Ağdamda Prezident İlham Əliyevin 2020-ci il 2 dekabr tarixli Sərəncamına əsasən təsis edilən Anım Günü ilə əlaqədar tədbir keçirilmişdir. Tədbirdə Ağdam Rayon İcra Hakimiyyətinin başçısı Vaqif Həsənov, aparatın əməkdaşları, YAP Ağdam rayon təşkilatının sədri Mansur Quliyev, şəhid ailələri, qazilər, hüquq mühafizə orqanlarının, idarə, müəssisə və təşkilatların rəhbərləri, din xadimləri, ictimaiyyət nümayəndələri və rayon sakinləri iştirak etmişlər.
Tədbir iştirakçıları əvvəlcə Şəhidlər Abidə Kompleksində şəhidlərin xatirəsinə ucaldılmış lövhənin önünə gül dəstələri düzərək onların əziz xatirəsini yad etmiş, ruhlarına dualar oxumuşlar. Daha sonra Quzanlı qəsəbəsində yerləşən Şəhidlər Xiyabanını ziyarət edən iştirakçılar şəhidlərin məzarları üzərinə gül dəstələri düzərək onların ruhlarına dualar oxumuş, əziz xatirələrini ehtiramla yad etmişlər. Şəhidlər Xiyabanında keçirilən anım mərasimi Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycanın ərazi bütövlüyü uğrunda şəhid olmuş Vətən övladlarının xatirəsi bir dəqiqəlik sükutla yad edilib.
Mərasimdə çıxış edən Ağdam Rayon İcra Hakimiyyətinin başçısı Vaqif Həsənov 27 sentyabr 2020-ci il tarixində Ermənistanın cəbhəboyu genişmiqyaslı təxribatına cavab olaraq Azərbaycan Ordusunun həyata keçirdiyi əks-hücum əməliyyatlarından, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan tarixi Zəfərdən bəhs edib.
Qeyd olunub ki, Vətən müharibəsi Azərbaycanın ərazi bütövlüyünün bərpası ilə nəticələnib. 2023-cü il 19-20 sentyabr tarixlərində həyata keçirilən lokal xarakterli antiterror tədbirləri nəticəsində isə Qarabağda yerləşən qanunsuz erməni silahlı birləşmələrinin tərksilah edilməsi təmin olunub və Azərbaycanın suverenliyi onun bütün ərazisində bərpa edilib.
Anım Günü ilə əlaqədar rayon ərazisindəki müxtəlif qəbiristanlıqlarda dəfn edilmiş şəhidlərin məzarları da ziyarət olunub, onların xatirəsi ehtiramla yad edilib.
Anım mərasimindən sonra Ağdam Rayon İcra Hakimiyyətinin başçısı Vaqif Həsənov şəhid ailələri ilə birlikdə Quzanlı qəsəbəsində RİH tərəfindən şəhidlərin xatirəsinə inşa edilmiş mərasim evində təşkil olunan ehsan süfrəsində iştirak edib.
Şəhid ailələri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.
Həmçinin saat 12:00-da respublikanın bütün ərazisində olduğu kimi, Ağdam rayonunda da şəhidlərin əziz xatirəsi bir dəqiqəlik sükutla yad edilib.
Lazım QULİYEV,
“Azərbaycan”
jpg_1790595345.jpg)
