Şəhərimiz sahibsiz itlər problemi ilə uzun illərdən bəri qarşı-qarşıyadır. Küçələrdəki sahibsiz itlər həm insanlar, həm də heyvanların özləri üçün problemlər yaradır. Baytarlıq nəzarətindən kənarda qalan bu heyvanlar çox vaxt quduzluq kimi infeksiyalar daşıyırlar ki, bu da insanlar üçün ciddi təhlükədir.
Son illər sahibsiz itlərə olan münasibət ölkəmizdə köklü şəkildə dəyişib. Artıq onlar təkcə küçədə qalan, görməzlikdən gəlinən varlıqlar deyil, insanların mərhəmətini qazanan, qayğı göstərilən canlılar kimi qəbul olunurlar. Bir vaxtlar qorxu və laqeydliklə qarşılanan bu canlılara indi daha çox anlayış və mərhəmət göstərilir. Artıq insanlar küçə itləri üçün məsuliyyət hiss etməyə başlayıblar. Bu dəyişimin arxasında həm cəmiyyətin artan həssaslığı, həm də fəaliyyət göstərən təşkilatların əməyi dayanır.
Bu baxımdan, IDEA Heyvanlara Qayğı Mərkəzinin fəaliyyəti xüsusi qeyd olunmalıdır. Küçədən toplanan itlər mərkəzdə ilk olaraq tibbi müayinədən keçirilir, sağlamlıq problemləri aradan qaldırılır, sterilizasiya olunur, peyvəndləri vurulur və psixoloji adaptasiya prosesinə daxil edilirlər. Hər bir it fərdi olaraq izlənilir, peyvəndlənən itlərin qulaqlarına nömrələnmiş birkalar vurulur, onların ehtiyaclarına uyğun şəkildə baxım göstərilir.
Mərkəzin əsas məqsədi bu canlıların təhlükəsiz bir mühitdə yaşamasını təmin etməklə yanaşı, onlara yenidən həyat qazandırmaq və sevgi dolu evlərə sahibləndirməkdir. Bunun üçün mütəmadi olaraq sahibləndirmə kampaniyaları təşkil olunur, sosial şəbəkələrdə onların fotoları və hekayələri paylaşılır. Bir çox itlər bu yolla yeni ailələrinə qovuşur, küçə həyatı onlar üçün artıq keçmişdə qalır.
Cəmiyyətdə də bu istiqamətdə ciddi dəyişikliklər müşahidə olunur. İnsanlar sahibsiz itlərə münasibətdə daha anlayışlı və diqqətli davranmağa başlayıblar. Küçələrdə su qabları, qida qutuları qoyulur, insanlar gündəlik həyatlarında bu canlılara yardımçı olmaq üçün təşəbbüs göstərirlər. Xüsusilə uşaqlara və gənclərə heyvanlarla mərhəmətli davranmaq vərdişi aşılanır.
Bütün bu təşəbbüslər bir məqsədə xidmət edir - sahibsiz heyvanlara sahib çıxmaq, onları cəmiyyətin sevgi və qayğı dolu bir hissəsinə çevirmək. Bu gün küçələrdəki səssiz canlara göstərilən diqqət və qayğı cəmiyyətimizin nə qədər inkişaf etdiyini, insani dəyərlərə nə qədər önəm verdiyini göstərir. Bu dəyişikliklər insanların mərhəmətli bir gələcəyə doğru addımladığını sübut edir.
Əlbəttə, bütün problemlər hələ də tam həll olunmayıb. Sahibsiz itlərin sayı hələ də çoxdur, bəziləri insanlara yaxınlaşmaqdan qorxur, bəziləri isə hələ də zorakılığa məruz qalır. Amma ən önəmlisi odur ki, artıq bu məsələyə göz yumulmur. İnsanlar bu canlıların da yaşamaq haqqı olduğunu, acı çəkməyə layiq olmadıqlarını qəbul etməyə başlayıblar.
İctimai təşəbbüslər də bu dəyişimin bir hissəsidir. Müxtəlif sosial qruplar, könüllülər, tələbələr tərəfindən təşkil edilən qida toplama kampaniyaları, sahibləndirmə çağırışları və sosial mediada paylaşılan hekayələr daha geniş kütlələrin diqqətini çəkir. İnsanlar bir dəfə bir itin gözlərinə baxanda onun da qorxu, ümid və sevgi hiss edə bildiyini görür və bu da kifayət edir ki, münasibətlər kökündən dəyişsin.
Bu yaxınlarda Nazirlər Kabinetinin qərarı ilə Bakı Şəhər İcra Hakimiyyətinin tabeliyində "Sahibsiz Heyvanlara Qayğı Mərkəzi" publik hüquqi şəxs yaradılmışdır. Belə bir qurumun fəaliyyətə başlaması problemin həllinə ciddi kömək olacaq. Xüsusən də ona kifayət qədər vəsaitin ayrılması problemin həllinə uğurlu töhfədən xəbər verir.
İnanırıq ki, "Sahibsiz Heyvanlara Qayğı Mərkəzi" ilk günlərdən məsələnin çözülməsinə ciddi yanaşacaq, sahibsiz itlərə sahib çıxaraq insanları təhlükəsiz və qorxusuz gəzib dolanmalarına köməyini göstərəcəkdir.
Sahibsiz itlərə göstərilən qayğı, münasibətdəki dəyişiklik, əslində, cəmiyyətin öz daxili dəyişiminin əksidir. Bu, sadəcə heyvan sevgisi deyil, bu həm də insanlıqdır. Nə qədər ki bir cəmiyyət ən zəif, ən müdafiəsiz canlılara sahib çıxır, deməli, o cəmiyyət güclü və sağlam bir yoldadır.
Nərminə ƏSGƏROVA,
"Azərbaycan"
