Prezident İlham Əliyevin mədəniyyət siyasətində yaradıcı insanlara diqqət və qayğı xüsusi yer tutur

Azərbaycanın incəsənət xadimlərinə dövlət qayğısı həyata keçirilən mədəniyyət siyasətinin hər zaman mühüm istiqamətlərindən olmuşdur.  Mədəniyyət xadimləri yaradıcı insanlardır, onların həssas münasibətə, yeni yaradıcılıq uğurlarına ruhlandırılacaq diqqətə, xidmətlərinə görə layiqli qiymətə daim ehtiyacları var. 

Azərbaycanın mədəniyyət işçilərinin dövlət təltifləri ilə mükafatlandırılması bu diqqətin bariz nümunəsidir. Hər bir xalq yetirdiyi mədəniyyət xadimləri ilə tanınır, öz potensialını onların yaradıcılığı ilə ifadə edir. Prezident İlham Əliyev bu xüsusda olan çıxışlarında dəfələrlə vurğulayır ki, Azərbaycanı dünyada tanıdan bizim ziyalılarımızdır - alimlərimiz, rəssamlarımız, şairlərimiz, aktyorlarımız, yazıçılarımız, bəstəkarlarımızdır: "Azərbaycanı bu insanlar tanıdırlar. Bu insanlar cəmiyyətin aparıcı təbəqələridir, cəmiyyətin elitasıdır". Ona görə dövlətimiz hər zaman öz yaradıcı adamlarına böyük dəyər verir, onları dəstəkləyir, mədəniyyətimizin inkişafına zəngin töhfələr bəxş etmiş sənətkarlarımızı həmişə qiymətləndirir. 

Martın 30-da görkəmli teatr və kino xadimi, Azərbaycanın Xalq artisti, Dövlət mükafatları laureatı Şəfiqə Məmmədovanın 80 yaşı tamam oldu. Azərbaycan Respublikasının Prezidenti İlham Əliyevin bu münasibətlə bir gün əvvəl - martın 29-da Şəfiqə Məmmədovanı qəbul edərək ona ölkəmizin ən ali dövlət təltiflərindən sayılan "İstiqlal" ordenini təqdim etməsi cəmiyyətimizdə xüsusi rəğbət doğurdu. 

Bu, dövlət başçısının yaradıcı insanlarımıza, Azərbaycan mədəniyyətinin inkişafına töhfələr vermis sənət adamlarımıza həssas münasibətinin təzahürüdür. Sənət adamlarımızın yubileylərinin yüksək səviyyədə qeyd olunması, onların dövlət mükafatları ilə təltif edilməsi, ömrünü sənətə sərf etmiş insanlara Prezident mükafatının ayrılması, mədəniyyət xadimlərinin evlə təmin olunması və sosial vəziyyətinin yaxşılaşdırılması üçün digər müxtəlif proqramların həyata keçirilməsi uzun illərdir ki, ölkəmizdə xoş bir ənənəyə çevrilib. Ümummilli Lider Heydər Əliyevin milli dəyər konsepsiyasından irəli gələn bu yanaşmanı Azərbaycan Prezidenti İlham Əliyev uğurla qoruyaraq inkişaf etdirməkdədir.  

Milli mədəniyyətimizə göstərilən diqqət

Yaradıcı şəxsiyyətlərə göstərilən bu münasibət onların şəxsində, ümumiyyətlə, mədəniyyətimizin inkişafı üçün müstəsna əhəmiyyət daşıyır. Belə bir həssas münasibət onların həm mənəvi, həm də sosial rifahı baxımından son dərəcə mühüm amildir. Bu insanlar illərlə incəsənətə, milli mədəniyyətə xidmət etmiş sənətkarlardır. Onların zəhmətinin dövlət səviyyəsində qiymətləndirilməsi, yüksək fəxri adlara, orden və medallara layiq görülməsi, şəxsən dövlət rəhbərinin onlarla görüşüb təbriklərini yetirməsi bu xidmətlərə, həmin şəxslərin istedadına, yaradıcı əməyinə verilən dəyərin bariz nümunəsidir. Prezident İlham Əliyev gözəl aktrisamız Şəfiqə Məmmədovaya "İstiqlal" ordenini təqdim edərkən dedi: "Siz uzun illər ərzində Azərbaycan mədəniyyətinin inkişafında çox önəmli rol oynayırsınız, ölkəmizin teatr və kino sənətinə dəyərli töhfələr vermisiniz. Həm gözəl aktrisa, həm pedaqoq, ictimai xadim kimi xalqımızın hörmət və rəğbətini qazanmısınız. Ulu Öndər Heydər Əliyev sizin fəaliyyətinizi həmişə yüksək qiymətləndirirdi, siz bunu yaxşı bilirsiniz. Hələ sovet dövründə siz həm Azərbaycan Respublikasının, həm Sovet İttifaqının Dövlət mükafatlarına layiq görülmüsünüz". Daha sonra xüsusi vurğulandı ki, Ş.Məmmədova 2000-ci ildə Ulu Öndərin sərəncamı ilə  "Şöhrət" ordeni ilə təltif olunmuşdur. Prezident İlham Əliyevin sərəncamları ilə "Şərəf", Birinci dərəcəli "Əmək" ordenlərinə, fəxri diploma layiq görülmüşdür. "İstiqlal" ordeni isə şəxsən dövlətimizin başçısı tərəfindən təqdim edilmişdir. Bu, böyük qürur, mədəniyyətə göstərilən münasibətin ən ali məqamıdır.

Dövlət tərəfindən belə bir xüsusi diqqət göstərilməsi cəmiyyətdə incəsənət xadimlərinə olan hörməti daha da artırır. Bu isə onların yaradıcılıq ruhunu gücləndirir və sənətə yeni töhfələr verməyə təşviq edir. Belə insanlara təqdim olunan dövlət mükafatları və Prezident təqaüdləri sənətkarların maddi rifahının yaxşılaşmasına da kömək edir. Xüsusilə, yaşı və sağlamlıq problemləri səbəbilə aktiv fəaliyyət göstərə bilməyən sənət adamları üçün bu dəstək son dərəcə önəmlidir. 

Gənc nəslə nümunə

Burada gələcək nəsillər üçün yaradılan stimul da çox vacib məqamdır. Sənət nəsillərdən-nəsillərə ötürülən ənənədir. Bu ənənənin davamlı olaraq bir nəsildən digərinə keçməsindən, zaman ötdükcə dövrün çağırışlarına uyğun inkişaf etdirilməsindən ötrü daim yeni ardıcılların formalaşması, gənclərin estafeti təhvil alması mütləqdir. Gənclər isə hər zaman motivasiyaya ehtiyac duyur, hansısa fəaliyyət sahəsinə ictimai münasibəti müəyyən edən örnəklər əsasında öz tale yollarını müəyyənləşdirirlər. Azərbaycan Respublikasının Prezidenti İlham Əliyevin yaradıcı adamlarımıza daimi diqqət və qayğısı bu baxımdan gənclər üçün mükəmməl nümunədir. Dövlətimizin başçısının görkəmli sənətkara göndərdiyi təbrik məktubunda aktyorluq sənətinin sirlərinə gənclərin yiyələnmələri üçün mahir pedaqoqların böyük əmək sərf etdikləri xüsusi vurğulanır. 

Bildiyimiz kimi, sənət adamları milli-mənəvi dəyərlərin qorunması və inkişafında da çox böyük rol oynayırlar. Yaradıcı şəxsiyyətlər istənilən xalqın milli kimliyinin qorunmasında mühüm missiya yetinə yetirirlər. Dövlətin onlara göstərdiyi dəstək dəyərlərin möhkəmlənməsinə, milli mədəniyyətin daha da inkişaf etdirilməsinə və dünya miqyasında tanınmasına şərait yaradır. Xüsusilə qloballaşma dövründə bütün bunlar müstəsna əhəmiyyətə malikdir. 

Cənab İlham Əliyevin sənətkarlara göstərdiyi diqqət ali dövlət rəhbərliyinin sənətə münasibətinin göstəricisi kimi cəmiyyət üçün də bir meyar yaradır. İnsanlarımızın dövlətə etimadını daha da artıran bu münasibət Azərbaycan Prezidentinin həyata keçirdiyi mədəniyyət siyasətinin vacib elementidir. Azərbaycan mədəniyyəti zəngin tarixi, unikal irsi və özünəməxsus incəsənət nümunələri ilə fərqlənən bir irsdir. Bu çoxkomponentli siyasət isə həm ölkə daxilində milli mədəniyyətimizin inkişafını, həm də beynəlxalq aləmdə Azərbaycanın mədəni irsinin tanıdılmasını, eləcə də uğurlu mədəniyyət diplomatiyasını əhatə edir.

Mədəniyyət diplomatiyası dövlətlər və xalqlar arasında müxtəlif mədəniyyətlərin mübadiləsini təmin edir, qarşılıqlı dözümlülük üzərindən dostluq körpüləri salır, mehriban qonşuluq əlaqələrinin qurulmasına geniş imkanlar yaradır. Müasir beynəlxalq münasibətlərdə mədəniyyət diplomatiyası hər bir dövlət üçün çox səmərəli siyasi strategiya alətidir. 

Dövlətimizin rəhbərinin həyata keçirdiyi siyasətin nailiyyətləri sayəsində bu gün tarixinin ən qüdrətli dövrünü yaşayan Azərbaycan dövləti mədəniyyət sahəsində həyata keçirdiyi düşünülmüş siyasətlə də beynəlxalq aləmdə zəngin potensiala və yüksək mədəniyyətə malik ölkə kimi nüfuz qazana bilib. Ölkəmiz qısa müddətdə ümumdünya mədəniyyət diplomatiyası cərəyanına fəal şəkildə qoşularaq, özünü mədəni mübadiləyə, xalqların mənəvi yaxınlığına açıq, ümumbəşəri mədəni irsin zənginləşdirilməsinə və qorunmasına qadir dövlət kimi tanıtmağı bacarıb, bu istiqamətdə ciddi nəticələr qazanıb. Xalqımızın milli-mədəni dəyərlərinin dünyada təbliği, mədəni və humanitar əlaqələrimizin genişlənməsi, əsrlər boyu bəşər mədəniyyətinə nadir töhfələr vermiş şəxsiyyətlərimizin müasir dünyaya təqdimatı Azərbaycanın xarici siyasət kursunun mühüm istiqamətidir.

Dünyaya çıxan Azərbaycan sənəti

Zəngin tarixi və mədəni irsi ilə xalqımızın mənəvi həyatında mühüm yer tutan Azərbaycan teatrı dövlətimizin mədəniyyətə qayğısı zəminində sürətlə inkişaf edən sahələrdəndir. Son illərdə teatr binaları əsaslı şəkildə təmir olunub, müasir avadanlıqlarla təchiz olunub, yeni teatr məkanları yaradılıb. Regionlarda fəaliyyət göstərən teatrların inkişafına diqqət daha da yüksəlib. Teatr aktyorlarının və işçilərinin əməkhaqları artırılıb, istedadlı gənc sənətçilərin dəstəklənməsi üçün müxtəlif proqramlar hazırlanaraq həyata keçirilib. Azərbaycan Prezidenti teatrlarımızın beynəlxalq festivallarda iştirakını dəstəkləyir, ölkəmizdə dünya səviyyəli teatr tədbirlərinin keçirilməsinə hər cür şərait yaradır.

Bütün bu addımlar Azərbaycan teatr sənətinin inkişafına təkan verir, gənc nəslin marağını artırır və ölkəmizdə mədəni irsin qorunmasına geniş zəmin yaradır. Ölkə rəhbərinin bu sahəyə ciddi diqqət verməsi Azərbaycan teatrının dünya səhnəsində layiqli yer tutmasına əsas yaradır. 

Bu gün ölkəmizdə musiqi, muzey, kitabxana, sərgi fəaliyyətinin inkişafı üçün də ardıcıl addımlar atılır. Konsert salonları, muzeylər, sərgi zalları modernləşdirilib, müasir texnologiyalarla təchiz edilib. Prezident İlham Əliyevin mədəniyyət siyasəti çərçivəsində musiqiyə göstərilən diqqət bu sahədə də milli dəyərlərimizin qorunmasını, gənc musiqiçilərin dəstəklənməsini və Azərbaycan musiqisinin dünyada tanıdılmasını təmin edir. Bu siyasət nəticəsində ölkəmizdə həm muğam, həm klassik, həm də müasir musiqi janrları inkişaf edir, Azərbaycan dünya mədəniyyət məkanında öz musiqisi ilə layiqli yerini qoruyur. 

Sənət və sənətkar qədri bilən Lider

Dövlətimizin mədəniyyət siyasətinin uğurla həyata keçirilərək öz məqsədlərinə çatmasında Azərbaycanın Birinci vitse-prezidenti, Heydər Əliyev Fondunun rəhbəri Mehriban xanım Əliyevanın müstəsna xidmətləri var. Mehriban xanımın rəhbərlik etdiyi layihələr və təşəbbüslər mədəni irsimizin qorunması, milli dəyərlərimizin təbliği və incəsənət sahəsində istedadların dəstəklənməsi baxımından böyük əhəmiyyət daşıyır. Bu layihələr Azərbaycanın tarixi abidələrinin bərpasını, milli musiqi, teatr, kino, rəngkarlıq, el sənətlərimizin inkişafını, dünyaya təqdim olunmasını əhatə edir. Mehriban xanım Əliyeva xüsusilə xalq olaraq genetik kodumuzu təşkil edən muğam sənətimizin dünya səviyyəsində tanıdılması üçün böyük işlər görüb. Bakıda və regionlarda yaradılmış muğam mərkəzləri, Azərbaycan muğamının UNESCO-nun qeyri-maddi mədəni irsi siyahısına daxil edilməsi, ölkəmizdə beynəlxalq muğam festivallarının təşkili bu işlərin müəyyən bir hissəsidir.

Vətən müharibəsindəki tarixi zəfərimizdən sonra bu gün dövlətimizin siyasətinin mühüm prioritetlərindən biri də azad yurdlarımızda mədəniyyətin bərpasıdır. Ermənilərin təxminən 30 illik işğal dövründə vandalcasına dağıtdıqları tarixi-mədəni abidələrimiz bərpa edilərək yenidən həyata qaytarılır. Hər il Şuşada təşkil olunan "Xarıbülbül" Musiqi Festivalı, Vaqif Poeziya Günləri kimi mədəniyyət tədbirləri ilə böyük bir tarixi-mənəvi ənənə yenidən ölkəmizin və regionun mədəniyyət həyatında öz yerini tutur.  

Azərbaycanın mədəniyyət siyasəti beynəlxalq əməkdaşlıq müstəvisində də böyük uğur qazanır. Dünyanın müxtəlif ölkələrində Azərbaycan mədəniyyəti ilə bağlı tədbirlər keçirilir, dünya ölkəmizi, xalqımızı mədəniyyət incilərimiz işığında bir daha yaxından tanıyır. 

Mədəniyyət siyasətinin mühüm istiqamətlərindən biri kimi gənc istedadların üzə çıxarılması və dəstəklənməsi də davamlı xarakter daşıyır. Yaradıcı gənclər, o cümlədən teatr və kino sahəsində çalışan şəxslər, musiqiçilər, rəssamlar üçün müsabiqələr, proqramlar təşkil edilir. Onların təhsilinə, fərdi inkişafına, gənc sənətçilərin beynəlxalq festivallara və digər tədbirlərə qatılmasına dəstək verilir.

Bütün bunlar Azərbaycan Respublikasının Prezidenti İlham Əliyevin həyata keçirdiyi mədəniyyət siyasətinə ümumi bir baxışdır, bu siyasətin uğurları işığında milli mədəniyyətimizin gələcəyi çox parlaq görünür. Çünki onun cənab İlham Əliyev kimi güclü, sənət və sənətkar qədri bilən hamisi var.

İradə ƏLİYEVA,

"Azərbaycan"