Qərbi Azərbaycan İcmasının təşkilatçılığı ilə Varşava İqtisadiyyat Məktəbində sərgi keçirilib. 14 oktyabr 2024-cü ildə Polşanın paytaxtı Varşava şəhərində Qərbi Azərbaycan İcmasının təşkilatçılığı ilə "Qərbi Azərbaycan - yaddaşlarımızda" adlı sərginin açılışı baş tutub.

Qərbi Azərbaycan mədəni irsi ilə bağlı Avropada ilk dəfə keçirilən sərginin açılışını edən universitet rektoru, professor Pyotr Vaxovyak rəhbəri olduğu ali məktəbdə belə bir sərginin keçirilməsindən məmnun olduğunu bildirərək işinə uğurlar arzulamışdır.

Azərbaycan Respublikasının Polşadakı fövqəladə və səlahiyyətli səfiri Nərgiz Qurbanova çıxış edərək ölkəmizin zəngin tarixi irsindən söz açmış, Qərbi Azərbaycan mədəni irsinin xüsusi yerinin olduğunu bildirmiş və İrəvan xanlığının tarixi barədə geniş məlumat vermişdir. Səfir avropalı səyyahların əsərlərində xanlıq barədə geniş məlumatları diqqətə çatdıraraq indi bu zəngin irsin məhv edilməkdə olduğunu təəssüflə qeyd etmişdir. O həmçinin bildirmişdir ki, maddi irs məqsədli şəkildə məhv edilsə belə həqiqətləri insanların yaddaşından silmək mümkün deyil və tarix gec ya tez həqiqətləri üzə çıxarır. 

Qərbi Azərbaycan İcmasının İctimaiyyətlə əlaqələr şöbəsinin müdiri Ülviyyə Zülfiqar çıxışı zamanı sərgiyə gələn bütün qonaqlara təşəkkür edərək bildirmişdir ki, qərbi azərbaycanlılar ötən əsr ərzində bir neçə dəfə deportasiyaya məruz qalıb və nəticədə bu gün Ermənistanda bir nəfər də olsun azərbaycanlı qalmayıb. Ermənistanın qərbi azərbaycanlıların zəngin mədəni irsinə ağır zərbələr vurmasını, azərbaycanlıların yaşayış məntəqələrini xarabalığa çevirdiyini, əsrlərin sınağından keçmiş abidələri yerlə yeksan etdiyini qeyd edən icma rəsmisi Ermənistanda azərbaycanlılara məxsus 300-dən çox məscidin, yüzlərlə qəbiristanlığın məhv edildiyini bildirib. O, Göyçə aşıq məktəbinin tanınmış siması Aşıq Ələsgərin doğma kəndindəki qəbirüstü abidəsinin Ermənistan tərəfindən məhv edildiyi haqqında məlumat verərək Azərbaycan Respublikasının Prezidenti İlham Əliyevin bir neçə gün əvvəl Bakıda Aşıq Ələsgərin abidəsinin açılışını həyata keçirməsini xalqımızın mətanətinin, mədəni dayanıqlılığının və qayıdışa inamının simvolu kimi vurğulamışdır. İcma rəsmisi mədəni irsə edilən hücumun həm də bütövlükdə bəşəriyyətə qarşı yönəldiyini qeyd edərək, beynəlxalq ictimaiyyəti icmanın ədalət yolunda apardığı mübarizəyə dəstək verməyə çağırmışdır.

Qeyd edək ki, oktyabr ayının 25-dək davam edəcək sərgidə Qərbi Azərbaycanın zəngin irsini əks etdirən şəkillər, eksponatlar, kulinariya nümunələri nümayiş edilib. İrəvan xanlığının bayrağı, qərbi azərbaycanlıların deportasiyası, dağıdılmış məscidlərimiz, abidələrimiz, qəbiristanlıqlarımız, Qərbi Azərbaycanın görkəmli şəxsiyyətlərinin fotolarının əks olunduğu sərgi iştirakçılar tərəfindən maraqla qarşılanıb, soydaşlarımızın başlarına gətirilən müsibətlər barədə onlara ətraflı məlumat verilib.

Yasəmən MUSAYEVA,

"Azərbaycan"