"Son dövrlər ölkəmizin dünyada artan nüfuzu Balkan dövlətləri ilə ikitərəfli əməkdaşlığın inkişafına da müsbət təsir göstərib. Bu müsbət tendensiya Azərbaycan-Şimali Makedoniya əlaqələrində də müşahidə olunur ".  

Bu sözləri "Azərbaycan" qəzetinə Milli Məclisin deputatı Zaur Şükürov deyib. O bildirib ki, Şimali Makedoniya 25 iyun 1995-ci ildə Azərbaycanın müstəqilliyini tanıyıb, 28 iyun 1995-ci ildə isə iki ölkə arasında diplomatik münasibətlər qurulub. Məhz həmin tarixdən dostluq və əməkdaşlıq əlaqələri ardıcıl şəkildə inkişaf edib və 2023-cü ildən yeni mərhələyə yüksəlib. 

Bu il iki ölkə arasında diplomatik münasibətlərin qurulmasının 30 illiyinin qeyd ediləcəyini vurğulayan deputat əlavə edib ki, hazırda Azərbaycan-Şimali Makedoniya münasibətləri dostluq və əməkdaşlıq prinsiplərinə əsaslanaraq qarşılıqlı maraq doğuran müxtəlif sahələri əhatə edir: "Heç şübhəsiz, ali və yüksəksəviyyəli səfərlər əlaqələrin inkişafında vacib amillərdən biridir. Bu baxımdan Şimali Makedoniya Prezidenti Qordana Silyanovska-Davkovanın ölkəmizə rəsmi səfəri iki ölkə arasında münasibətlərin davamlı inkişafına mühüm töhfə verəcək. Prezident İlham Əliyevin mətbuata verdiyi bəyanat iki ölkə arasındakı münasibətlərin strateji inkişafı imkanlarını təqdim etməklə gələcək əməkdaşlıq perspektivlərinin müəyyən edilməsi baxımından mühüm əhəmiyyət daşıyır. Bu səfər və səsləndirilən bəyanatlar onu deməyə əsas verir ki, Azərbaycan və Şimali Makedoniya əməkdaşlığı yalnız ikitərəfli formatla məhdudlaşmır, həm regional, həm də qlobal məsələlərdə ortaq maraqlara əsaslanır".

Z.Şükürov qeyd edib ki, dövlət başçısının bildirdiyi kimi, indiyədək ticari-iqtisadi sahədə böyük nəticələr əldə olunmasa da, Şimali Makedoniya Prezidentinin rəsmi səfəri və nümayəndə heyətlərinin səmərəli görüşləri bu istiqamətdə də  inkişafa mühüm töhfə verəcək. Prezident İlham Əliyev Azərbaycan və Şimali Makedoniya arasındakı dostluq əlaqələrinin möhkəmlənməsi, eləcə də iqtisadi, enerji və mədəni əməkdaşlığın genişləndirilməsi istiqamətində atılan addımların əhəmiyyətini vurğulayıb. Xüsusilə danışıqlarda enerji təhlükəsizliyi məsələsində Azərbaycanın Avropanın etibarlı tərəfdaşı kimi rolu və bu kontekstdə Şimali Makedoniya ilə əməkdaşlıq imkanlarının genişləndirilməsi əsas müzakirə mövzularından biri olub. 

Deputat bildirib ki, Avropada Azərbaycan qazına ehtiyac var və Bakıda imzalanmış Avropa İttifaqı ilə Azərbaycan arasında energetika sahəsində strateji tərəfdaşlıq Bəyannaməsi bunun bariz nümunəsidir. Bu gün Azərbaycan qazı bir çox Avropa ölkəsinin enerji təhlükəsizliyini təmin edir. Azərbaycan hazırda Avropaya enerji resurslarının tədarükündə mühüm aktor kimi çıxış edərək bu qitənin 10 ölkəsinə təbii qaz ixrac edir. "Dövlət başçımız siyasi dialoqun inkişaf etdirilməsinin vacibliyini qeyd edərək beynəlxalq təşkilatlar çərçivəsində qarşılıqlı dəstəyin əhəmiyyətini də vurğulayıb. Azərbaycanın Qoşulmama Hərəkatında və digər beynəlxalq platformalarda fəal iştirakı, eləcə də regional və qlobal sabitliyə töhfə vermək məqsədilə göstərdiyi səylər Şimali Makedoniya ilə münasibətlərdə də öz əksini tapır. Xatırladaq ki, Prezident İlham Əliyevin keçən il noyabrın 14-də Bakıda keçirilən COP29 konfransı çərçivəsində də Şimali Makedoniya Prezidenti xanım Qordana Silyanovska-Davkova ilə görüşü olmuşdur. Azərbaycan və Şimali Makedoniya arasında mədəni və humanitar əlaqələrin gücləndirilməsi də mühüm məsələlərdən biri kimi diqqətdə saxlanılır. İki ölkə xalqları arasında tarixi və mədəni bağlar daha sıx əməkdaşlıq üçün geniş imkanlar yaradır. Bu xüsusda dünya miqyasında layiqli yer tutan Nizami Gəncəvi Beynəlxalq Mərkəzi tərəfindən təşkil olunan XII Qlobal Bakı Forumunda Şimali Makedoniya Prezidentinin iştirakı humanitar əlaqələrin genişləndirilməsində mühüm rol oynayacaq", - deyə siyasətçi əlavə edib. 

Əsmər QARDAŞXANOVA,

"Azərbaycan"