Son illər zərərli qidaların qəbulu, stres, pis vərdişlər, qida istehsalında kimyəvi maddələrdən və plastikdən istifadə mədə-bağırsaq xəstəliklərinin sürətlə artmasına səbəb olur. Mən də uzun müddət məhz bu xəstəlikdən əziyyət çəkən insan kimi çox ağrı-acılar yaşamışam.
Açığını deyim ki, bir neçə qastroenteroloqa etdiyim müraciətlərin nəticəsiz qalması, müalicə kurslarının xəstəliyimə təsir göstərməməsi məni çox qorxudurdu. Səhhətim get-gedə ağırlaşırdı. Bir gün sanki Tanrı mənə doğru yol göstərdi. Amma nədənsə ümidsiz idim, iynə-dərman qəbul etməkdən bezmişdim. Aliə üzvlərimin təkidlərindən sonra "sonuncu şans" deyib həkim-qastroenteroloq, psixoloq Sevda Ağayevaya müraciət etdim. Səmimi etiraf edim ki, həkimin mənimlə ilk söhbəti, təhlili müayinələrdən sonra verilən analizlərin cavablarına baxıb söylədiyi ümid dolu fikirləri məndə təəccüb doğurdu. Xoş nəvazişi ilə məsləhətlər verdikdən sonra "narahat olma, qorxulu bir şey yoxdur, düzgün müalicə ilə sağalacaqsan" söyləməsi, açığını deyim, ürəyimə təpər gətirdi. Beləliklə, müalicəmə başladım.
Sevda Ağayeva həqiqətən də əsl həkim olduğunu öncə insanlığı, şəfqəti,sonra isə bacarığı, istedadı ilə sübuta yetirdi. Çünki onun fədakarlıqla çəkdiyi zəhmətin, uğurlu fəaliyyətin və insanlara ehtiramla yanaşma tərzinin özünəməxsusluğu tam başqadır. Sevda Ağayeva öz işini dərindən bilən peşəkar psixoloqdur. Ağrı, qorxu və təlaş içində gələn xəstələrlə səbirlə davranmağı, onları sakitləşdirməyi, onlarda ümid yaratmağı bacarır. Bunun bir səbəbi də odur ki, Sevda həkim xəstələri müasir üsullarla müalicə edir. Çünki o, xaricdə biliklərini artıran, yenilikləri öyrənən, Azərbaycanı beynəlxalq tibb aləmində layiqincə təmsil edən həkimlərdəndir. O, dürüstlüyü, insanpərvərliyi və qayğıkeşliyi ilə özünə xəstələrin sevgisini, hörmətini qazandıran peşəkar qastroenteroloqdur. Həyatımı ağır xəstəlikdən qurtaran Sevda xanıma dərin minnətdarlığımı bildirirəm.
Aytəkin MƏMMƏDZADƏ,
Bakı şəhər sakini
