Yazıçı-dramaturq Hüseynbala Mirələmovun qələmindən çıxan üç yeni kitabın - "Ruhum, gözlərini yum...", "Eşqin rəngləri" və "Bəyaz buludlar üstdə" əsərlərinin təqdimatı keçirilib. Müxtəlif mövzulara həsr olunan bu romanları birləşdirən əsas xətt insanın mənəvi aləminə, vicdanına, sevgisinə və həyat qarşısında etdiyi seçimlərə müəllif baxışıdır.
Mərasimi giriş sözü ilə açan akademik Nizami Cəfərov Hüseynbala Mirələmovun Azərbaycan ədəbiyyatındakı bənzərsiz üslubundan bəhs edib. O, müəllifin yeni işıq üzü görən əsərlərində insanın daxili dünyası, mənəviyyatı, sevgisi və həyat amallarına tamamilə yeni bir baxış bucağından yanaşdığını diqqətə çatdırıb. Əlavə edib ki, yaradıcılığında mənəvi meyarları hər zaman ön plana çəkən yazıçı bu dəyərləri qəhrəmanların daxili sarsıntıları, çarpışmaları və taleyüklü seçim anları fonunda işıqlandırır.
Mərasimdə iştirak edən Azərbaycan Yazıçılar Birliyinin sədri, Xalq yazıçısı Anar, Milli Məclisin komissiya sədri Eldar İbrahimov, millət vəkili Ziyad Səmədzadə, Xalq yazıçısı Çingiz Abdullayev, Xalq şairi Sabir Rüstəmxanlı, Mətbuat Şurasının sədri Rəşad Məcid və digər natiqlər yazıçının vətəndaşlıq mövqeyini, mövzu dairəsinin genişliyini və çoxşaxəli yaradıcılığını xüsusi qeyd etdilər. Diqqətə çatdırıldı ki, H.Mirələmovun yaradıcılığı beynəlxalq aləmdə də böyük rəğbətlə qarşılanır. Təsadüfi deyil ki, yazıçının kitabları dünyanın 50-dən çox ölkəsində müxtəlif dillərə tərcümə olunaraq nəşr edilib.
Tədbirin bədii hissəsində Akademik Milli Dram Teatrının aktyoru Kazım Həsənquliyev müəllifin "Vəsiyyət" pyesindən monoloq ifa etdi. Tədbir yeni əsərlər ətrafında müzakirələrlə yekunlaşdı.
Qeyd edək ki, romanların hər biri tamamilə fərqli mövzulardan bəhs edir. Lakin oxucu onların daxili məzmununa diqqət yetirdikdə vahid bir fəlsəfi bağ görür. Yazıçı hər 3 əsərində insan varlığını, onun vicdan sınaqlarını, saf duyğularını və həyat yolunda etdiyi taleyüklü seçimləri araşdırır. Müəllifin baxışı bəşəridir, lakin milli köklərə bağlıdır.
Müasir dünyamız sürətlə rəqəmsallaşır. Süni intellekt və yüksək texnologiyalar həyatımızın hər bir sahəsinə daxil olur. Hüseynbala Mirələmov məhz bu qlobal mövzuya toxunaraq "Ruhum, gözlərini yum..." adlı dərinməzmunlu bədii-fəlsəfi roman yazıb. Müəllif əsərində texnoloji tərəqqiyə qarşı çıxmır, əksinə, elmin tibb, təhsil, sənaye və gündəlik məişətdə insanlara gətirdiyi rahatlığı yüksək qiymətləndirir. Romanın gələcəyə baxışı kifayət qədər nikbindir. Amma yazıçını düşündürən daha böyük bir sual var: maşınlar və alqoritmlər insanın daxili dünyasını əvəz edə bilərmi?
Əsərin baş qəhrəmanı Leo ideal və qüsursuz bir varlıq yaratmaq eşqinə düşür. Onun bu istəyi elmlə mənəviyyat arasındakı incə cizgini üzə çıxarır. Leo dramatik hadisələrin içindən keçərək anlayır ki, heç bir süni zəka insan qəlbinin dərinliyini, onun mərhəmət, sevgi və vicdan kimi ali hisslərini təqlid edə bilməz. Kitab bəşəriyyətə bir xəbərdarlıqdır: texnologiya nə qədər qüdrətli olursa-olsun, insanı insan edən dəyərlər toxunulmaz qalmalıdır.
Müəllifin "Eşqin rəngləri" romanı isə tamamilə fərqli bir müstəvidə, yəni psixoloji və fəlsəfi müstəvidə yazılıb. Burada diqqət mərkəzində insan qəlbinin ən gizli və incə telləri dayanır. Yazıçı sevgiyə adi bir hiss kimi yanaşmır. Onun təqdimatında eşq insanı tərbiyə edən, kamilləşdirən və mənəvi cəhətdən bütövləşdirən müqəddəs bir qüvvədir. Romanda sədaqət imtahanı, daxili tərəddüdlər çox böyük ustalıqla təsvir olunub. Hüseynbala Mirələmov özünəməxsus yazı tərzi ilə oxucuya çatdırır ki, insan ömrünü mənalı edən, ona ən gözəl rəngləri bəxş edən məhz daxili saflıq və qarşılıqlı hörmətdir.
Üçlüyün sonuncu fəlsəfi nümunəsi "Bəyaz buludlar üstdə" əsəridir. Bu kitab həyatın çətin, mürəkkəb sınaqları ilə üz-üzə qalan insanların taleyi barədədir. Yazıçı qəhrəmanlarının daxili dünyasını sanki bir psixoloq kimi analiz edir: hər bir insan həyatda çətinliklərlə qarşılaşır və əsas məsələ bu çətinliklər qarşısında sınmamaq, əxlaq dəyərlərini qoruyub saxlamaqdır. Müəllif oxucuya aşılayır ki, insanın ən böyük rəhbəri onun vicdanı və məsuliyyət hissidir. Obrazların qarşılaşdığı mənəvi maneələr bədii boyalarla elə təsvir edilib ki, hər bir oxucu orada öz həyatından bir parça tapa bilir.
Hüseynbala Mirələmovun qələmindən çıxan əsərlər hər zaman oxucu auditoriyasının diqqət mərkəzində olub. Müəllifin bir çox əsərləri teatr səhnələrində oynanılıb, filmlərə mövzu olub. Onun yeni əsərləri də oxucular üçün dəyərli xəzinədir.
Təhminə VERDİYEVA,
"Azərbaycan"
jpg_1784929613.jpg)
