Əski parçasının Almaniya Prezidentinin sosial media hesabında paylaşılması təsadüfə oxşamır

Almaniya Prezidenti Frank Valter-Ştaynmayerin sosial media hesabında keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub. 

Almaniya Prezidentinin Ermənistana ilk səfəri çərçivəsində belə bir postun paylaşılmasının texniki səhv kimi göstərilməsi inandırıcı görünmür. Ümumilikdə Almaniyanın Ermənistanı bir çox məsələdə müdafiə etdiyi daim diqqət çəkib. Bu da erməni lobbisinin bu ölkəyə təsiri nəticəsində atılan addımlardan birinə bənzəyir. 

Paylaşımdan dərhal sonra iki ölkənin Prezident administrasiyaları və Xarici İşlər nazirlikləri arasında təmaslar başlayıb. Almaniya tərəfi bu postun səhvən yerləşdirildiyini etiraf edərək onu dərhal çıxarıb. Almaniya Prezidenti Administrasiyasının rəhbəri adından ünvanlanmış məktubda yanlış paylaşıma görə üzrxahlıq ifadə olunub. Məktubda Federal Prezidentin sosial media hesabında qısa müddət ərzində Azərbaycanın bir regionuna aid bayrağın yanlış təsviri və onunla bağlı mətn dərc olunduğu və səhv aşkar edildikdən sonra paylaşımın dərhal silindiyi bildirilib. Eyni zamanda bu paylaşımın texniki səhv səbəbindən dərc edildiyi və Almaniyanın Azərbaycanın ərazi bütövlüyünə dair məlum mövqeyi ilə bağlı heç bir məna kəsb etmədiyi vurğulanıb.

Milli Məclisin deputatı Azər Badamov qəzetimizə açıqlamasında bildirib ki, Almaniyanın Prezidenti Frank Valter-Ştaynmayerin Ermənistana səfəri çərçivəsində onun rəsmi "İnstaqram" səhifəsində əski parçasının paylaşılmasının təsadüfən baş verdiyini hesab etmir. O bildirib ki, Almaniyanın ölkəmizdəki səfiri Xarici İşlər Nazirliyinə dəvət olunaraq etiraz bildirildikdən sonra sosial media səhifəsindən əski parçası silinib və Almaniyanın Prezident Administrasiyasının rəhbəri adından Azərbaycan Respublikasının Prezidentinin köməkçisi Hikmət Hacıyevə ünvanlanan məktubda bunun yanlışlıq olduğu bildirilib və üzr istənilib. "Amma sual olunur ki, Almaniyanın "Deutsche Welle" kanalında yayımlanan saxta film də yanlışlıqdan nümayiş etdirilibmi? Filmdə azərbaycanlıların məcburi köçkün və qaçqın vəziyyətində çəkilən kadrların guya ki, ermənilər kimi təqdim olunması ikiüzlülükdən başqa bir şey deyil. Təbii ki, belə təsadüflər olmur. Bütün bu baş verənlərdə ermənilərin əli var və məhz onların ssenarisi üzrə bu məsələlər baş verir", - deyə siyasətçi əlavə edib.

Deputat vurğulayıb ki, ölkəmizə qarşı istiqamətlənmiş təxribat xarakterli heç bir hərəkət cavabsız qalmır. Azərbaycan dövləti beynəlxalq arenada baş verən siyasi prosesləri dərindən izləyir və ölkəmizə qarşı aparılan hər hansı təxribatçı hərəkətin qarşısının alınması üçün dərhal hərəkətə keçərək, adekvat cavablar verməklə ədalətli mövqeyini qarşı tərəfə çatdırır.

Əsmər QARDAŞXANOVA,

"Azərbaycan"