Hörmətli redaksiya! Biz - Hökməli qəsəbəsi X.B.Natəvan küçəsində yaşayan bir qrup vətəndaş məcburiyyət qarşısında qalıb, sizə müraciət etmək qərarına gəldik.
Bəri başdan qeyd edək ki, ölkəmizdə aparılan abadlıq-quruculuq işləri, insanların həyat şəraitinin daha da yaxşılaşmasına xidmət edən iqtisadi islahatlar, sosial sahədə görülən işlər bizi sevindirir. Ona görə də ölkəmizdə aparılan sosial siyasətin bizim də həyatımıza nə zaman təsir edəcəyini, güzəranımızın yaxşılaşacağını ümidlə gözləyirik. Amma təəssüflə qeyd edək ki, bizim payımıza hələlik gözləmək düşür.
Biz "AZELKO" MMC-nin yaxınlığında yaşayırıq. Yollarımız olduqca bərbad vəziyyətdədir. Yağış yağanda palçıqlı küçələrə nəinki piyada, heç maşınla da girmək mümkün deyil. Çirkli suların axıdılması üçün kanalizasiya, adi kanal belə qazılmayıb. Bəzi vətəndaşlar çirkli suları birbaşa yola axıdırlar ki, bu da müxtəlif yoluxucu xəstəliklərin yayılmasına səbəb olur. Azyaşlı uşaqlar məktəbə getməkdə çətinlik çəkirlər. Ağır yük maşınları yolu elə bərbad vəziyyətə salıb ki, xəstəmiz olanda təcili yardım maşınları yola girə bilmir. Taksilər də bizə xidmət göstərməkdən imtina edirlər. Yaz-yay aylarında vəziyyətimiz daha dözülməz olur.
Hörmətli redaksiya, sadaladığımız problemlər barədə dəfələrlə Hökməli kənd bələdiyyəsinə, Abşeron Rayon İcra Hakimiyyəti aparatına yazılı və şifahi müraciət etsək də, şikayətimizə baxılmayıb. Ümidimiz hər yerdən kəsildiyi üçün sizə üz tutmaq məcburiyyətində qaldıq. Güman edirik ki, dərdimizə, problemimizə işıq salsanız, aidiyyəti qurumların rəhbərləri bəlkə insafa gəlib cəmi 1 kilometr məsafəni əhatə edən yola çınqılın döşənməsi və yol kənarında çirkli suların axıdılması üçün adi bir kanalın qazılmasını təmin edərlər.
Hüseyn Qurbanov, Aydın Hüseynov,
Vüsalə Yunusova, Qara ƏhmƏdov,
Ramiz Axundov, Vahid CƏbrayılov,
Pərinaz Əliyeva, Leyla HƏsƏnova,
Rabil HƏsƏnov, Ramil HƏsƏnov,
Raiz Qurbanov, Sənan Salmanov,
Zamin MƏmmƏdƏliyev, Ziyafət KƏrimov,
Sveta MƏmmƏdova, Elmar Abbasov,
Salman Salmanov, Cəlalə CƏfƏrova,
İlqar KƏrimov, Zahid Seyidov,
Yaşar Abdullayev, Zərnisə Yusubova
jpg_1775472819.jpg)
