasında vasitəçilik edib.
İlahi ədalətin bərpası düz otuz il çəkdi.
Bu otuz ildə doğma el-obalarından zorla qovulan, malları-mülkləri talan olunan, özləri çadır şəhərciklərində, yük vaqonlarında, qeyri-yaşayış yerlərində, yataqxanalarda və ictimai binalarda ömür sürən məcburi köçkünlər nə əziyyət, ehtiyac və məşəqqətlər çəkdilər...
Bunu Tanrı da gördü, biz də!
* Yalnız gözlərini ikili standartlar kor etmiş dünya görmək istəmədi.
* Yalnız beynəlxalq hüquq erməni diasporunun əlində oyuncağa çevrilərək özünü aciz kimi qələmə verdi.
* Yalnız ATƏT-in Minsk qrupu özünün urvatsız və riyakar donuna bürünərək çoxüzlülük etdi.
* Yalnız həmsədr dövlətlər "diplomatiya oyunu" oynamaqla üzdə bir, arxada başqa mövqe sərgilədilər.
Tanrı bütün bunları gördü, bildi, bizə səbir və dözüm verdi!
Sonra isə öz ədalətini bərpa etmək üçün zəruri addımlar atdı.
Müzəffər Ali Baş Komandan İlham Əliyevə arxa və kömək durdu!
Ordumuzu qüdrətli və məğlubedilməz etdi!
Xalqımızı ordumuzla bir edərək "dəmir yumruğ"a çevirdi!
44 gün ərzində otuzillik işğala son qoyan "dəmir yumruğ"a!
Düşməni qarşımızda diz çökdürərək zəlil günə salan "dəmir yumruğ"a!
Baş sərkərdəmizin polad iradəsi, qətiyyət və dönməzliyi sayəsində müqəddəs torpaqlarımız murdar ləpirlilərdən təmizləndi.
Həkəri çayı üzərindəki körpüdə unikal əməliyyat keçirərək nəzarət-buraxılış məntəqəsi yaradıldı, illər boyu bizə qarşı xəyanət və şər yoluna çevrilən Laçın yolu bağlandı, ərazi bütövlüyümüz təmin olundu!
2023-cü ilin 19-20 sentyabrında cəmi altı saat çəkən antiterror əməliyyatı keçirildi, bütövlükdə 23 saat ərzində Ermənistana məxsus hərbi birləşmələr, separatçı tör-töküntülərinin terrorçu qruplaşmaları ağ bayraq qaldıraraq təslim oldular, silah-sursatlarını təhvil verərək gəldikləri yerə qayıtdılar.
Çörəyimizə xəyanət edənlər, bizimlə birlikdə yaşamağa haqqı olmayanlar qanunlarımızı qəbul edib ölkəmizdəki digər millətlər kimi olmayacaqlarını dərk etdiklərindən könüllü surətdə "real Ermənistan"a getdilər!
Dövlət suverenliyimiz tam təmin edildi!
Gec oldu, güc oldu!
İndi isə İlahi ədalətin hüquqi bərpası prosesi başlayır.
Bakıda içdikləri çay uzun illər ərzində xalqımıza qarşı çoxsaylı cinayət əməli törədənlərin dillərini də açıb.
Etdiklərini istintaq dövründə verdikləri ifadələrdə təsdiqləyiblər.
İndi isə məhkəmə iclaslarında etiraf edəcəklər!
Çoxsaylı faktlar, dəlillər, şahid ifadələri, sübutlar bütün murdar əməllərinin, düşmənçilik hərəkətlərinin əyani şəkildə təsdiqinə çevriləcəkdir!
Bir vaxtlar qudurğanlıq edənlər, özlərini Qarabağın və Şərqi Zəngəzurun ağası kimi aparanlar, bu yerlərin əsl sahiblərini terrora, soyqırımına, işgəncələrə məruz qoyanlar, ev-eşiklərindən qovaraq məşəqqət dolu illər yaşamağa məcbur edənlər, yalnız azərbaycanlı olduqları üçün həyatdan məhrum edənlər qanun qarşısında cavab verəcəkləri günə çatdılar!
Bir vaxtlar onları silah-sursatla təmin edənlər, beynəlxalq qurumlarda murdar əməllərinin müdafiəçilərinə çevrilənlər daha müdafiə edə bilməyəcəklər!
Nə əlləri çatacaq, nə telefon zəngləri kara gələcək, nə də təhdid, təzyiqlərinə əhəmiyyət verən olacaq!
Azərbaycan xalqının mal-mülkünün, təbii sərvətlərinin talanması sayəsində qazandıqları pullar kara gəlməyəcək, əlləri yığdıqları sərvətlərə çatmayacaq, Ermənistanda, Rusiyada, Avropanın şəhərlərində taladıqları vəsaitlə aldıqları obyektlərin, qurduqları biznes şəbəkələrinin faydasını görə bilməyəcəklər.
Restoranlarda, istirahət mərkəzlərində, hotellərdə yeyib-içərək şellənə bilməyəcəklər...
Etdiklərinin cəzasını "ağzıbirdə" çəkəcəklər!
Bütün canilər kimi eyni xörəkdən yeyib, eyni qabdan su içəcəklər.
Düşünməyə kifayət qədər vaxtları da olacaq.
Keçmiş kabinetlərini, silahsız əhaliyə qarşı törətdikləri "qəhrəmanlıqları" acı xatirə kimi anacaqlar...
Qətlə yetirdikləri qocalar, uşaqlar, qadınlar tez-tez yuxularına girəcək, "xoş günlər"ində gördükləri, yedikləri dönə-dönə burunlarından gələcək.
İndi ilahi ədalətin bu mərhələsi, yeni mərhələsi başlayır.
Tanrı böyükdür!
Səbri də böyükdür!
Səbri daşanda isə cəzası çox ağır olur!
Tanrı və ədalət məhkəməsi layiq olduqları cəzalarını verəcəkdir!
Necə ki verir!
Bəxtiyar SADIQOV
