Ukraynada “Patriot” sistemləri üçün nəzərdə tutulan PAC-3 raketlərinin çatışmazlığı davam edir, lakin ABŞ-dan tədarük dayanmır. Bununla yanaşı, Kiyev yeni həllər üzərində işləyir.
AZƏRTAC xəbər verir ki, bunu Ukrayna Prezidenti Volodimir Zelenski Kiyevdə NATO-nun baş katibi Mark Rütte ilə birgə mətbuat konfransında bildirib.
V.Zelenski qeyd edib ki, Ukraynada PAC-3 raketlərinin çatışmazlığı bu gün yaranmayıb. Onun sözlərinə görə, əvvəllər tərəfdaşlar bu raketləri tələb olunan həcmdə verirdilər, lakin Yaxın Şərqdə münaqişə başlayandan sonra vəziyyət dəyişib.
“Biz tərəfdaşlardan PAC-3 raketlərini lazımi həcmdə alırdıq. Lakin sonradan ay ərzində verilən raketlərin sayı bir neçə dəfə azaldıldı. Bu, vəsait çatışmazlığı ilə bağlı deyildi. Buna baxmayaraq, Yaxın Şərqdə münaqişə başlayandan sonra raketlərin sayı azaldı”, – deyə Ukrayna lideri qeyd edib.
Dövlət başçısı vurğulayıb ki, tədarükün azalması təkcə PAC-3 raketlərinə deyil, digər silah növlərinə də təsir edib. Tələbatın bir hissəsini Ukrayna istehsalı hesabına qarşılamaq mümkün olub, lakin PAC-3 raketlərini əvəz etmək hələ ki mümkün deyil.
“Müxtəlif ölkələrlə dron sazişləri də bağlamışıq ki, tərəfdaşlar ballistik raketlərin vurulmasına kömək edə biləcək vasitələri təqdim etsinlər”, – deyə o əlavə edib.
Digər fəaliyyət istiqamətlərindən biri də “Patriot” sistemlərinin istehsalı üçün lisenziyanın alınması ilə bağlı ABŞ-la aparılan danışıqlardır.
Onun sözlərinə görə, “Patriot” sistemlərinin Ukraynada və ya Avropadakı müttəfiqlərlə birlikdə istehsalı dövlətin və bütövlükdə Avropanın müdafiə imkanlarının gücləndirilməsi istiqamətində əlavə addım olardı.
“Bu, ABŞ Prezidentinin Avropanın öz müdafiəsi üçün lazım olan imkanları özünün gücü hesabına formalaşdırması ilə bağlı yanaşmasına uyğundur. Biz bundan sonra da diqqətimizi bu məsələyə yönəldəcəyik. ABŞ-yə bu mesajın çatdırılmasına kömək edən bütün tərəfdaşlara minnətdaram. Biz həm Avropaya, həm Amerikaya, həm də müttəfiqlərə fayda verəcək məhsulları istehsal edə bilərik. Bu, ilk növbədə “Patriot” sistemlərinə aiddir”, – deyə Ukrayna Prezidenti yekunlaşdırıb.
M.Rütte öz növbəsində bildirib ki, PAC-2 və PAC-3 raketləri Ukraynanın Rusiya hava hücumlarından müdafiəsində əsas vasitələrdən biri olaraq qalır. Onun sözlərinə görə, bu sursatların ABŞ-dən tədarükü davam edir.
“Yaxşı xəbər ondan ibarətdir ki, bu mühüm raketlərin ABŞ-dən Ukraynaya göndərilməsi hər gün və hər həftə davam edir”, – deyə o vurğulayıb.
NATO-nun baş katibi qeyd edib ki, Ukraynanın hava hücumundan müdafiə sistemi effektiv fəaliyyət göstərsə də, Rusiya qoşunları hələ də zərbələr endirə bilir. Bununla yanaşı, raketlərin əhəmiyyətli hissəsi məhz “Patriot” sistemləri sayəsində məhv edilir.
Müttəfiqlər həmçinin Ukraynaya raket tədarükünü təmin edən PURL proqramının maliyyələşdirilməsini davam etdirməyə hazır olduqlarını təsdiqləyiblər.
“Lakin hər zaman intensiv hərbi əməliyyatların mövcud ehtiyatlara təsir göstərməsi riski var. Bununla belə, bu, PURL proqramına təsir etmir. İstehsal artırılacaq ki, anbarlarımızda olan vasitələri tədarük edə bilək”, – deyə M.Rütte əlavə edib.
