Paris problemlərlə qarşı-qarşıyadır
Azərbaycanın Vətən müharibəsində qələbəsindən sonra Cənubi Qafqazda yaranan yeni reallıqlarla heç cür barışmayan Fransa Ermənistana daha çox havadarlıq etməyə, eyni zamanda regionda mövcudluğunu qorumaq üçün ölkəmizin daxili işlərinə qarışmağa cəhdlər göstərir. Rəsmi Paris Ermənistanı hər vəchlə münaqişəyə təhrik etməklə vəziyyətin yenidən gərginləşməsinə, regionda öz təsirini saxlamağa çalışır.
Sosial Tədqiqatlar Mərkəzinin əməkdaşı Aqşin Kərimov "Azərbaycan" qəzetinə açıqlamasında deyib ki, Fransa strategiyasının prioritetləri sırasında Cənubi Qafqazda təsir dairəsini yaratmaq da dayanır. Əslində bu, Parisi problemli vəziyyətlə qarşı-qarşıya qoyur. Bunu Azərbaycan və Türkiyəyə qarşı güclü tərəflər formalaşdırmaq istəyən Fransanın səylərinin boşa çıxması bir daha təsdiqləyir: "Bununla belə, Fransa diplomatiyası Azərbaycanla münasibətlər prizmasına söykənməyə də cəhdlər göstərir. Yəni diplomatiya və dialoq Fransa dövlətinin Azərbaycana münasibətdə özünümüdafiə xəttidir, çünki regionda Bakının iştirakı olmadan qurulan əməkdaşlıq modeli uğur qazana bilməz".
Ekspert qeyd edib ki, Fransa səriştəsizləşən Cənubi Qafqaz siyasətində Azərbaycan və Ermənistana münasibətlərini Bakının maraqlarına uyğun nisbiləşdirmək seçimini nəzərdən keçirə bilər. Amma Fransa seçimlərindəki Azərbaycan amili ilə əlaqədar praqmatik bəyanatlar səsləndirmir və bu, onu göstərir ki, Yelisey Sarayında Bakıya qarşı sərt xəttin tərəfdarı olanlar dominant mövqedədirlər. Yelisey Sarayındakı anti-Azərbaycan qüvvələrin hökmranlığı Bakını Parisin səsini dinləməməkdə haqlı olduğunu göstərir. Qlobal idarəçiliyin formatlanması, Fransanın bu idarəçilik modelindən məhdud pay alması fonunda Azərbaycanın addımları daha effektiv olur.
A.Kərimov vurğulayıb ki, Fransa bundan dolayı qüvvələr balansının öz ambisiyaları çərçivəsində yenidən formalaşdırılması üçün Cənubi Qafqazda Ermənistanla dərinləşən əməkdaşlıq nümunəsi yaratmağa çalışır: "Bu isə Cənubi Qafqazda mümkün ekstremal geosiyasi situasiyalarda Fransanın manevr etmək qabiliyyətini yüksəltmir, çünki Parisin bu ssenaridə maraqlarını koordinasiya edə biləcək regional və qlobal güc aktorları fonunda müttəfiqi yoxdur. Deməli, Paris regionda öz ambisiyalarına inteqrasiya edilmiş kritik hədd yarada bilməyəcək və nəticədə Azərbaycanla əməkdaşlığın yenidən nəzərdən keçirilməsinə məcbur olacaq".
Əsmər QARDAŞXANOVA,
"Azərbaycan"
