Müasir proqramlar işaxtaran şəxslərin potensialını üzə çıxarır
Ölkədə həyata keçirilən sosial islahatların əsas istiqamətlərindən biri də əhalinin daha çox iş yeri ilə təminatıdır. Yeni istehsal və xidmət sahələrinin açılması da ilk növbədə buna hesablanır. Özü də bu istiqamətdə şəhərlərlə yanaşı, bölgələrdə də çox iş görülür.
Konkret rəqəmlərə nəzər salaq: Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən 2020-2025-ci illəri əhatə edən proqramlarla 396,7 min şəxs aktiv məşğulluq tədbirləri ilə əhatə olunub. Onlardan 160 min nəfəri münasib işlə təmin olunub, qalan 17,3 min nəfəri kiçik ailə təsərrüfatlarını yaratmaları üçün özünüməşğulluq proqramına cəlb edilib.
Dövlət Məşğulluq Agentliyi tərəfindən gənc nəslin əmək bazarına uyğun düzgün peşə seçiminə dəstək verilməsi üçün peşəyönümü xidmətlər də göstərilir. Bu xidmətlərlə əhatə olunanların illik sayı 2018-ci ildəki 118 mindən 1,7 dəfə artaraq 2024-cü ildə 204 minə çatıb. Təkcə ötən il 203 mindən artıq şəxsə peşəyönümü məsləhət xidməti göstərilib. Onlardan 181 min 617 vətəndaş fərdi, 112 min nəfərsə qrup peşəyönümü məsləhət xidmətləri alıb. Həmin şəxslər karyera planlaması, düzgün ixtisas, peşə seçimi, iş axtarışı yolları, CV, istək məktubunun hazırlanması, müsahibəyə hazırlıq kimi mövzular barədə məlumatlandırılıblar. Peşəyönümü məsləhət tədbirləri işsiz və işaxtaran şəxslərlə yanaşı, şagirdlər, abituriyentlər və tələbələri də əhatə edib.
Özünüməşğulluq proqramının əhatə etdiyi fəaliyyət sahələri siyahısına yeni istiqamətlər də əlavə olunub. Artıq işsiz və işaxtaran şəxslərin həmin sahələr üzrə özünüməşğulluq proqramına müraciət etmək və proqramın dəstəyi ilə bu sahələrdə öz kiçik bizneslərini qurmaq imkanları var. Hazırda proqram çərçivəsində iştirakçılara kənd təsərrüfatı və istehsal-xidmətyönlü 32-dək iqtisadi fəaliyyət sahəsi üzrə zərf təqdim edilir.
Bu günlər Dövlət Məşğulluq Agentliyi əhalinin məşğulluğunu təmin etmək üçün daha bir yeni layihə hazırlayıb. Həmin layihə üzrə oxşar-əlaqəli iqtisadi fəaliyyət növləri üzrə aktivlər verilmiş şəxslərin eyni məkanda birgə klaster müəssisə kimi fəaliyyəti təmin ediləcək. Dövlət Məşğulluq Agentliyinin yerli icra hakimiyyətləri və Azərbaycan Həmkarlar İttifaqları Konfederasiyası ilə birgə həyata keçirdiyi yeni "Avtoklaster" layihəsi çərçivəsində eyni və ya oxşar iqtisadi fəaliyyət sahələri üzrə özünüməşğulluq proqramına cəlb edilərək aktivlərlə təmin olunacaq şəxslərin eyni məkanda yerləşdirilməklə klaster müəssisə formasında birgə fəaliyyət göstərmələrinə imkan yaradılacaq.
Layihənin ilkin mərhələdə Oğuz rayonunda reallaşdırılması nəzərdə tutulur. Həmin rayonda özünüməşğulluq proqramına cəlb edilmiş bir qrup şəxsin əmək bazarının tələbi və iqtisadiyyatın prioritet sahələri nəzərə alınaraq "Avtodəmirçi xidmətləri-PDR batıqların bərpası", "Avtorəngsaz", "Avtoçilingər xidməti-Katalizatorların təmizlənməsi xidməti", "Avtoelektrik - Kondisioner təmiri", "Avtoyağlama xidməti", "Avtorazval xidməti", "Avtotəmizləmə xidməti", "Özünüxidmət avtotəmizləmə xidməti", "Avtodisk təmiri - avtomobil şinlərinin bərpası" üzrə əmlaklarla təmin edilməsi və onların eyni məkanda birgə fəaliyyətinin təşkili planlaşdırılır. Məqsəd özünüməşğulluq proqramının səmərəliliyini daha da yüksəltmək, proqramdan yararlanan şəxslərin biznes fəaliyyətlərinin rəqabətə davamlılığını təmin etmək və gəlirlərini artırmaqdır. Layihə iştirakçılarının seçimi zamanı qeyd edilən sahələrdən biri üzrə təcrübəsi olan şəxslərə üstünlük veriləcək. Gələcəkdə layihə digər bölgələrdə də həyata keçiriləcək.
Ötən il 1500-ə yaxın şəxsin sosial kvota üzrə iş yerlərində məşğulluğu təmin edilib. Bununla yanaşı, 2024-cü il əməkhaqqının birgə maliyyələşdirilməsi proqramı üzrə müxtəlif sektorlardan olan işəgötürənlərlə əməkdaşlıq edilib, müqavilə bağlanmış işəgötürənlərin sayı 111-ə çatdırılıb. Proqram üzrə 391 nəfər işlə təmin olunub. Bundan başqa, il ərzində işsiz və işaxtaran şəxslərin işlə təmin edilməsi və işəgötürənlərin qısa müddətdə zəruri peşəyə, ixtisas və təcrübəyə malik olan kadrların seçiminə kömək göstərilməsi üçün 147 əmək yarmarkası təşkil edilib. İşəgötürənlərlə əməkdaşlıq çərçivəsində təşkil olunan tədbirlərdə ümumilikdə 1800-ə yaxın müəssisə iştirak edib və işsiz və işaxtaran şəxslərə 15,7 min vakansiya təqdim olunub.
"Məşğulluğa Dəstək Layihəsi"nə bu il daha 5 minədək şəxsin cəlb edilməsi gözlənilir. Bu o deməkdir ki, 2020-2025-ci illəri əhatə edən "Məşğulluğa Dəstək Layihəsi"nə cari il daha bu sayda şəxsin cəlb edilməsi nəzərdə tutulur.
Əmək və Əhalinin Sosial Müdafiəsi Nazirliyi tərəfindən Dünya Bankının maliyyə dəstəyi ilə icra olunan bu layihə özünüməşğulluq proqramının genişləndirilməsinə dəstək məqsədi daşıyır. Layihə gənclər, qadınlar, əlilliyi olan şəxslər, şəhid və aztəminatlı ailələrin üzvləri, digər həssas qruplara aid işsiz şəxslərin istehsal və xidmət sahələri üzrə avadanlıqlar əldə edərək əmək bazarına çıxışına imkan yaradır. 22 min işsiz şəxsi əhatə etməsi nəzərdə tutulan layihə uğurla alınarsa, bu ilin sonunadək həmin rəqəmi 25 minə çatdırmaq hədəflənib.
Rüstəm KAMAL,
"Azərbaycan"
