Ölkəmizdə turizmin bir çox növünün inkişafı üçün geniş imkanlar mövcuddur. O üzdən təbiətimiz ilin bütün fəsillərində qonaq-qaradan korluq çəkmir. Tariximiz, təbiətimiz, infrastrukturumuz, mətbəximiz, qonaqsevərliyimiz yerli qonağı da, xarici turisti də heyran edir.
Bunların hamısını yurdumuzun dilbər guşəsi olan Quba rayonuna da birbaşa şamil etmək olar. Hələ sovet dönəmində Quba deyəndə bir onun dadı ilə seçilən alması yada düşürdü, bir bu bölgənin bənzərsiz təbiəti. Müstəqillik dövründə, xüsusən Prezident İlham Əliyev regionların sosial-iqtisadi inkişafını prioritet istiqamət kimi qarşıya qoyub tədbirlər görəndən sonra Quba da yeni dövrə qədəm qoydu. Zəngin flora və faunaya, əsrarəngiz təbiətə malik olan bu rayon yayda da, qışda da turistlərin maraq göstərdiyi və həvəsə gəldiyi məkanlar sırasında yerini daha da möhkəmləndirdi.
Şahdağın ətəklərində və Qudyalçayın sahilində qərar tutan Quba ilin bütün fəsillərində gəlməli və görməlidir. Aydındır ki, turizm deyəndə, ilk yada düşən fəsil yay olur. Amma Quba və Qusara qışda da istirahətə gələnlərin sayı azalmır. Çünki regionda bunun üçün təbiətin səxavəti və infrastruktur var.
Qubanın qış turizm simasını qardan korluq çəkməyən Xınalıq, Qrız, Nügədi kəndləri, ağappaq örpəyə bürünən meşələri və onlarla digər amil şərtləndirir. Bu sıraya fəsildən asılı olmayaraq, Qubanın qədim tarix-mədəniyyət abidələrini, sənətkarlıq nümunələrini də daxil etmək lazımdır. Üstəlik, xalçaçılıq, misgərlik kimi qədim peşələrin hələ də Qubada yaşadılması buranı ilin bütün aylarında cəlbedici edir.
Rayonda dağ, kənd, çadır turizmi geniş yayılsa da, qışda əsasən kənd və hotel turizminə meyil daha çox olur. Turistlərin başlıca marşrutlarından biri Xınalıq istiqamətinədir. Xınalığın tarixi, qədim yaşayış məskəni kimi indiyədək qalması kəndə marağı artırır. Əvvəllər Xınalıq yolu təmirsiz idi. İllər öncə Prezident İlham Əliyevin tapşırığı ilə Xınalığa gedən yol yenidən inşa edildi. Eyni zamanda ətraf kəndlərə də yol çəkildi. Bu, həmin kəndlərdə turizmin inkişafı üçün yeni imkanlar açdı.
Haput, Qrız, Cek, Afurca, Gültəpə, Nügədi və digər kəndlərdə əsasən kənd turizmi inkişaf edib. Qışda bu kəndlərin ərazilərində yerləşən evlərin çoxu turistlər tərəfindən kirayə tutulur. Gültəpə kəndinə yol çəkildikdən sonra bura xeyli turist gəlir. Rayon rəhbərliyi soyuq havaları nəzərə alaraq maşınların rahat, təhlükəsiz hərəkətini təmin edən xüsusi briqada yaradıb. Briqada əsas turist marşrutlarına nəzarət edir.
Kənd əhalisi də turistlərin istirahəti üçün yaxşı şərait yaratmağa çalışır. Gültəpə sakini Səmayə Qarayeva deyir ki, yeni il ərəfəsində kənddəki evlərin əksəriyyətini turistlər kirayələmişdir: "Hələ kəndin daxili yolları təmir edilsə, qonaqlarımız daha çox olar. Turistlər üçün tam rahatlıq yaranar, kənd sakinlərinin ailə büdcəsinə də sanballı kömək olar".
Xatırladaq ki, Qubada turistlər üçün bir neçə əsas marşrut var. Yayda ən çox Xınalıq, Qrız, Qəçrəş istiqamətində turist sıxlığı olur. Qışda isə Qonaqkənd istiqamətində turistlərin artımı müşahidə edilir ki, bu da yolların təmirli olması ilə bağlıdır. İndi artıq səfalı Möhüc, Tülər, Yenikənd kimi dağ kəndləri də yeni turist marşrutuna çevrilib. Təxmini hesablamalara görə, son iki ayda Qubaya bu istiqamətdə gələn turistlərin sayı 18 mini ötüb.
Qışda hotel turizminə də maraq təbiidir. Dekabrın sonu, yanvarın əvvəllərində Qubanın hotellərində yer tapmaq problemə çevrilmişdi. İstifadəyə verilən yeni hotel və SPA mərkəzlərində istirahət edənlərin sayı-hesabı yox idi.
Yaşadığımız texnologiyalar əsri bu gün Qubada da peşəkar tanıtım sektorları yaradılmasına imkan verib. Səfəröncəsi istər yerli, istərsə də əcnəbi turist internet vasitəsilə istirahət yerlərini araşdırır, qarşılaşdığı onlarla məkandan birini seçir. Hazırda Qubada bu istiqamətdə ciddi işlər aparılır. "Məstərgah", "Cənnət bağı", "Təngaltı", "Marxal" və digərlərinin isə artıq öz saytları var.
Qışda istirahət üçün Qubanı seçsəniz, məmnunluğunuz yaydakından az olmayacaq. Yaya nisbətən münasib qiymətlər, ruhu təmizləyən saf hava və şaxtalı gecələr əsl qış nağılıdır.
Akif ƏLİYEV,
"Azərbaycan"
jpg_1775492350.jpg)
