Ötən ilin dekabrından etibarən Ermənistana həm birbaşa, həm də Azərbaycan ərazisindən müxtəlif yüklər daşınır. Rəsmi Bakının bu addımı iki ölkə arasında münasibətlərin tədricən normallaşması fonunda iqtisadi əməkdaşlıq imkanlarının genişlənməsinə töhfə verir. Prezident İlham Əliyev bəyan edib ki, Cənubi Qafqaz regionunda bütün kommunikasiyalar açılmalıdır. Azərbaycan öz üzərinə düşən öhdəlikləri yerinə yetirir və ərazisindən yüklərin daşınmasına şərait yaradır. Bu, regional nəqliyyat-kommunikasiya xətlərinin açılması istiqamətində atılan addımların praktik nəticəsi kimi dəyərləndirilə bilər.
Milli Məclisin deputatı Könül Nurullayeva qəzetimizə açıqlamasında bildirib ki, uzun illər işğal siyasəti səbəbindən blokada şəraitində yaşamış Ermənistan üçün yeni logistika marşrutlarının yaranması iqtisadiyyatın diversifikasiyası baxımından əhəmiyyətlidir: "Azərbaycanın tranzit ölkə kimi çıxış etməsi həm regionda iqtisadi inteqrasiyanı gücləndirir, həm də ticarət dövriyyəsinin artmasına şərait yaradır. Ermənistan rəsmiləri də bəyan ediblər ki, neft məhsullarının çatdırılması ölkənin daxili bazarında enerji təminatını və qiymətlərini sabitləşdirir, sənaye sektorunun davamlı fəaliyyətinə müsbət təsir edir. Baş nazir Nikol Paşinyan bu addımı "real sülhün nümunəsi" kimi qiymətləndirərək, Azərbaycanın neft məhsullarının Ermənistandakı monopoliyanı dağıtdığını da bildirmişdi".
Deputat qeyd edib ki, Azərbaycanın bu prosesdə iştirakı regionda iqtisadi əməkdaşlıq modelinin formalaşmasına töhfə verir. Həmçinin uzunmüddətli perspektivdə siyasi sabitliyə müsbət təsir edir. Beynəlxalq təcrübə göstərir ki, iqtisadi inteqrasiya səviyyəsi yüksəldikcə münaqişə riskləri azalır və tərəflər arasında etimad mühiti formalaşır. Ermənistan iqtisadiyyatı üçün bu əməkdaşlığın potensial faydalarına gəlincə, demək olar ki, tranzit imkanlarının genişlənməsi bu ölkəni regional ticarət şəbəkələrinin bir hissəsinə çevirə bilər. Bu isə yeni investisiyaların cəlb olunmasına, logistika və xidmət sektorlarının inkişafına, həmçinin məşğulluğun artmasına şərait yaradar. Paralel olaraq idxal marşrutlarının şaxələndirilməsi iqtisadi risklərin azaldılmasına xidmət edir.
K.Nurullayeva deyir ki, prosesin davamlı və sistemli xarakter alması üçün siyasi dialoqun gücləndirilməsi, müvafiq mexanizmlərin formalaşdırılması vacibdir: "Ermənistana neft məhsullarının göndərilməsi, ümumilikdə yüklərin Azərbaycan üzərindən daşınması təkcə iqtisadi deyil, həm də geosiyasi baxımdan yeni reallıqların formalaşdığını göstərir. Bu proseslərin düzgün idarə olunması regionda sabitliyi möhkəmləndirəcək, qarşılıqlı faydalı əməkdaşlığı daha da genişləndirəcək. Bir sözlə, sözügedən əməkdaşlıq fonunda Azərbaycan regionda enerji və logistika mərkəzi rolunu gücləndirir, Ermənistan isə izolyasiyadan çıxaraq regional bazara inteqrasiya olunur".
Əsmər QARDAŞXANOVA,
"Azərbaycan"
jpg_1775472819.jpg)
