Beş ilə yaxındır ki, Şuşa azaddır. Ancaq hələ də Prezident, Silahlı Qüvvələrin Ali Baş Komandanı İlham Əliyevin 2000-ci il noyabrın 8-də xalqa müraciətində verdiyi o müjdənin sevincini və qürurunu yaşayırıq: "Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik!"
İllər ötdükcə bu qürura, bu sevincə yeni-yeni uğurlar qoşulur. İşğaldan azad edilmiş Şərqi Zəngəzurun və Qarabağın digər yerləri kimi, Şuşa şəhərində də dövlətimiz tərəfindən geniş tikinti-bərpa və yenidənqurma işləri həyata keçirilir. Azərbaycan mədəniyyətinin paytaxtı, Qarabağın baş tacı Şuşaya verilmiş vəd yerinə yetirilir. Şəhər yenidən dirçəlir. Tarixi binaları bərpa olunur, Şuşa öz əvvəlki görkəminə qayıdır. Qədim küçələrində yenidən əsrarəngiz musiqi sədaları eşidilir.
Vətən müharibəsindən sonra dövlət başçısı çıxışlarında erməni təcavüzkarlarının işğalına uğradıqdan sonra Şuşada yarımçıq qalan silsilə beynəlxalq tədbirlərin yenidən keçiriləcəyini də qeyd etmişdi. Bu gün Şuşa ölkəmizin beynəlxaq tədbirlərin keçirildiyi məkanlarından biridir.
Bu qədim şəhərin qəsbkar ermənilər tərəfindən işğal olunması nəticəsində yarımçıq qalmış ənənəvi tədbirlərdən biri olan "Xarıbülbül" Musiqi Festivalı da Şuşaya qayıdıb. Xatırladaq ki, Şuşanın rəmzi olan gülün adını daşıyan bu beynəlxalq tədbir 1989-cu ildən keçirilirdi. Qarabağ münaqişəsi dövründə əsas konsertlər Ağdam, Bərdə və Ağcabədidə təşkil edilirdi. Vətən müharibəsindəki tarixi zəfərimizdən sonra festival yenidən Şuşada düzənlənir.
Mayın 24-də Azərbaycanın mədəniyyət paytaxtı növbəti ildə çal-çağıra büründü. Heydər Əliyev Fondu və Mədəniyyət Nazirliyinin təşkilatçılığı ilə Şuşada VIII "Xarıbülbül" Beynəlxalq Musiqi Festivalı öz işinə başladı. Festivalın əsas məqsədlərindən biri əvvəlki kimi mədəni dialoqun inkişafına töhfə vermək, mütəxəssislər arasında fikir mübadiləsini təşviq etmək və gənc musiqiçilərin yaradıcılığını dəstəkləməkdir.
Builki festival Üzeyir bəy Hacıbəylinin anadan olmasının 140-cı ildönümünə həsr edilib. Cıdır düzündəki açılış konsertində ilk olaraq Üzeyir bəy Hacıbəylinin "Ey Vətən" əsəri səslənib. Sonra Üzeyir bəy Hacıbəyli, Arif Məlikov, Asəf Zeynallı, Əfrasiyab Bədəlbəyli, Fikrət Əmirov, Qara Qarayev, Müslüm Maqomayev, Niyazi, Oqtay Zülfüqarov, Tofiq Quliyevin əsərləri təqdim olunub.
Ənənəvi musiqi tədbiri çərçivəsində yerli incəsənət xadimləri, eləcə də digər ölkələrdən gəlmiş musiqi kollektivləri və solo ifaçılar iştirak ediblər. Azərbaycan, Türkiyə, Qazaxıstan və Qırğızıstan incəsənət xadimlərinin çıxış etdikləri açılış konsertində Şuşanın gözəl memarlıq incilərindən biri - Xan qızı Natəvanın sarayının qarşısında Azərbaycan Dövlət Mədəniyyət və İncəsənət Universitetinin tələbələrinin ifasında "Babalı Sərvərin boynuna" adlı teatr tamaşası nümayiş olunub. Tamaşa Üzeyir bəyin felyetonları əsasında hazırlanıb. Tədbir iştirakçıları qeyd ediblər ki, belə layihələr Şuşanın mədəni həyatına rəng qatır, milli irsin qorunması və təbliği baxımından xüsusi əhəmiyyət daşıyır. Həmçinin tamaşa gənc istedadların dəstəklənməsi və səhnə təcrübəsinin artırılması baxımından da uğurlu təşəbbüs hesab edilib.
Beynəlxalq festival çərçivəsində bu il ölkəmizdə ikinci dəfə Uşaq İncəsənət Festivalının (UİF) xüsusi zonası yaradılıb. "UİF - 2023"ün qalibləri həmin məkanda öz istedad və bacarıqlarını nümayiş etdiriblər. Uşaq İncəsənət Festivalının ilk dəfə 2023-cü ildə Ümummilli Lider Heydər Əliyevin 100 illik yubileyi münasibətilə keçirildiyini qeyd edən Mədəniyyət Nazirliyinin əməkdaşı Kənan İbrahimov tədbirdə müxtəlif nominasiyalar üzrə incəsənətdə fərqlənən uşaqların qalib seçildiklərini diqqətə çatdırıb. Bildirib ki, ümumilikdə 20-dən artıq qalib iştirak edir, eyni zamanda Şuşa şəhərində yaşayan uşaqlar, şəhər sakinləri və şəhərin qonaqları üçün xüsusi, interaktiv zonalar yaradılıb.
Tədbirdə "UİF-2025"in guşəsində yerli sakinlər və mədəniyyət paytaxtımızın qonaqları arasında könüllü şəkildə öz bacarıqlarını nümayiş etdirmək istəyən uşaqlar və yeniyetmələr səhnəyə çıxıblar. Ərazidə qurulmuş oyun zonasında zəka oyunlarına, interaktiv əyləncə guşələrinə və yaradıcı fəaliyyət sahələrinə uşaqların marağı böyük olub.
İştirakçılar axşam saatlarında ocaq başında bir araya gəliblər. Şeir, musiqi və nağılvari çıxışlar xoş ovqat yaradıb. Gecənin sonunda "Mədəniyyət səninlə tanınır!" mesajı festivalın mənəvi kulminasiya nöqtəsi olub.
Festival mayın 25-də də maraqlı təqdimatlarla davam edib. Cıdır düzündə Qarabağ Universitetinin İncəsənət fakültəsinin tələbələrinin ifasında Azərbaycan və xarici bəstəkarların əsərlərindən ibarət musiqi proqramı təqdim olunub.
Həmin gün Şuşada "Xarıbülbül" VIII Beynəlxalq Musiqi Festivalı çərçivəsində Üzeyir Hacıbəyli adına Azərbaycan Dövlət Simfonik Orkestrinin müşayiəti ilə görkəmli Azərbaycan müğənnisi, bəstəkarı və aktyoru, Azərbaycanın Xalq artisti, Milli Məclisin deputatı Polad Bülbüloğlunun konserti keçirilib. Polad Bülbüloğlu jurnalistlərə açıqlamasında bildirib: "Bu 30 il ərzində hər zaman deyirdim ki, böyük sənətkarlarımız - xüsusən də Şuşadan çıxan sənətkarlarımız narahat idilər. Bildiyiniz kimi, işğal dövründə iki dəfə Şuşada olmuşam və bu, mənim üçün çox çətin idi. Şəxsən atamın yurdunu, evini bu vəziyyətdə görmək çox ağır olub. Şükürlər olsun ki, artıq bütün bu çətinliklər geridə qaldı. Prezident İlham Əliyevin rəhbərliyi ilə Azərbaycan xalqı böyük bir Qələbə qazandı. Allah şəhidlərimizə rəhmət eləsin, qazilərimizə cansağlığı və uzun ömür versin".
Tədbirdə daha sonra Xalq artisti Mənsum İbrahimovun ifasında muğam və xalq mahnılarımız təqdim edilib.
Qeyd edək ki, mayın 24-25-də təşkil olunmuş "Xarıbülbül" Beynəlxalq Musiqi Festivalı Şuşanın tarixində daha bir unudulmaz iz qoyub.
Zöhrə FƏRƏCOVA,
"Azərbaycan"
jpg_1749076194.jpg)
