...Öz şəxsi minik maşını ilə şəhərdən təbiət qoynuna istirahətə gələn gənc ailənin təxminən bir yaşlı körpəsinin yolda yorulduğundanmı, yoxsa havasını-suyunu dəyişdiyindənmi yuxusu pozulmuşdu. Valideynlərin narahatlığı qonşu kottecdəki yaşlı qadının diqqətindən yayınmadı, odur ki, onlara sarı gəldi.
- Evdə bu uşağı necə yuxuya verirsən, qızım?, - deyə qadın körpənin anasından xəbər aldı.
Uşağın anası cavab verməyə macal tapınca atası əlində tutduğu mobil telefonun ekranını sığallamaqla oradan mahnı səsi gəldi:
Dandini, dandini dastana,
Danalar girmiş bostana...
Lakin "bostana girən danalar" balaca oğlanı daha da ürkütdü.
"Ay lüli, ay lüli, ay da lüleçki lüli", - deyə yutubdan dad qoparan rus nənə də uşağı uyuda bilmədi. Növbə çatdı "Beybi şarka". Körpə totuq əlini telefona uzadaraq orada ingiliscə oxuyan qızı sanki özündən uzaqlaşdırmaq istəyirdi.
Öz nəvələri çoxdan böyümüş yaşlı qadın birinci dəfədir belə bir çoxdilli popuri dinlədiyindən mat-məəttəl qalmışdı. Birdən nə fikirləşdisə, əllərini uşağa sarı uzadıb onu anasından aldı, ehmallıca qucağına götürüb kəlağayısının ucu ilə körpənin alnını sığallaya-sığallaya həzin səslə oxumağa başladı:
Layla dedim yatasan,
Qızılgülə batasan,
Qızılgüllər içində
Şirin yuxu tapasan.
Göz qapaqları yavaş-yavaş qovuşmağa başlayan körpə elə bil, doğrudan da, qızılgül ətrindən məst olurdu...
Bu, laylalarımızın saçdığı ətir idi. Bu, analarımızın saf duyğularının, balası ilə bağlı tükənməyən arzularının əks-sədası olan bənzərsiz bir nəğmə idi. Bu, ana südü ilə bərabər qanımıza, canımıza hopan sonsuz sevginin, yaşamaq eşqinin ifadəsi, izahı çətin olan bir hikmət, bir həyat fəlsəfəsi idi. Bu, ana laylası idi!
Təəssüf ki, bu gün laylalarımız unudulur. Gənc analar layla deyə bilmirlər, bəlkə də, sadəcə, demək həvəsində deyillər. Mübahisə edə bilərik ki, heç universitetin filologiya fakültəsini bitirmiş, yəni folklorla yaxından tanış olan xanım da balasına layla çalmır. Bunu maraq üçün yeddi gənc ana arasında keçirdiyimiz kiçik sorğu da təsdiqlədi.
Nərgizi üzüm layla,
Telinə düzüm layla,
Sən böyü, mən qocalım,
Toyunda süzüm layla.
Bayatı şəklində belə gözəl laylalarımız olduğu halda nə üçün uşaqlarımıza yutub kanallarından əcnəbi mahnılar səsləndiririk? Üzərində düşünməli hal deyilmi?
Flora SADIQLI,
"Azərbaycan"
677jpg_1790033437.jpg)
jpg_1790033330.jpg)
