Teatrlar yay mövsümünə çıxır. Azərbaycan Dövlət Akademik Musiqili Teatrı da ötən mövsümü uğurla başa vurub. Teatrdan verilən məlumata görə, iyulun 18-də 116-cı teatr mövsümünün bağlanışı münasibətilə tamaşaçılara "Operetta inciləri" konsert proqramı təqdim olunub. Konsert proqramı tamaşaçılar tərəfindən alqışlarla qarşılanıb.
Proqramda Azərbaycanın görkəmli bəstəkarları Üzeyir bəy Hacıbəyli, Tofiq Quliyev, Fikrət Əmirov, Süleyman Ələsgərov, Ramiz Mustafayev, Rauf Hacıyev, Vasif Adıgözəlov, Emin Sabitoğlu, Oqtay Kazımi və Sərdar Fərəcovun, eləcə də xarici ölkə bəstəkarları İohann Ştraus, Frans Leqar, İmre Kalman, Alice Dona və Rikardo Koçantenin məşhur əsərlərindən seçilmiş ariya və duetlər səsləndirilib.
Dirijor, Əməkdar incəsənət xadimi Fəxrəddin Atayevin rəhbərlik etdiyi teatrın simfonik orkestrinin müşayiəti ilə keçirilən konsertdə Əməkdar artistlər Nadir Xasiyev, Nərgiz Kərimova, Səidə Şərifəliyeva, Prezident mükafatçısı Ülviyyə Əliyeva, Firus Məmmədov, Mehriban Zaliyeva, Şaban Cəfərov, Eleonora Mustafayeva, Səmədzadə Xasiyev, Emin Zeynallı, Nərmin Əliyeva, Gültac Əlili, Əli Kərimov, Olqa Giorgiyeva, İlahə Rüstəmova və Orxan Hüseynli, solo tar ifaçısı Əməkdar artist Elxan Mansurov, eləcə də xor artistləri çıxış ediblər.
Bağlanış mərasiminin quruluşçu rejissoru Cavid İmamverdiyev, xormeysteri Əməkdar artist Vaqif Məstanov, rejissor assistenti Sevinc Məmmədovadır.
Azərbaycan Dövlət Akademik Musiqili Teatrının yaradıcı kollektivi 117-ci teatr mövsümündə də yeni və maraqlı tamaşalarla tamaşaçılarını sevindirəcək.
Vahid MƏHƏRRƏMOV,
"Azərbaycan"
jpg_1784929613.jpg)
