Azərbaycanın BMT-nin Asiya və Sakit okean üzrə İqtisadi və Sosial Komissiyasının (UNESCAP) 82-ci sessiyasına sədr seçilməsi ölkəmizin beynəlxalq müstəvidə artan nüfuzunun və ona olan yüksək etimadın bariz göstəricisidir. Bu mühüm hadisəni bir neçə əsas istiqamət üzrə şərh etmək olar. UNESCAP-a sədrliyin Azərbaycana həvalə olunması ölkəmizin dayanıqlı inkişaf, inklüzivlik və çoxvektorlu əməkdaşlıq gündəliyinə verdiyi töhfələrin beynəlxalq səviyyədə yüksək qiymətləndirilməsini təsdiq edir. Bu həm də Azərbaycanın beynəlxalq arenada etibarlı tərəfdaş kimi qəbul edildiyini göstərir.
Milli Məclisin deputatı Pərvanə Vəliyeva qəzetimizə açıqlamasında bildirib ki, ölkəmiz, eyni zamanda Türk Dövlətləri Təşkilatına, Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrlik edir. Bundan əvvəl isə Azərbaycan COP29 kimi mötəbər qlobal tədbirə evsahibliyi etməklə öz xarici siyasətinin uğurlarını nümayiş etdirib. Məhz COP29 bu günədək keçirilmiş COP-lar tarixində ən uğurlulardan biri olaraq, iqlim diplomatiyasında dönüş yarada bilib. "Qoşulmama Hərəkatı Gənclər Təşkilatının mənzil-qərargahının Bakıda yerləşməsi, onun Parlament Şəbəkəsinin qurulması, Azərbaycanın 140-dan çox ölkəyə humanitar və texniki yardım göstərməsi də bu etimadın tərkib hissəsidir. Parlament Şəbəkəsi üzrə qərargah da Bakıda yerləşəcək".
Deputat qeyd edib ki, UNESCAP-ın 82-ci sessiyasında Azərbaycan tərəfindən irəli sürülmüş və qəbul olunmuş "Bakı-Banqkok Bəyannaməsi" sosial inkişafın təşviqi istiqamətində regional əməkdaşlığa yeni dinamika gətirəcək. Bu, Azərbaycanın qlobal problemlərin həllində praktiki həllər təklif edən bir ölkə imicini gücləndirir. "Azərbaycanın Orta dəhliz vasitəsilə Asiya və Avropanı birləşdirən mühüm nəqliyyat və rəqəmsal qovşağa çevrilməsi onun regionun iqtisadi arxitekturasında vacibliyini artırır. Eyni zamanda Ermənistanla sülh gündəliyinin irəli aparılması və suverenliyin tam bərpası, Cənubi Qafqazda yaranmış yeni reallıqların beynəlxalq birlik tərəfindən qəbulu Azərbaycanın regional sabitləşdirici roluna olan inamı daha da dərinləşdirir", - deyə o əlavə edib.
P.Vəliyeva vurğulayıb ki, gələn ay Bakıda keçiriləcək Ümumdünya Şəhərsalma Forumunun (WUF13) 13-cü sessiyası da Azərbaycanın bu sahədəki təcrübəsinə olan beynəlxalq marağın göstəricisidir. Bu kontekstdə dayanıqlı inkişaf sahəsində ölkəmizin həyata keçirdiyi unikal layihələr, şəhərsalma təcrübələri də BMT-in 11-ci Dayanıqlı İnkişaf Məqsədi ilə üst-üstə düşür.
UNESCAP-a sədrlik Azərbaycanın həm iqtisadi gücünü, həm də diplomatik çevikliyini birləşdirərək qlobal idarəetmədə öz sözünü deyən nüfuzlu bir dövlətə çevrildiyini təsdiqləyir.
Əsmər QARDAŞXANOVA,
"Azərbaycan"
