Ötən il qlobal ticarətin həcmi 33 trilyon dollara yüksəlib, artımın üçdə ikisi xidmət ixracındakı 7 faizlik sıçrayışın payına düşüb. Lakin proqnozlara görə, 2025-ci ildə qlobal ÜDM artımı 2,3 faizədək yavaşlaya və yeni risklər yarada bilər. Bu isə regional çeviklik və qarşılıqlı dəstək kimi üstünlükləri daha da aktuallaşdırır.
AZƏRTAC xəbər verir ki, bu sözləri Azərbaycan Banklar Assosiasiyasının prezidenti Zakir Nuriyev II Türk Ticarət Sərgisində çıxışı zamanı deyib.
O bildirib ki, Türk Dövlətləri Təşkilatı (TDT) üzv və müşahidəçi dövlətləri — Azərbaycan, Türkiyə, Türkmənistan, Özbəkistan, Qazaxıstan, Qırğızıstan, Macarıstan və Şimali Kipr Türk Respublikasında ümumilikdə 178,8 milyon nəfər əhali var və 2,1 trilyon dollar nominal ÜDM formalaşdırır.
“Bununla birlikdə, ümumi xarici ticarət dövriyyəsi 1,18 trilyon dollar həcmindədir. Bu göstəricilər qlobal ÜDM-də 1,8 faiz, dünya ticarətində isə 3,5 faiz pay deməkdir”,- deyə o qeyd edib.
Onun sözlərinə görə, 2024-cü ildə Trans-Xəzər Beynəlxalq Nəqliyyat Dəhlizi (Orta Dəhliz) ilə daşınan yüklər 4,5 milyon ton olub, əvvəlki ilə nisbətən 62 faiz artım göstərib: “Bu, Avropa-Asiya ticarətində tranzit müddətini 13 günə qədər azaldır və Süveyş marşrutuna ciddi rəqabət yaradır. Eyni zamanda, Trans-Xəzər qaz kəməri üzrə xərclərin optimallaşdırılması maya dəyərini potensial olaraq 40 faiz aşağı salır, bu isə banklarımız üçün layihə maliyyələşdirməsində uzunmüddətli alətlərə tələbi artırır. Azərbaycan, Qazaxıstan, Qırğızıstan, Macarıstan, Özbəkistan, Türkiyə və Şimali Kipr Türk Respublikasının Banklar Assosiasiyaları olaraq, 2022-ci ildə qurulan Türkdilli Dövlətlərin Banklar Assosiasiyaları Şurası çərçivəsində sıx və səmərəli fəaliyyət həyata keçiririk. Bank sektorlarımızın ümumi aktivlərinin həcmi 1 trilyon 364 milyard dollara yüksəlib ki, bu da əvvəlki ilə nisbətən 15,1 faiz artım deməkdir”.
Gələcək planlardan bəhs edən Z.Nuriyev qeyd edib ki, şura bu fəaliyyətin davam etdirilməsini, eləcə də yeni tərəfdaşlarla Türk dünyası arasındakı iqtisadi və maliyyə əlaqələrinin daha da dərinləşdirilməsinə töhfə verəcək addımları hədəf alıb.
jpg_1749552820.jpg)
jpeg_1765975443.jpeg)
